މީހުން ދިރިއުޅޭ ރަށްރަށުން ފަތުރުވެރިކަމަށް، ކަނޑައަޅާ ބިންތައް ފާސްކޮށްދިނުމުގެ މަސައްކަތްތައް ހަލުވި ދުވެއްޔެއްގައި ކުރިއަށް ގެންދިޔުމަށް އިންތިޒާމްތަކެއް ހަމަޖެހިފައިވާކަމަށް ޓޫރިޒަމް މިނިސްޓަރ ޑރ.އަބްދުﷲ މަޢުސޫމް ވިދާޅުވެއްޖެއެވެ.
ވިއަވަތި ރާއްޖެ ކޮންފަރެންސްގައި ވާހަކަދައްކަވަމުން ޓޫރިޒަމް މނިސްޓަރ ޑރ.ޢަބްދުﷲ މަޢުސޫމް ވިދާޅުވީ، ޓޫރިޒަމްގެ ގާނޫނުގެ ދަށުން، ރައީސުލްޖުމްހުރިއްޔާއަށް، ލިބިދީފައިވާ ބާރުގެ ދަށުން، ފަތުރުވެރިކަމަށް ކަނޑައަޅާ ބިންތައް ކަނޑައަޅައިދިނުމަށް އެދި ޓޫރިޒަމް މިނިސްޓްރީއަށް ފޮނުވާ ހުށަހެޅުންތައް ރައީސް އޮފީހުން "ފާސްޓް ޓްރެކް" ގައި ފާސްކޮށްދޭނެ ކަމަށެވެ.
" ޓޫރިޒަމްގެ ޤާނޫނުން ރައީސްއަށް ލިބިދީފައިވާ ބާރުގެ ދަށުން، ޓޫރިޒަމަށް ކަނޑައަޅާ ބިން، ޗާޓުކޮށްފައި ޓޫރިޒަމް މިނިސްޓްރީއަށް ފޮނުވީމައި، ރައީސް އޮފީހުން ޕްލޭނިންގ މިނިސްޓްރީއާ މަޝްވަރާކޮށްގެން ފާސްޓު ޓްރެކްގައި ފާސްކުރާގޮތަށްވަނީ ނިންމާފައި، އެއީ ވަރަށް ބޮޑު ކުރިއެރުމެއް،" ޑރ.މަޢުސޫމް ވިދާޅުވިއެވެ.
މިނިސްޓަރ ޑރ.މައުސޫމް ވަނީ ލޭންޑު ޔޫސް ޕްލޭން ހަދާއިރު، ތިމާވެށްޓާއި އިޤްތިސާދީ އަދި އިޖްތިމާއީ ކަންތައްތަކަށް އިސްކަން ދިނުމަށް އެދިވަޑައިގެންފައެވެ. އަދި މީގެއިތުރުން ޓޫރިޒަމަށް ދޫކުރަން ރަށްރަށުން ކަނޑައަޅާ ބިންތަކަށް ލޭންޑު ރެންޓު ކަނޑައެޅުމުގެ އިޚްތިޔާރު ކައުންސިލްތަކަށް އޮންނައިރު، އަގެއް ކަނޑައެޅުމުގައި އިންވެސްޓަރުންނަށް ފަހި އަގުތަކެއް ކަނޑައެޅުން މުހިންމު ކަމަށް މިނިސްޓަރ ވިދާޅުވިއެވެ.
"ލޭންޑު ރެންޓް ކަނޑައެޅުމުގައި ކައުންސިލްތަކަށް އަމިއްލަ ދައުރު އޮންނާނެ، އެކަމަކު ވިސްނަން ވާނެ، މިއީ ވާދަވެރިކަމަށް، މުޅި ރާއްޖޭގައި ގެސްޓުހައުސް ހަދަމުންދާއިރު، އިންވެސްޓަރުން ބަލާނެ އެންމެ ފަހީ ކޮންރަށެއްތޯ،" މިނިސްޓަރ މައުސޫމް ވިދާޅުވިއެވެ.
ލާމަރުކަޒީ ޤާނޫނުގެ ދަށުން ލޭންޑް ޔޫސް ޕްލޭން، ހެދުން ކައުންސިލްތަކަށް ލާޒިމްކުރެއެވެ. އެޤާނޫނުގައި ބަޔާންކުރަނީ، ކައުންސިލްތަކުގެ އިންތިޚާބަށްފަހު އިންތިޚާބުކުރެވޭ މެންބަރުން މަޤާމާ ޙަވާލުވުމަށްފަހު 3 މަސްދުވަހުގެ ތެރޭގައި، އަތޮޅު ކައުންސިލުން ފޯރުކޮށްދޭ ފަންނީ އެހީތެރިކަމާއެކު، އެރަށެއްގެ ތަރައްޤީގެ ޕްލޭނާއި ލޭންޑްޔޫސް ޕްލޭން ކޮންމެ ރަށެއްގެ ރަށު ކައުންސިލުން އެކުލަވާލަންވާނެކަމަށެވެ.