ލާއޯސްއާ ދެކޮޅަށް ކުޅުމަށް ހަމަޖެހިފައިވާ ބައިނަލްއަގުވާމީ އެކުވެރިކަމުގެ މެޗަކީ ރަނގަޅު ޓީމެއް އެކުލަވާލަން ވަރަށް މުހިންމު މެޗެއް ކަމަށް ގައުމީ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފިއެވެ.
ބުރޫނާއީ ދާރުއްސަލާމުގައި ރާއްޖޭން އެކުވެރިކަމުގެ ދެ މެޗު ކުޅޭއިރު، ފުރަތަމަ މެޗުގައި މިދިޔަ ބުދަ ދުވަހު ގައުމީ ޓީމުން ވަނީ 3-0 ގެ ނަތީޖާއަކުން ބުރޫނާއީ ބަލިކޮށްފައެވެ.
ޒުވާން އައު ކުޅުންތެރިންނާއެކު ޓީމެއް ބިނާކުރަން މޮރިއޭރޯ މަސައްކަތް ކުރަމުން އަންނައިރު، ބްރޫނާއީ މެޗުގެ ފުރަތަމަ އެގާރައިގައި ސުޕަ ޔުނައިޓެޑް ސްޕޯޓްސް (ސަސް) ގެ ޒުވާން ޑިފެންޑަރު އަހުނަފް ރަޝީދު (އަހުއްކޮ) އަށް ވަނީ ފުރުސަތު ދީފައެވެ. މިއީ އަހުއްކޮ ރާއްޖޭގެ ގައުމީ ސީނިއާ ސްކޮޑުގައި ހިމެނިގެން ކުޅުނު ފުރަތަމަ މެޗެވެ. އެކަމަކު މެޗުގެ ފުރަތަމަ ހާފުގައި އަހުއްކޮއަށް ވަނީ އަނިޔާވެފައެވެ.
އަހުއްކޮގެ އިތުރުން މި ފަހަރު އެކުލަވާލި ސްކޮޑުން ނިޝާމް މުޙައްމަދު ރަޝީދު (ޕޮގްބާ)، އަޙްމަދު ބައްސާމް މުޙައްމަދު ނައީމް (ބައްކު) އަދި ގޯލްކީޕަރު އިޔާން އަބްދުލް އަލީމް (ޗިކީ) އަށްވެސް ވަނީ ފުރުސަތު ދީފައެވެ.
ލާއޯސް މެޗުގެ ކުރިން ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޮރިއޭރޯ ބުނީ އެންމެ ފަހުން ކުޅުނު މެޗުގައި ބުރޫނާއީ އަތުން ހޯދި މޮޅާއެކު އުފާކުރާ ކަމަށާއި، އެ މެޗަކީ ފަސޭހަ މެޗެއް ނޫން ކަމަށެވެ. އަދި މާދަމާގެ މެޗަކީ ވަރަށް މުހިންމު މެޗެއް ކަމަށާއި، ސަބަބަކީ ޒުވާން ކުޅުންތެރިންތަކަކާއެކު ކުރިއަށްދާއިރު، އެ ކުޅުންތެރިންނާއެކު ރަނގަޅު ޓީމެއް ބިނާކުރުމަށް މި މެޗުގެ ބޭނުން ހިފޭނެތީ ކަމަށެވެ.
ލާއޯސް ޓީމާ ގުޅޭ ގޮތުން މޮރިއޭރޯ ބުނީ އެ ޓީމުގައި ރަނގަޅު ކޯޗެއް ހުރިއިރު، އެ ޓީމުން ކުޅެނީ ރަނގަޅު ފުޓްބޯޅައެއް ކަމަށެވެ. އެހެންކަމުން އެންމެ މުހިންމީ ޓީމުގެ ކުޅުންތެރިންގެ ވިސްނުން ބަދަލުކުރުން ކަމަށާއި, ޓީމުގެ ހުރިހާ ކުޅުންތެރިންނާއި ސްޓާފުންވެސް އެކަމަށް ވަރަށް ބުރަކޮށް މަސައްކަތް ކުރާ ކަމަށްވެސް ވަނީ ބުނެފައެވެ.
އެކުވެރިކަމުގެ މެޗެއްގައި ލާއޯސް އާއި ރާއްޖެ ބައްދަލުކުރާއިރު، ލާއޯސް މި ވަގުތު އޮތީ ދުނިޔޭގެ ރޭންކިންގެ 183 ވަނައިގައެވެ. އަދި ރާއްޖެ އޮތީ 156 ވަނައިގައެވެ.
ލާއޯސްގެ ކޯޗު ޖަރުމަނުގެ މައިކަލް ވައިސް ބުނީ މިއީ މި އަހަރުގެ ޑިސެމްބަރު މަހު ބޭއްވުމަށް ހަމަޖެހިފައިވާ މުބާރާތަށް ތައްޔާރުވުމަށް ލިބޭ ރަނގަޅު ފުރުސަތެކެވެ. އަދި ލާއޯސް ޓީމަކީ ޒުވާން ޓީމެއް ކަމަށާއި އަދި އެ ކުޅުންތެރިންނަކީ ޓީމުގެ މުސްތަގުބަލު ކަމުން، އެންމެ ބޮޑަށް ފޯކަސް ކުރަނީ އެ ކުޅުންތެރިންނަށް ކަމަށްވެސް ބުންޏެވެ.
ވައިސް ބުނީ ލާއޯސްއަކީ ރޭންކިންގައި ދަށް ޓީމަކަށް ވެދާނެ ކަމަށާއި، އެކަމަކު ޓީމުގައި ގިނަ ހުނަރުތަކެއް އެބަހުރި ކަމަށެވެ. އެހެންކަމުން މަސައްކަތް ކުރަނީ އެ ކުޅުންތެރިންނާއެކު ރަނގަޅު ނަތީޖާތަކެއް ނެރުމަށް ކަމަށްވެސް ވަނީ ބުނެފައެވެ.
ބައިނަލްއަގުވާމީ އެކުވެރިކަމުގެ މެޗެއްގައި ލާއޯސްއާ ދެކޮޅަށް ރާއްޖެ ނުކުންނައިރު، މި މެޗު ކުޅުމަށް ހަމަޖެހިފައިވަނީ ހޮނިހިރު ދުވަހު ރާއްޖެ ގަޑިން 13:00 ގައެވެ.