ރާއްޖެ ޓްރާންސްޕޯޓް ލިންކު (އާރްޓީއެލް) ފެރީގައި ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހު ހއ. ދިއްދޫއަށް ވަޑައިގެންފިއެވެ.
އުތީމުގައި ކުރިއަށް ދިޔަ ގައުމީ ދުވަހުގެ ހަރަކާތްތަކަށް ފަހު ރައީސް ދިއްދޫއަށް ވަޑައިގަތުމުން އެރަށުން ވަނީ ހޫނު މަރުހަބާއެއް އެމަނިކުފާނަށް ދަންނަވާފައެވެ. އެގޮތުން ގިނަ ބަޔަކު ވަނީ ރައީސްއަށް މަރުޙަބާ ދަންނަވާ ސަލާމް ކުރުމަށް ބަނދަރު ސަރަހައްދަށް ޖަމާވެފައެވެ. ރައީސް ދިއްދޫއަށް ވަޑައިގެންނެވީ ޒޯން 1ގައި އާރްޓީއެލްގެ ޚިދުމަތް ރަސްމީގޮތުން އިފްތިތާހްކުރެއްވުމަށް މިރޭ ބާއްވާ ރަސްމީ ޖަލްސާގައި ބައިވެރިވެވަޑައިގަތުމަށެވެ.
މި ދަތުރުފުޅުގައި ރައީސް އާއެކު އަރިހުގައި ޕްލޭނިން މިނިސްޓަރު މުހައްމަދު އަސްލަމާއި އެމްޓީސީސީގެ ސީއީއޯ އާދަމް އާޒިމްގެ އިތުރުން ބައެއް ވަޒީރުންނާއި މަޖިލިސް މެންބަރުން ބައިވެރިވެވަޑައިގެންނެވިއެވެ.
ޤައުމީ ފެރީ ނިޒާމަކީ ރާއްޖެ ދަތުރުފަތުރުގެ ނިޒާމަކުން ގުޅާލުމަށްޓަކައި ސަރުކާރުން ފައްޓަވާފައިވާ ބޮޑު މަޝްރޫޢެކެވެ. މުޅި ރާއްޖޭގައި މިޚިދުމަތް ދިނުމަށް ހަވާލުކޮށްފައިވަނީ އެމްޓީސީސީއާއެވެ.
އާރްޓީއެލް ފެރީގެ ޚިދުމަތުގެ ފުރަތަމަ 3 މަހު، ބައި ލައްކައަށްވުރެ ގިނަ މީހުން އެ ޚިދުމަތް ހޯދިއެވެ. ސަރުކާރުން ނިންމާފައިވަނީ ރާއްޖެ 6 ޒޯނަކަށް ބަހާލައިގެން މިޚިދުމަތް ދިނުމަށެވެ. މިޚިދުމަތް އިތުރު އަތޮޅުތަކުގައި ފެށުމަށް ބޭނުންވާ 65 ފެރީ ބަނުމަށްވެސް މިހާރު ވަނީ ހަވާލުކޮށްފައެވެ.
ހައި ސްޕީޑް ފެރީގެ ޚިދުމަތަކީ ރައްޔިތުންނަށް ފުރިހަމައަށް ބަރޯސާވެވޭ ޚިދުމަތަކަށް ސަރުކާރުން ވަނީ ހަދާފައެވެ. މިއީ ކުދި ރަށްތައް، އާބާދީ ބޮޑެތި، ޚިދުމަތްތައް ހުރި ރަށްތަކާއި ގުޅާލަދިން ފަހި ނިޒާމެކެވެ.