އިނގިރޭސި ދައުލަތަށް ޚިދުމަތް ކުރުމުގައި "ތެދުވެރިކަމާއި، އިޙުތިރާމާއި ލޯތްބާ" އެކު ދެމިހުންނަވާނެ ކަމުގައި އިނގިރޭސި ވިލާތާއި ކޮމަންވެލްތުގެ ރަސްގެފާނު ޗާލްސް ތިންވަނަ ވިދާޅުވެއްޖެއެވެ. ރަސްގެފާނު މިހެން ވިދާޅުވެފައި ވަނީ ޤައުމާ މުޚާތަބު ކުރައްވައި ފުރަތަމަ ފަހަރަށް ދެއްވި ތަޤުރީރުގައެވެ. އިނގިރޭސި ވިލާތުގެ ތަޚުތައް ރަސްގެފާނު ޗާލްސް އިސް ކުރެވުނީ މަންމާފުޅު ރާނީ އެލިޒަބަތު ދެވަނަ އަވަހާރަވުމާ ގުޅިގެންނެވެ.
ރާނީ އަވަހާރަވުމަކީ މުޅި ދައުލަތަށް ލިބުނު "މިން ނުކުރެވޭ ފަދަ ފުން ހިތާމައެއް" ކަމުގައި ރަސްގެފާނު ސިފަ ކުރެއްވިއެވެ. އިނގިރޭސި ވިލާތުގައި އެންމެ ދިގު މުއްދަތެއް ވަންދެން ރަނިކަން ކުރެއްވި ރާނީ އެލިޒަބަތު އަވަހާރަވީ ސެޕްޓެންބަރު މަހުގެ 8 ވަނަ ދުވަހު ސެކޮޓްލެންޑުގެ ބެލްމޯރަލް ގަނޑުވަރުގައެވެ. އެ ކަމަނާގެ އުމުރުފުޅަކީ 96އެވެ.
ރާނީ އަވަހާރަވުމާ ގުޅިގެން އިނގިރޭސި ދައުލަތުގެ އިތުރުން ކޮމަންވެލްތުގެ 14 ސަރަޙައްދެއްގެ ދައުލަތްތަކުގެ އެންމެ މަތީ ވެރިއަކީ މިހާރު ރަސްގެފާނު ޗާލްސްއެވެ. އެ ޤައުމުތަކުގެ ތެރޭގައި އޮސްޓްރޭލިޔާ، ކެނެޑާ، ޖެމެއިކާ، ނިއު ޒިލެންޑު އަދި ޕަޕުއާ ނިއުގިނީ ހިމެނެއެވެ.
"ރާނީ އަވަހާރަވީ ވަރަށް ވެސް ފުރިހަމަ ހަޔާތަކަށް ފަހު. ރާނީ އަވަހާރަވުމުގެ ހިތާމައިގައި މުޅި ދުނިޔެ ދަނީ ބައިވެރިވަމުން. ރާނީއެކޭ އެއް ފަދައިން، އަހުރެންގެ މުޅި ހަޔާތް ވެސް ޤައުމީ ޚިދުމަތުގައި ހޭދަ ކުރުމުގެ ވަޢުދު އަހުރެން ވެސް އައު ކުރަން،" އުމުރުފުޅުން 73 އަހަރުގެ ރަސްގެފާނު ޗާލްސް ވިދާޅުވިއެވެ.
ރާނީ ވެސް ވަނީ އެ މޭރުމުން ވަޢުދުވެ ވަޑައިގަންނަވާފައެވެ. އެއީ، 1947 ވަނަ އަހަރެވެ. ރާނީގެ އުމުރުފުޅުން އެންމެ 21 އަހަރެވެ. "އެއީ ނަމެއްގައި ރާނީ ވެވަޑައިގެންނެވި ވަޢުދެއް ނޫން. އެއީ، ޤައުމަށް ޚިދުމަތް ކުރުމުގައި ދެމިހުންނެވުމަށް ކަނޑައެޅުއްވި ވަރުގަދަ އަޒުމެއް. އަދި، އެ އަޒުމުގެ މަތީގައި ގިނަގުނަ ޚިދުމަތްތަކެއް ކުރައްވައި، ގިނަގުނަ ޤުރުބާނީތަކެއް ކުރެއްވި،" ރަސްގެފާނު ވިދާޅުވިއެވެ.
މީގެ އިތުރުން، ދަރިކަލުން ވިލިޔަމްއަށް ވަލީއަޙުދުގެ ލަޤަބު ކަމުގައިވާ ޕްރިންސް އޮފް ވޭލްސްގެ ލަޤަބު އަރުވާފައިވާ ކަން ވެސް ރަސްގެފާނު އިޢުލާނު ކުރެއްވިއެވެ. އެއާއެކު، ވަލީއަޙުދުގެ އަނބިކަނބަލުން ކޭޓްއަށް ވެސް ވަނީ ޕްރިންސަސް އޮފް ވޭލްސްގެ ލަޤަބު ލިބިފައެވެ. މިއީ، ރަސްގެފާނުގެ ކުރީގެ އަނބިކަނބަލުން ލޭޑީ ޑަޔާނާ ސްޕެންސަރއަށް ފަހު އެ ލަޤަބު ލިބިވަޑައިގެންނެވި ފުރަތަމަ ބޭފުޅާއެވެ.
ޗާލްސްއަކީ އިނގިރޭސި ވިލާތާއި ކޮމަންވެލްތުގެ ރަސްގެފާނު ކަމުގައި ރަސްމީ ހައިސިއްޔަތުން ކަނޑައަޅާނީ ސެޕްޓެންބަރު 10 ވަނަ ދުވަހު އިނގިރޭސި ވިލާތުގެ އެކްސެޝަން ކައުންސިލުން ބާއްވާ ޚާއްޞަ ރަސްމިއްޔާތެއްގައެވެ. މި ރަސްމިއްޔާތު އޮންނާނީ ސެއިންޓް ޖޭމްސް ގަނޑުވަރުގައެވެ. އަދި، އެއަށްފަހު އައު ރަސްގެފާނަކީ ޗާލްސްއަށް ރަސްމީކޮށް އިޢުލާނު ކުރާނެއެވެ.
އެކްސެޝަން ކައުންސިލަކީ 650 މެންބަރުންގެ މައްޗަށް އެކުލެވިގެންވާ މުޝީރުންގެ ކައުންސިލެކެވެ. މި ކައުންސިލުގައި ހިމެނި ވަޑައިގަންނަވާ މެންބަރުންގެ ތެރޭގައި ބޮޑުވަޒީރު ލިޒް ޓްރަސް ވެސް ހިމެނި ވަޑައިގަންނަވައެވެ. މީގެ އިތުރުން، ރަސްގެފާނު ދައުލަތުގެ އެންމެ މަތީ ވެރިޔާގެ މަޤާމު ފުރުއްވާ ކޮމަންވެލްތުގެ 14 ސަރަޙައްދެއްގެ މަންދޫބުން ވެސް އެ ކައުންސިލުގައި ހިމެނި ވަޑައިގަންނަވައެވެ.