ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރިއަށްގެންދިއުމަށް ހަމަޖެހިފައިވާ ކަނޑުއަޑީގެ ފޮޓޯ ނެގުމުގެ މުބާރާތުގައި ބައިވެރިވުމުގެ މުއްދަތު އިތުރުކޮށްފިއެވެ.
އެގޮތުން ފޮޓޯ ނެގުމުގެ މުބާރާތުގައި، ބައިވެރިވުމުގެ ފުރުސަތު އެންމެ ފުރަތަމަ ހުޅުވާލީ މިމަހުގެ 27ވަނަ ދުވަހުގެ ނިޔަލަށެވެ. އެހެންނަމަވެސް ގިނަ ޢަދަދެއްގެ ފަރާތްތަކަށް މި މުބާރާތުގައި ބައިވެރިވުމުގެ ފުރުސަތު ފަހިކޮށްދިނުމަށް މުއްދަތު ވަނީ އަންނަ މަހުގެ 21ވަނަ ދުވަހުގެ ނިޔަލަށް އިތުރުކޮށްފައެވެ.
މިމަހުގެ 5ވަނަ ދުވަހު ޒޫމް މެދުވެރިކޮށް ބޭއްވި މިރަސްމިއްޔާތުގައި ފޮޓޯ ނެގުމުގެ މުބާރާތުގެ ރެޖިސްޓްރޭޝަން ފަށައިދިނީ ރާއްޖޭގެ އެންމެ ތަޖުރިބާކާރު ޑައިވަރުންގެ ތެރޭގައި ހިމެނޭ، ހުސެން ރަޝީދު (ސެންޑީ)އެވެ. ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ޓޫރިޒަމް މިނިސްޓްރީން ކުރިއަށްގެންދާ ޑައިވް ފޮޓޯ ޝޫޓް ހަރަކާތް ކުރިއަށްގެންދަނީ އޯޝަން ޖިއޮގްރަފިކްއާއި، މަޑޯއާއި ގުޅިގެންނެވެ.
އޯޝަން ޖިއޮގްރަފިކްއިން ބުނެފައިވަނީ ކޮންމެ ރެޖިސްޓްރޭޝަނަކަށް 5 ފޮޓޯ ހުށަހެޅުމުގެ ފުރުސަތު އޮންނާނެ ކަމަށެވެ. ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރިއަށްގެންދާ "50 ބެސްޓް ސައިޓް" ހަރަކާތުގެ ތެރެއިން ރާއްޖޭގައި ހުރި އެންމެ ގުދުރަތީ މުއްސަނދި ފަރުތައް މުޅި ދުނިޔެއަށް ދައްކާލާނެއެވެ.
މި ހަރަކާތުގައި ބައިވެރިވާ ފޮޓޯގްރަފަރުން ނަގާ ފޮޓޯތައް އެކަމަށް ޚާއްސަކޮށްފައިވާ ޕެނަލަކުން ބެލުމަށްފަހުގައި ވަނަވަނައަށް ހޮވޭ ފަރާތްތައް އިއުލާންކުރާނެއެވެ. އެ ފަރާތްތައް އިއުލާންކުރުން އޮންނާނީ އޮކްޓޯބަރ 5ވަނަ ދުވަހުއެވެ.