ރަޝިޔާއިން ވިލާތުގެ ޤައުމުތަކަށް ގޭސް ވިއްކުން ހުއްޓައިލީ ހުޅަނގުގެ ޤައުމުތަކުގެ އަމަލުތަކުގެ ސަބަބުން ކަމުގައި ތުރުކީ ވިލާތުގެ ރައީސް ރަޖަބު ތައްޔިބު އުރުދުޣާން ތުހުމަތު ކުރައްވައިފިއެވެ. ރަޝިޔާއިން ވިލާތުގެ ޤައުމުތަކަށް ޤުދުރަތީ ގޭސް ފޯރުކޮށްދެނީ ނޯޑް ސްޓްރީމް ހޮޅި މެދުވެރިކޮށެވެ. މި ހޮޅި ގުޅެނީ ޖަރުމަނު ވިލާތާއެވެ.
ހޮޅީގެ މަރާމާތުތަކެއް ކުރުމަށް ކަމުގައި ބުނެ، ހުސްވި ހަފުތާގައި ރަޝިޔާއިން ވަނީ ހޮޅި ބަންދުކޮށްފައެވެ. އަދި، ކުރިން ހަމަޖެހިފައި އޮތީ މަރާމާތުތައް ނިންމުމަށް ފަހު ސެޕްޓެންބަރު 3 ވަނަ ދުވަހު ހޮޅި އަލުން ހުޅުވައި، ވިލާތުގެ ޤައުމުތަކަށް ގޭސް ފޯރުކޮށްދޭން ފެށުމަށެވެ. ނަމަވެސް، ރަޝިޔާއިން ވަނީ ހޮޅި އަލުން ހުޅުވަން ދެކޮޅު ހަދައި، ވިލާތުގެ ޤައުމުތަކަށް ގޭސް ފޯރުކޮށްދިނުން މުއްދަތެއް ނެތް ގޮތުގައި މެދުކަނޑައިލާފައެވެ.
މި ކަމާ ގުޅޭ ގޮތުން އުރުދުޣާން ވިދާޅުވީ ރަޝިޔާއިން އަމަލު ކުރި ގޮތާ މެދު ވަކި ފަރާތަކަށް ބުރަވާން ބޭނުން ނުވާ ކަމުގައެވެ. ނަމަވެސް، ރަޝިޔާއިން އެ ގޮތަށް އަމަލު ކޮށްފައި ވަނީ ހުޅަނގުގެ ޤައުމުތަކުގެ އަމަލުތަކާއި ބަސްމަގު ބަހައްޓަމުންދާ ގޮތުން ކަމުގައި އޭނާ ވިދާޅުވިއެވެ.
"އަހަރެން އެއްވެސް ޤައުމެއްގެ ނަން ފާހަގަކުރާ ކަށް ނެތީމު. ނަމަވެސް، ހުޅަނގުގެ ޤައުމުތަކުން ބަސްމަގު ހުރީ، އަދި އަމަލުތައް ހުރީ އެންމެ ރަނގަޅަކަށް ނޫން. ރަޝިޔާއިން ވިލާތަށް ގޭސް ވިއްކުން ހުއްޓައިލާފައި ވަނީ އެ ސަބަބާ ހުރެ ކަމަށް ޤަބޫލު ކުރަނީ،" އުރުދުޣާން ވިދާޅުވިއެވެ.
ރަޝިޔާއާއި ޔޫކްރެއިނަކީ ތުރުކީ ވިލާތާ ވަރަށް ގާތް ގުޅުމެއް ބާއްވާ ދެ ޤައުމު ކަން ފާހަގަ ކުރައްވައި އުރުދުޣާން ވިދާޅުވީ، އެ ދެ ޤައުމުގެ ދެމެދުގައި ހިނގާ ހަނގުރާމައިގައި ތުރުކީ ވިލާތުން އިސް ކުރާނީ މެދުމިނުގެ ސިޔާސަތެއް ކަމުގައެވެ. އަދި، ވަކި ޤައުމަކަށް ތާޢީދު ނުކުރާނެ ކަމަށާއި، ހަނގުރާމައާ ގުޅޭ ކަންކަމުގައި ވަކި އަތަކަށް ބުރަ ނުވާނެ ކަމުގައެވެ.
"ތުރުކީ ވިލާތުން އަމަލު ކުރަމުން ގެންގޮސްފައި ވާނީ އިންސާފުވެރިކަމާ އެކު. ކުރިއަށް ދާނީ ވެސް އެ ގޮތުގައި. ނަމަވެސް، ހުޅަނގުގެ ޤައުމުތަކުގެ ބަސްމަގާއި އަމަލުތައް އިސްލާހު ކޮށްގެން މެނުވީ، ވާސިލުވާން ބޭނުންވާ ލަނޑުދަނޑި ކާމިޔާބެއް ނުކުރެވޭނެ،" އުރުދުޣާން ވިދާޅުވިއެވެ.
ރަޝިޔާގެ ރައީސް ވްލަޑިމިއަރ ޕުޓިންއާއި ޔޫކްރެއިނުގެ ރައީސް ވޮލޮޑިމީރް ޒެލެންސްކީއާ ދެމެދު ބައްދަލުވުމެއް ބޭއްވުމަށް އުރުދުޣާން ގެންދަވަނީ މަސައްކަތް ކުރައްވަމުންނެވެ. އަދި، ހުޅަނގުގެ ޤައުމުތަކުން ރަޝިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތަކުގައި ތުރުކީ ވިލާތުން ބައިވެރިވެފައެއް ނުވެއެވެ.
އަންނަ ހަފުތާގައި އުޒްބަކިސްތާނުގައި ބާއްވާ ސަމިޓެއްގައި އުރުދުޣާން ޕުޓިންއާ ބައްދަލު ކުރައްވާނެ ކަމަށް ބެލެވެއެވެ. އަދި، ހަނގުރާމައާ ގުޅޭ ގޮތުން މަޝްވަރާ ކުރައްވާނެ ކަމަށް ޤަބޫލު ކުރެވެއެވެ. މި މަހުގެ ކުރީކޮޅު ދެ ބޭފުޅުންގެ މެދުގައި ބޭއްވި ބައްދަލުވުމެއްގައި އިޤްތިޞާދީ ދާއިރާއިން ދެ ޤައުމުގެ ދެމެދުގައި ގުޅުން ބަދަހި ކުރުމަށް އެއްބަސްވުމެއްގައި ސޮއިކޮށްފައިވެއެވެ.