ޔަހޫދީ އިސްރާޢީލުން ސޫރިޔާއަށް ދެމުންދާ ވައިގެ ހަމަލާތަކަކީ ހަނގުރާމައިގެ އަމަލުތަކެއްގެ ގޮތުގައި ބަލާ ކަމަށް ބުނެ، ސޫރިޔާގެ ޚާރިޖީ ވުޒާރާއިން އިސްރާޢީލަށް އިންޒާރު ދީފިއެވެ. ޔަހޫދީންގެ އަސްކަރީ މަތިންދާބޯޓުތަކުން ސޫރިޔާއަށް އެންމެ ފަހުން ދީފައިވާ ހަމަލާތައް އަމާޒުކޮށްފައި ވަނީ ޙަލަބުގެ ބައިނަލްއަޤްވާމީ އެއަރޕޯޓުގެ ޓަރމިނަލް ޢިމާރާތާއި ރަންވޭއަށެވެ.
މި ހަމަލާތަކުގައި އެއަރޕޯޓަށް ބޮޑެތި ގެއްލުންތަކެއް ލިބި، ވައިގެ އުދުހުންތައް ހުއްޓައިލަން ޖެހުނެވެ. އަދި، އެއަރޕޯޓުގެ ޚިދުމަތްތަކަށް ބުރޫއެރިއެވެ. މިއީ ހުސްވި ހަފުތާގެ ތެރޭގައި ޔަހޫދީންގެ އަސްކަރީ މަތިންދާބޯޓުތަން ޙަލަބު އެއަރޕޯޓަށް ހަމަލާ ދީފައިވާ ދެވަނަ ފަހަރު ކަމުގައި ސޫރިޔާގެ ޚާރިޖީ ވުޒާރާއިން ބުނެއެވެ.
"އިސްރާޢީލުގެ އަސްކަރިއްޔާއިން ދޭތެރެދޭތެރެއިން ދަނީ ވައިގެ ހަމަލާތައް ދެމުން. މި ހަމަލާތައް އަމާޒު ކުރަނީ ޢާންމުން ދިރިއުޅޭ ސަރަޙައްދުތަކަށް. އެންމެ ފަހުން ހަމަލާ ދީފައި ވަނީ ޙަލަބު އިންޓަރނޭޝަނަލް އެއަރޕޯޓަށް. ބައިނަލްއަޤުވާމީ ޤާނޫނުތަކުން ބަލާއިރު މި ހަމަލާތަކަކީ ހަނގުރާމައިގެ އަމަލުތަކެއް،" ސޫރިޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވެއެވެ.
ސޫރިޔާގެ އެއަރޕޯޓުތަކަށް ހަމަލާ ދީފައި ވަނީ ޔަހޫދީ އިސްރާޢީލުގެ އަސްކަރީ މަތިންދާބޯޓުތަކުން ކަން އެ ޤައުމުން އެއްބަސްވެފައެއް ނުވެއެވެ. ނަމަވެސް، ސޫރިޔާއާއި ލުބުނާނުގައި ހަރަކާތްތެރިވާ ހަނގުރާމަވެރި ޖަމާޢަތްތަކަށް ހަތިޔާރާއި އެހެނިހެން ސާމާނު ފޯރުކޮށްދޭން އީރާނުން ސޫރިޔާގެ އެއަރޕޯޓުތައް ބޭނުން ކުރަމުންދާ ކަމުގައި ޔަހޫދީން ތުހުމަތު ކުރެއެވެ.
"މިއީ ސޫރިޔާގެ ރައީސް ބައްޝާރުލް އަސަދަށް ދޭ އިންޒާރެއް. ބޭނުމަކީ، އެއަރޕޯޓުތައް ބޭނުން ކުރުމަށް އީރާނަށް ފުރުޞަތު ދިނުން ހުއްޓުވުން. އީރާނުން ހަތިޔާރު ބަރުކޮށްގެން ދަތުރު ކުރާ މަތިންދާބޯޓުތަކަށް ސޫރިޔާގެ އެއަރޕޯޓުތަކުގައި ޖައްސަން މަސައްކަތް ކުރާ ނަމަ، އެ އެއަރޕޯޓުތަކަށް ގެއްލުން ލިބޭނެ،" ޔަހޫދީ އިސްރާޢީލުގެ ޤާނޫނު ހަދާ މަޖިލީހުގެ މެންބަރެއް ކަމުގައިވާ ރާމް ބެން-ބަރާކް ބުންޏެވެ.