ޑައިވް މަންޒިލެއްގެ ގޮތުގައި ރާއްޖެ މަޤްބޫލުކަން ހޯދަމުންދާއިރު، ފަރުތައް ހިމާޔަތްކޮށް ބެލެހެއްޓުމަކީ މުހިއްމުކަމެއްކަމަށް ޓޫރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
ޓޫރިޒަމް މިނިސްޓަރ މިހެން ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރިއަށްގެންދިއުމަށް ހަމަޖެހިފައިވާ ކަނޑުއަޑީގެ ފޮޓޯ ނެގުމުގެ މުބާރާތުގައި ބައިވެރިވުމުގެ ފުރުސަތު ހުޅުވާލުމަށް ބޭއްވި ހަފްލާގައި ވާހަކަފުޅު ދައްކަވަމުންނެވެ.
ޒޫމް މެދުވެރިކޮށް ބޭއްވި މި ރަސްމިއްޔާތުގައި ފޮޓޯ ނެގުމުގެ މުބާރާތުގެ ރެޖިސްޓްރޭޝަން ފަށައިދިނީ ރާއްޖޭގެ އެންމެ ތަޖުރިބާކާރު ޑައިވަރުންގެ ތެރޭގައި ހިމެނޭ، ހުސެން ރަޝީދު (ސެންޑީ) އެވެ.
ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ޓޫރިޒަމް މިނިސްޓްރީން ކުރިއަށްގެންދާ ޑައިވް ފޮޓޯ ޝޫޓް ހަރަކާތް ކުރިއަށްގެންދަނީ އޯޝަން ޖިއޮގްރަފިކްއާއި، މަޑޯއާއި ގުޅިގެންނެވެ.
ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، މި ހަރަކާތް އަހަރަކު އެއްފަހަރު ބޭއްވުމަށް ރާވާފައިވާ ކަމަށެވެ. އަދި މި ހަރަކާތުގެ ތެރެއިން ފަރުތައް ހިމާޔަތްކުރުމަށްވެސް ޚާއްސަ އިސްކަމެއްދެއްވާނެ ކަމަށް މިނިސްޓަރ ވިދާޅުވިއެވެ.
"ހިމާޔަތްކޮށްފައިވާ ތަންތަނަށް ބައެއް ހިސާބުތައް އެބަ ބަދަލުވޭ، ފޮޓޯތަކަކީ ފަރުތަކަށް އަންނަ ބަދަލުތައް ދެނެގަނެވޭނެ ގޮތެއް. މިއީ ދެމެހެއްޓެނިވި ފަތުރުވެރިކަމަކަށް މުހިއްމު ކަމެއް" މިނިސްޓަރ މައުސޫމް ވިދާޅުވިއެވެ.
ފޮޓޯ ނެގުމުގެ މުބާރާތުގައި، ރާއްޖޭގެ 50 ޑައިވް ސައިޓުގެ ފޮޓޯތައް ނެގުމަށްފަހު ހުށަހެޅުމުގެ ފުރުސަތު މިމަހުގެ 27 ވަނަ ދުވަހުގެ ނިޔަލަށް ވަނީ ހުޅުވާލާފައެވެ. ކޮންމެ ރެޖިސްޓްރޭޝަނަކަށް 5 ފޮޓޯ ހުށަހެޅުމުގެ ފުރުސަތު އޮންނާނެ ކަމަށް އޯޝަން ޖިއޮގްރަފިކްއިން މައުލޫމާތުދެއެވެ.
މި ހަރަކާތާއި ގުޅޭގޮތުން ވާހަކަދައްކަވަމުން އޯޝަން ޖިއޮގްރަފިކްގެ ފައުންޑަރ މައިކަލް އޯ ބުނީ، މިފަދަ މުބާރަތަކީ ފަރުތައް ހިމާޔަތްކުރުމަށް ވަރަށް މުޙިއްމު ހަރަކާތެއް ކަމަށެވެ. އަދި މި ހަރަކާތުގައި ބައިވެރިވުމުގެ ފުރުސަތު ލިބުމަކީ ލިބޭ ޝަރަފެއް ކަމަށްވެސް އޭނާ ބުންޏެވެ.
"ވަރަށް ރަނގަޅު ހަރަކާތެއް މިއީ، އެންމެންނަށްވެސް ފަރުތައް ހިމާޔަތްކުރުމަށް ކޮށްދެވޭނެ ކަމެއް އެއީ ފޮޓޯތައް ނަގާ ހިއްސާކުރުމަކީ" މައިކަލް ބުންޏެވެ.
ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރިއަށްގެންދާ "50 ބެސްޓް ސައިޓް" ހަރަކާތުގެ ތެރެއިން ރާއްޖޭގައި ހުރި އެންމެ ގުދުރަތީ މުއްސަނދި ފަރުތައް މުޅި ދުނިޔެއަށް ދައްކާލާނެއެވެ.
މި ހަރަކާތުގައި ބައިވެރިވާ ފޮޓޯގްރަފަރުން ނަގާ ފޮޓޯތައް އެކަމަށް ޚާއްސަކޮށްފައިވާ ޕެނަލަކުން ބެލުމަށްފަހުގައި ވަނަވަނައަށް ހޮވޭ ފަރާތްތައް އިއުލާންކުރާނެއެވެ. އެ ފަރާތްތައް އިއުލާންކުރުން އޮންނާނީ އޮކްޓޯބަރ 5 ވަނަ ދުވަހުއެވެ.