މުއިފާގެ ނަން ދީފައިވާ ބާރުގަދަ ތޫފާން ޗައިނާގެ އިރުމަތީގެ ސަރަޙައްދުތަކަށް އެރުމުގެ ސަބަބުން ބޮޑެތި ގެއްލުންތަކެއް ލިބިއްޖެއެވެ. މި ތޫފާނުގެ އަސަރު އެންމެ ބޮޑަށް ކޮށްފައި ވަނީ ޗައިނާގެ ވިޔަފާރީގެ މަރުކަޒީ ރަށް ޝެންގްހާއީއަށެވެ. ތޫފާނާ ގުޅިގެން 25 މިލިޔަން މީހުންގެ އާބާދީއެއް އޮންނަ އެ ސިޓީގެ 1.6 މިލިޔަނަށް ވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުވެފައެވެ.
މީގެ ތެރެއިން 1.2 މިލިޔަން މީހުން ގެންގޮސްފައި ވަނީ ޝެންގްހާއީއާ އިންވެގެން އޮތް ޒޭޖިއާންގ ޕުރޮވިންސުގައި ޤާއިމު ކޮށްފައިވާ ވަގުތީ ހިޔާތަކަށެވެ. މިއީ، 1949 ވަނަ އަހަރު މަޢުލޫމާތު ރައްކާކުރަން ފެށި ފަހުން ޝެންގްހާއީއަށް އަރާފައިވާ އެންމެ ބާރުގަދަ ތޫފާން ކަމުގައި ޗައިނާގެ މީޑިޔާތަކުން ރިޕޯޓު ކުރެއެވެ.
މި ތޫފާނާ އެކު ބޯކޮށް ވާރޭވެހުމުގެ ސަބަބުން ޔެންގްޒީ ކޯރު ފުރިގެން ބަންޑުންވެ، ޝެންގްހާއީގެ ބައެއް ސަރަޙައްދުތަކުގައި ވަނީ ފެންބޮޑުވެފައެވެ. ނަމަވެސް، ތޫފާނާ ގުޅިގެން ހިނގި އެއްވެސް ހާދިސާއެއްގައި އެއްވެސް މީހެއްގެ ފުރާނައަށް ގެއްލުންވި ކަމުގެ ރިޕޯޓެއް ކޮށްފައެއް ނެތެވެ.
މި ތޫފާނާ އެކު އެ ސަރަޙައްދުގެ ކަނޑުތައް ވެސް ވަނީ ގަދަވެފައެވެ. އަދި، ޝެންގްހާއީގެ ދެކުނުގައި އޮންނަ ހާންގްޒޫ ކަނޑުގެ އައްސޭރިފަށުގެ ސަރަޙައްދުތަކަށް ބިޔަ ރާޅުތައް ބިންދައިލާފައިވެއެވެ. މި ތޫފާނާ އެކު 125 ކިލޯމީޓަރުގެ ބާރުމިނުގައި ވައި ޖެހެމުންދާއިރު، ޝެންގްހާއީގައި ވައިގެ އުދުހުންތައް ވެސް ވަނީ މެދުކަނޑައިލާފައެވެ.
އަދި، ޝެންގްހާއީގެ އިތުރުން އެ ސިޓިއާ އިންވެގެން އޮންނަ ނިންގްބޯގެ ބަނދަރުތައް ވެސް ވަނީ ބަންދުކޮށްފައެވެ. އޭގެ ތެރޭގައި ދުނިޔޭގެ އެންމެ ބޮޑު ކޮންޓެއިނަރ ބަނދަރުތައް ހިމެނެއެވެ. ޝެންގްހާއީގެ އިތުރުން މި ތޫފާނުގެ އަސަރު ޒޫޝާންއާއި ޒެޖިއާންގއަށް ވެސް ވަނީ ކޮށްފައެވެ.
ހުސްވި ހަފުތާގައި ވެސް އެ ސަރަޙައްދަށް ބާރުގަދަ ތޫފާނެއް އަރާފައިވެއެވެ. ތޫފާން ހިންނަމޫރުގެ ސަބަބުން ޝެންގްހާއީއާއި، އެ ސިޓީއާ އިންވެގެން އޮންނަ ޒެޖިއާންގގެ ސްކޫލުތަކާއި އޮފީސްތައް ބަންދު ކުރަން ޖެހުނެވެ. އަދި، ފެރީގެ ދަތުރުތައް މެދުކަނޑައިލަން ޖެހުނެވެ. މުއިފާއަކީ މި އަހަރުގެ ތެރޭގައި ޗައިނާގެ ސަރަޙައްދުތަކަށް އަރާފައިވާ 12 ވަނަ ތުފާނެވެ.