ކޯވިޑް-19ގެ ކުރިން ރާއްޖޭގެ ފަތުރުވެރިކަމުގެ އެންމެ މުހިންމު އެއް މާކެޓަކީ ޗައިނާއެވެ. ނަމަވެސް ކޯވިޑާއެކު އެ ޤައުމުގައި އެޅި ރައްކާތެރިކަމުގެ ފިޔަވަޅުތަކާއެކު ދަތުރުފަތުރުގެ ދަތިކަން ކުރިމަތިވެ، މިވީ 2 އަހަރެއްހައި ދުވަހުގެ ތެރޭގައި ޗައިނާގެ ފަތުރުވެރިން ރާއްޖެ އައިސްފައެއްނުވެއެވެ.
ޕީއެސްއެމް ނިއުސްގެ "75 ޑިގްރީ" ޕްރޮގްރާމްގައި ވާހަކަދައްކަވަމުން ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ވާންގް ލިޖިން ވިދާޅުވީ، ޗައިނާގެ ފަތުރުވެރިން ތިބީ ރާއްޖެއައުމަށް ވަރަށްބޮޑަށް ބޭނުންވެފައިކަމަށެވެ. ޗައިނާގެ ކޯވިޑްގެ ޙާލަތު ރަނގަޅުވަމުން އަންނައިރު ވަރަށްއަވަހަށް ޗައިނާއާއި ރާއްޖެއާ ދެމެދު ދަތުރު ފެށިގެންދާނެކަމަށް އުންމީދުކުރައްވާކަމަށްވެސް ސަފީރު ވިދާޅުވިއެވެ.
ސަފީރު ވިދާޅުވީ، އޮން އެރައިވަލް ވިސާ ލިބޭނެ އިންތިޒާމް ރާއްޖެއާއި ޗައިނާއާ 2 ޤައުމުގެ ދެމެދުގައި ހަމަޖައްސާފައި އޮތުމަކީ ދެޤައުމުގެ ދެމެދުގައި އަލުން ދަތުރުތައް ފެށުމުން ރާއްޖެއަށް އަންނަ ޗައިނާ ފަތުރުވެރިންގެ އަދަދު އިތުރުވެގެންދާނެ މުހިންމު ސަބަބެއްކަމަށެވެ.
މީގެކުރިން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ޓޫރިޒަމް މިނިސްޓަރ ޑރ.ޢަބްދުﷲ މައުސޫމްވެސް ވިދާޅުވެފައިވަނީ ޗައިނާ ފަތުރުވެރިން ތިބީ ރާއްޖެ އަންނަހިތުން ކެތްމަދުވެފައި ކަމަށެވެ. ރާއްޖޭގެ ފަތުރުވެރިކަމުގެ ރަން އަހަރު ނިންމާލުމުގެ ކުރިން ޗައިނާގެ ފަތުރުވެރިން ކޮންމެވެސް ވަރަކަށް ރާއްޖެ އަންނާނެކަމަށް އުންމީދުކުރައްވާކަމަށް މިނިސްޓަރ ވަނީ ވިދާޅުވެފައެވެ.
ކޯވިޑާއެކު ރާއްޖެއަށް ޗައިނާއިން ފަތުރުވެރިން އައުން ހުއްޓިފައި އޮތްނަމަވެސް ކޯވިޑްގެ ކުރިން 2019ވަނަ އަހަރު ރާއްޖެއަށް އެންމެ ގިނައިން ފަތުރުވެރިން އައި ޤައުމަކީ ޗައިނާއެވެ. ތަފާސްހިސާބުތައް ދައްކާގޮތުން 2019ވަނަ އަހަރު ޗައިނާއިން ރާއްޖެއަށް 284،029 ފަތުރުވެރިން ވަނީ އައިސްފައެވެ.