ޔޫކްރެއިނުގެ މައްސަލާގައި ޗައިނާއިން ގެންގުޅޭ ވަކިފަރާތަކަށް ނުޖެހޭ ސިޔާސަތަށް ރަޝިޔާގެ ތަޢުރީފު
ޔޫކްރެއިނު ހަނގުރާމައާ ގުޅޭ މައްސަލައިގައި ޗައިނާގެ ރައީސް ޝީ ޖިންގްޕިން ގެންގުޅުއްވާ ވަކި ފަރާތަކަށް ނުޖެހުމުގެ ސިޔާސަތަށް ރަޝިޔާގެ ރައީސް ވްލަޑިމިއަރ ޕުޓިން ތަޢުރީފު ކުރައްވައިފިއެވެ. ފެބުރުވަރީ 24 ގައި ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން ޝީއާއި ޕުޓިން މި ވަނީ ފުރަތަމަ ފަހަރަށް ބައްދަލު ކުރައްވާފައެވެ.
މި ބައްދަލުވުން ބާއްވާފައި ވަނީ އުޒްބެކިސްތާނުގެ ސަމަރުކަންދުގައި ފަށައިގެން ކުރިއަށްދާ ޝެންގްހާއީ ކޯޕޮރޭޝަން އޮގަނައިޒޭޝަން (އެސް.ސީ.އޯ) ސަމިޓުގެ ހަވާސާގައެވެ. މި ބައްދަލު ކުރެއްވުމުގައި މޮންގޯލިޔާގެ ރައީސް އުޚްނާ ޚުރެލްސުކް ވެސް ބައިވެރިވެ ވަޑައިގެންނެވިއެވެ.
މި ބައްދަލުވުމުގައި ވާހަކަފުޅު ދައްކަވަމުން ޕުޓިން ވިދާޅުވީ، ރަޝިޔާ ސިފައިން ޔޫކްރެއިނަށް އަރައި ފަށާފައިވާ ހަނގުރާމައާ ގުޅޭ ގިނަ ސުވާލުތަކެއް ޝީގެ ހުންނާނެ ކަމަށާއި، އޭނާ ކަންބޮޑުވެ ވަޑައިގަންނަވާ ގިނަ ކަންތައްތަކެއް ހުންނާނެ ކަމަށް ޤަބޫލުފުޅު ކުރައްވާ ކަމުގައެވެ. އަދި، މި ހަނގުރާމައިގައި ވަކި ފަރާތަކަށް ނުޖެހުމަށް ޝީ ގެންގުޅުއްވާ ސިޔާސަތައް ތަޢުރީފު ކުރައްވާ ކަމުގައެވެ.
"މި ކަމުގައި ޗައިނާއިން ގެންގުޅޭ ވަކި ފަރާތަކަށް ނުޖެހުމުގެ ސިޔާސަތު ބަލައިގަންނަން. އަދި އެ ކަމަށް އިޙުތިރާމު ކުރަން،" ޕުޓިން ވިދާޅުވިއެވެ. މި ބައްދަލުވުމުގައި ޕުޓިންއަށް ޝީ މުޚާތަބު ކުރައްވާފައި ވަނީ "ޒަމާންވީ އެކުވެރިޔާ"އޭ ވިދާޅުވެއެވެ. ނަމަވެސް، ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުން، ޔޫކްރެއިނުގެ މައްސަލައަށް ޝީ އަލިއަޅުއްވައިލައްވާފައެއް ނުވެއެވެ.