މަރާމާތަށްފަހު އަނަންތާރާ ވެލި މޯލްޑިވްސް ރިސޯޓު އަލުން ހުޅުވުމަށް ތައްޔާރުވެއްޖެއެވެ.
9 މަސް ދުވަސްވަންދެން ބަންދުކޮށްފައި އޮތުމަށްފަހު ރިސޯޓު އަލުން ހުޅުވާލުމަށް ހަމަޖެހިފައިވަނީ ޑިސެމްބަރުމަހުގެ 1ވަނަ ދުވަހުއެވެ.
މާލެ އަތޮޅުގައި ތަރައްޤީކޮށްފައިވާ އަނަންތާރާ ވެލި މޯލްޑިވްސް ރިސޯޓު އަލުން ހުޅުވާލާއިރު، އެ ރިސޯޓުން ބޮޑެތި ބަދަލުތަކެއް ފެނިގެންދާނެއެވެ. އެގޮތުން އާ ބީޗް ޕޫލް ވިލާތަކާއި، ރެސްޓޯރެންޓާއި ސްޕާއަށް ވެސް ބޮޑެތި ބަދަލުތަކެއް ވަނީ ގެނެސްފައެވެ. އަދި ރިސޯޓުގެ ހުރިހާ ވިލާތަކެއްވެސް ވަނީ ރިނޮވޭޓުކޮށްފައެވެ.
ޕްރައިވެޓް ޕޫލަކާއެކު ހަދާފައިވާ، ބީޗު ޕޫލް ވިލާތަކުގައި ވިލާ ހޮސްޓެއްގެ ޙިދުމަތްވެސް ލިބެއެވެ. އަނަންތާރާ ވެލީގައި ވަނީ މިފަދަ 6 ވިލާ ތަރައްޤީކޮށްފައެވެ.
67 ކޮޓަރީގެ އަނަންތާރާ ވެލި ރިސޯޓު އަލުން ހުޅުވިގެންދާ އިރު، ދޮޅަހެޔޮ ސިއްހަތަށް ބާރު އެޅުމުގެ ގޮތުން ރިސޯޓަށްގިނަ ބަދަލުތަކެއް ގެނައުމަށްވަނީ ހަމަޖެހިފައެވެ. އެގޮތުން ސްޕާއިން ދޭ ޙިދުމަތްތައް އިތުރުކޮށް، ރިސޯޓަށް ބޭނުންވާ ތަރުކާރީ ފޯރުކޮށްދިނުމަށް ހައިޑްރޯފޯނިކް ފާމެއްވެސް ރިސޯޓުގައި ތަރައްޤީކުރުމަށްވަނީ ހަމަޖެހިފައެވެ.