އީ- ޓުކުރި މެދުވެރިކޮށް ދިވެހި އުފެއްދުންތައް ދުނިޔޭގެ ބާޒާރުގައި ވިއްކޭނެ އިންތިޒާމް ހަމަޖައްސަނީ

އީ- ޓުކުރި ޕްލެޓްފޯމް މެދުވެރިކޮށް ދިވެހި އުފެއްދުންތައް ދުނިޔޭގެ ބާޒާރުގައި ވިއްކޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާކަމަށް މޯލްޑިވްސް ޕޯސްޓް ލިމިޓެޑުގެ މެނޭޖިންގ ޑިރެކްޓަރ އާދަމް މުޙައްމަދު ވިދާޅުވެއްޖެއެވެ.

މެނޭޖިންގ ޑިރެކްޓަރ އާދަމް މުޙައްމަދު މިހެން ވިދާޅުވީ މޯލްޑިވްސް ޕޯސްޓުން ހުޅުމާލެ އަމީން އެވެނިއު ޓީކް ބިލްޑިންގައި ޕިކް ޕޯސްޓް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އަމީން އެވެނިއުގެ ފުރަތަމަ ފަންގިފިލާގައި އައު ޕިކް ޕޯސްޓް ހުޅުވައިދެއްވީ ހުޅުމާލެ ދާއިރާގެ މެމްބަރު އަލީ ނިޔާޒެވެ. މި ޕިކް ޕޯސްޓް ސްޓޭޝަނަކީ މޯލްޑިވްސް ޕޯސްޓުގެ 6 ވަނަ ޕިކްޕޯސްޓް ސްޓޭޝަނެެވެ.

އަމީން އެވެނިއުގައި ހުޅުވި ޕިކް ޕޯސްޓުންވެސް އެހެން ޕިކް ޕޯސްޓުތަކެކޭ އެއްފަދަައިން ހަފްތާގެ ހުރިހާ ދުވަހެއްގައި 24 ގަޑިއިރު ޚިދުމަތްލިބޭނެއެވެ. ޕޯސްޓް މެދުވެރިކޮށް ރާއްޖެ ގެނެވޭ ތަކެތި ދުވަހުން ދުވަހަށް އިތުރުވަމުންދާއިރު ޕިކްޕޯސްޓް ސްޓޭޝަންތަކުގެ ސަބަބުން ޚިދުމަތް ލިބިގަންނަ ފަރާތްތަކަށް އިތުރު ލުއިފަސޭހަތަކެއް ލިބިގެންދާނެ ކަމަށް މޯލްޑިވްސް ޕޯސްޓް ލިމިޓެޑުން ދެކެއެވެ.

އަމީން އެވެނިއުގައި ޕިކް ޕޯސްޓެއް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން މޯލްޑިވްސް ޕޯސްޓް ލިމިޑެޓުގެ މެނޭޖިންގ ޑިރެކްޓަރ އާދަމް މުޙައްމަދު ވިދާޅުވީ ޕިކް ޕޯސްޓުގެ ޚިދުމަތް ފުޅާ ކުރުމަށްޓަކައި ގިނަ މަސައްކަތްތަކެއްކުރަމުންދާ ކަމަށެވެ. އެގޮތުން ހުޅުމާލެ ދެވަނަ ފިޔަވަހީގައި ޕިކް ޕޯސްޓެއް ހުޅުވުމަށް ނިންމާފައިވާ ކަަމަށެވެ.

"ހުޅުމާލޭ އަޅުގަނޑުމެން 2 ބަޔަކަށް ބަހާލައިގެން ހަމަ މި ޚިދުމަތް ފޭސް 2ގައި ހިޔާ ސަރަހައްދުގައި ލިބިފައިވާ އޭރިއާގައި އިތުރު ޕިކް ޕޯސްޓަކާއި، ޕޯސްޓު އޮފީހެއް ހުޅުވުމަށްވަނީ ޕްލޭންކޮށްފައި." އާދަމް މުޙައްމަދު ވިދާޅުވިއެވެ.

އާދަމް މުޙައްމަދުވަނީ ޕޯސްޓު ލިމިޑެޓުން ވިޔަފާރިވެރިންނަށް ވެދެމުންދާ އެހީތެރިކަންވެސް ފާހަގަކޮށްފައެވެ. އެގޮތުން އެކުންފުނީގެ އީ- ޓުކުރި ޕްލެޓް ފޯމް މެދުވެރިކޮށް ދުނިޔޭގެ ބާޒާރަށް ދިވެހި އުފެއްދުންތައް ފޯރުކޮށްދެވޭނެ މަގެއް ފަހިކޮށްދިނުމަށް މަސައްކަތްކުރަމުންދާ ކަމަށް އާދަމް މުޙައްމަދު ވިދާޅުވިއެވެ.

"މިހާރު މި ލޯކަލް މާރކެޓުގައި މިދައުރުވާ ދިވެހި އުފެއްދުންތެރިންގެ މުދާ ވަރަށް އަވަސް މުސްތަޤްބަލެއްގައި، އުއްމީދަކީ މިއަހަރު ނިމުމުގެ ކުރިން އިންޓަރނޭޝަނަލް މާރކެޓަށް ދިވެހި އުފެއްދުންތައް ނެރެވޭނެ އީ- ޓުކުރި ޕްލެޓްފޯމް މެދުވެރިކޮށް،" އާދަމް މުޙައްމަދު ވިދާޅުވިއެވެ.

އޮންލައިންކޮށް ދުނިޔޭގެ ބާޒާރުތަކުން ވިޔަފާރި ކުރުމުގެ ފުރުސަތު ލިބުމުން، އެކަށީގެންވާ ރަނގަޅު އަގެއްގައި އެތަކެތި ޕޯސްޓު މެދުވެރިކޮށް ރާއްޖެއަށް ގެނެވޭނެ މަގު ފަހިކޮށްދިނުމަށްޓަކައި 2015 ވަނަ އަހަރު އީޓުކުރީގެ ނަމުގައި މޯލްޑިވްސް ޕޯސްޓުންވަނީ އީ-ކޮމާސް ޕޯޓަލްއެއް ގާއިމުކޮށްފައެވެ.