އިންޑިއާގެ އިތުރު 2 ސިޓީއަކާއި ރާއްޖެއާއި ދެމެދު ޝެޑިއުލް ދަތުރުތައް ފަށަން އިންޑިގޯއިން ތައްޔާރުވެއްޖެއެވެ. އިންޑިގޯއިން ދަތުރު ފެށުމަށް ހަމަޖެހިފައިވަނީ ޗެންނާއީއާއި ހައިދަރުއާބާދުންނެވެ.
އިންޑިގޯއިން ބުނީ ނޮވެމްބަރ 1 ވަނަ ދުވަހުން ފެށިގެން ޗެންނާއީ އާއި ހައިދަރުއާބާދުން ރާއްޖެއަށް ޝެޑިއުލް ދަތުރު ފެށުމަށް ހަމަޖެހިފައިވާކަމަށެވެ. ޗެންނާއީން މާލެއަށް ދަތުރުކުރާނީ އަންގާރަ، ބުރާސްފަތި އަދި ހޮނިހިރު ދުވަހުއެވެ.
ހައިދަރުއާބާދުން ރާއްޖެއަށް ދަތުރު ކުރާނީ ހޯމަ، ބުދަ، ހުކުރު އަދި އާދިއްތަ ދުވަހުއެވެ. ކޯވިޑް-19 އަށްފަހު އިންޑިގޯގެ ދަތުރުތައް ރާއްޖެއަށް ފަށާފައިވަނީ 2020 ވަނަ އަހަރުގެ ސެޕްޓެމްބަރު މަހުއެވެ.
އިންޑިގޯއިން މިހާރު ދަނީ ބެންގަލޫރާއި މުންބާއިން ރާއްޖެއަށް ޝެޑިއުލް ދަތުރުތައް ކުރަމުންނެވެ. އިންޑިގޯއިން ރާއްޖެއަށް ޝެޑިއުލް ދަތުރުތައް ފުރަތަމަ ފަށާފައިވަނީ 2018 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހުއެވެ.
އިންޑިއާއަކީ ރާއްޖެއަށް މިހާރު އެންމެ ގިނައިން ފަތުރުވެރިން އަންނަ ޤައުމެވެ. އިންޑިއާގެ އިތުރު ސިޓީތަކުން ރާއްޖެއަށް ދަތުރު ފެށުން ވެގެންދާނީ ރާއްޖެ އަންނަ ފަތުރުވެރިންގެ އަދަދު އިތުރުވެދާނެ ސަބަބަކަށެވެ. އަދި އިންޑިއާއަކީ ދިވެހިން ބޭސްފަރުވާއަށާއި، ޗުއްޓީއަށް އަދި އެނޫންވެސް ބޭނުންތަކަށް ދަތުރުކުރާ ޤައުމެއްވެސްމެއެވެ. އެހެންކަމުން މި ދަތުރުތަކުގެ ސަބަބުން ދިވެހިންނަށްވެސް ގިނަ ފައިދާތަކެއް ލިބިގެންދާނެއެވެ.