ހުޅުމާލެ ދެވަނަ ފިޔަވަހީގައި އިއްޔެ ހުޅުވި ފުރަތަމަ ސްކޫލް "ކާމިލްދީދީ ޕްރައިމަރީ ސްކޫލް" ހުޅުވުމާއެކު އެތަކެއް ބައެއްގެ ޝަކުވާތަކާއި ހިތްހަމަނުޖެހުން ވަނީ އަމާޒުވެފައެވެ. ހިތްހަމަނުޖެހުން ބޮޑަށް އަމާޒުވެފައިވަނީ މާލޭގެ އެހެން ސްކޫލުތަކުގެ ޢިމާރާތް މަތިމައްޗަށް ހިއްލާފައި ހުރިނަމަވެސް، ކާމިލްދީދީ ޕްރައިމަރީ ސްކޫލް ބޭރުން ފެންނަން ހުރި ގޮތުންނެވެ. ނަމަވެސް މިކަމާމެދު ބެލެނިވެރިންގެ އެއްވެސް ޝަކުވާއެއް ނެތެވެ. ބޭރުން ސްކޫލް ފެންނަން ހުރި ގޮތަށްވުރެ ބެލެނިވެރިންނަށް މުހިއްމުވީ ތަޢުލީމް ފޯރުކޮށްދިނުމަށް ދުރަށް ދަރިވަރުން ފޮނުވުމަށް ކުރަން ޖެހުނު ދަތުރާއި، އެކަމަށް ކުރަމުން އައި ޚަރަދުކުޑަވެ އެ ސްކޫލުން ލިބޭނެ ތަޢުލީމުގެ ފެންވަރު ރަނގަޅުވުމެވެ. ބަޔަކު ސްކޫލަށް ފާޑުކީނަމަވެސް ބެލެނިވެރިން ތިބީ ސްކޫލާމެދު ވަރަށްވެސް ހިތްހަމަޖެހިގެންނެވެ.
ހުޅުމާލޭގައި ހުޅުވި "ކާމިލް ދީދީ ޕްރައިމަރީ" ސްކޫލަކީ ބެލެނިވެރިން ކުރި އެތައް ދުވަހެއްގެ ފޮނި އުއްމީދުތަކެއްގެ ނިމުމެވެ. ހުޅުމާލެ ދެވަނަ ފިޔަވައްސަށް މީހުން ބަދަލުވީއްސުރެ ބެލެނިވެރިން އިންތިޒާރު ކުރަމުން ދިޔައީ ވީހާވެސް ކައިރީގައި، ސްކޫލެއް ހުޅުވި ކިޔަވައިދިނުމަށް ދުރަށް ދަރިވަރުން ފޮނުވަންޖެހުނު ޖެހުން ހުއްޓުމަކަށް އަންނާނެ ދުވަހަކަށެވެ. މިއަދު މިއޮތީ އެ އުއްމީދު ހާސިލްވެ ބެލެނިވެރިންނަށް ހިނިތުންވުން ގެނުވާފައެވެ. ފުރަތަމަ ސްކޫލާއެކު ދެވަނަ ފިޔަވަހީގައި ދިރިއުޅެމުން އަންނަ ބެލެނިވެރިން މިއަދު ތިބީ ހިތްހަމަ ޖެހިގެންނެވެ.
މާލެއަށް ނުވަތަ ހުޅުމާލެ ފުރަތަމަ ފިޔަވައްސަށް ދަރިން ސްކޫލަށް ގެންދިޔުމަށްޓަކައި ބެލެނިވެރިންގެ މަސައްކަތްތައް ފަތިހު 4:00 ޖަހާއިރު ފަށާފެށުން ނިމުމަކަށް އައީއެވެ. ދަރިވަރުން ގަދަ ނިދީގައި ތިއްބާ އެހާ ކުރިން ނަގައިގެން ސްކޫލްއަށް ގެންދަން ޖެހުން ނިމުމަކަށް އައީއެވެ. ބަސް ނައިސްގެން ނުވަތަ ގަދައަށް ވާރެވެހުމުގެ ސަބަބުން ގަޑިޖެހިގެން ދަރިވަރުން ސްކޫލަށް ދިޔަ ދިއުން ނިމުމަކަށް އައީއެވެ.
"އަލަށް ހުޅުވުނު ސްކޫލާއެކު ޖެހިލުމެއްނެތި އެއް ދަރި ގޭގައި ބެހެއްޓުމަށްފަހު އަނެއް ދަރިފުޅު ގޮވައިގެން ސްކޫލަށް ދެވޭނެ. ބޭރުން ސްކޫލް ހުރިގޮތުގެ ބަދަލުގައި ސްކޫލް އެތެރޭގައި ވަޞީލަތްތައް ހަމަވެ ރަނގަޅު ތަޢުލީމެއް ލިބުމަކީ އެއްމެ ހިތްހަމަޖެހޭކަންކަން. ކުރިން ދަރިން ގޮވައިގެން ކިޔަވައިދިނުމަށް ދިއުމަށް ކުރަންޖެހޭ ޖެހުން ނިމުމަކަށްއައިސް ޚަރަދުތައް ކުޑަވެއްޖެ." ބެލެނިވެރިއަކު އޭނާގެ ހިތްހަމަ ޖެހުން ފާޅުކުރިއެވެ.
"ކާމިލް ދިދީ ޕްރައިމަރީ" ސްކޫލަކީ 824 ކުދިންގެ ޖާގައިގެ ސްކޫލްއެކެވެ. އެލްކޭޖީން ފެށިގެން ގްރޭޑް 6 އާއި ހަމަޔަށް މި ސްކޫލްގައި ކިޔަވައިދޭނެއެވެ. ސްކޫލް ހުޅުވިއިރު ހުރިހާ ވަޞީލަތްތައް ހަމައެވެ. ދަރިވަރުންނަށް ކިޔަވއިދޭ ކްލާސްރޫމްތަކަކީ ޖާގައިގެ ގޮތުން ތަނަވަސް، ހިތްފަސޭހަ ކްލާސްރޫމްތަކެކެވެ. ސްކޫލް ހިންގުމަށާއި، ކިޔަވައިދިނުމަށް ތިބީ ތަޖުރިބާ ހުރި ޢިލްމީ ޤާބިލްޓީމެކެވެ.
ސްކޫލްގެ ކުރިމަގާއި ދަރިވަރުންނަށް ރަނގަޅު ތަޢުލީމެއް ލިބޭނެ ކަމާމެދު އެ ސްކޫލްގެ ޕްރިންސިޕަލް ޝައްކެއް ނުކުރައްވައެވެ. ސްކޫލްގެ ޕްރިންސިޕަލް ފާތިމަތު ލީނާ ހުންނެވީ ސްކޫލްގެ ކުރިމަގަށް ހުރިހާކަމެއް ކުރުމުގައިވެސް ބެލެނިވެރިންގެ ޚިޔާލާ މަޝްވަރާ އާއެކު ކުރިއަށް ވަޑައިގަތުމަށް ތައްޔާރަށެވެ. އަދި އެހެން ސްކޫލްތަކާ ޚިލާފަށް އެ ސްކޫލުން ޕްރައިމަރީ ގްރޭޑްތަކުގައި ކިޔަވާ ދަރިވަރުންނަށް ކްލަބް ހަރަކާތްތަކާއި ހުނަރު ދަސްކޮށްދިނުމުގެ އެކި ޕްރޮގްރާމްތައް ކުރިއަށް ގެންދިޔުމަކީ މި ސްކޫލުގެ ޕްރިންސިޕަލްގެވެސް އުއްމީދެކެވެ. ލީނާގެ އުއްމީދަކީ މުޖުތަމަޢުތެރެއިން ނެތެމުންދާ އާދަތައް ސްކޫލްގެ އެސެމްބްލީން ފެށިގެން ދަސްކޮށްދިނުމެވެ. އައު ސްކޫލަށް އައު ޓީމެއް އޮތްނަމަވެސް އެ ސްކޫލުން ދަރިވަރުންނަށް ފުރިހަމަ ތަޢުލީމެއް ފޯރުކޮށްދޭނެކަމާމެދު ލީނާ ޝައްކެއް ނުކުރައްވައެވެ.
"މި ސްކޫލްގައި ތިބީ ތަޖުރިބާކާރު މުދައްރިސުން. ރަނގަޅު ތަޢުލީމެއް ފޯރުކޮށްދިނުމަށް ރަނގަޅު ނިޒާމެއް މުހިއްމު. މި ނިޒާމް ޤާއިމްކުރުމަށް ބެލެނިވެރިންގެ ބައިވެރިވުން މުހިއްމު. އިމާރާތްތައް ނުބަލާ ދަރިވަރުން ސްކޫލްއަށް ފޮނުވައިދެއްވާ. މި ތަނުން ބެލެނިވެރިން ޤަބޫލުކުރާ ތަޢުލީމެއް ފޯރުކޮށްދޭނެ." ޕްރިންސްޕަލް ފާތިމަތު ލީނާ ވިދާޅުވިއެވެ.
ބެލެނިވެރިންނާއި ޕްރިންސިޕަލްގެ އުއްމީދާއި އެއްގޮތަށް ސްކޫލްގެ މުދައްރިސުންގެ އުއްމީދުތައްވެސް އެހާފޮންޏެވެ. ތަނުގެ ހުރި ވަޞީލަތްތަކާއެކު ފުރިހަމަ ތަޢުލީމެއް ފޯރުކޮށްދިނުމަށް ހުރަހެއްނެތްކަމަށް މުދައްރިސުންވެސް ޤަބޫލުކުރައްވައެވެ. ތަޢުލީމީ ދާއިރާ ކުރިއަރައިގެން ދާ މިދަނޑިވަޅުގައި ހުޅުމާލެ ފޭސް 2 އަށް ސްކޫލެއްގެ މުހިއްމުކަން މުދައްރިސުންވެސް ފާހަގަކުރައްވައެވެ. މުދައްރިސުންގެ ޢަޒުމަކީ އެ ސްކޫލްގެ ނަން ރޯޝަން ކުރުމެވެ.
"ޙަޤީގަތުގައި މިދަނޑިވަޅުގައި މިތަނަށް ސްކޫލެއް ވަރަށް މުހިއްމު. މިއަދު ވަރަށް އުފާވެއްޖެ. މިތާ އުޅެމުން މާލޭގެ ސްކޫލްތަކަށް ކިޔަވައިދިނުމަށް ދިއުމަކީ ވަރަށް ބޮޑު ތަކުލީފެއް. މިއަދު މި ސަރުކާރުން އެކަމަށް ހައްލެއް ގެނެސްދީފި." މުދައްރިއްސަކު އޭނާގެ ޝުޢޫރު ފާޅުކުރައްވަމުން ކިޔައިދިނެވެ.
"ކާމިލް ދީދީ ޕްރައިމަރީ" ސްކޫލަކީ ވަގުތީ ސްކޫލެއްނަމަވެސް އެތަނުގައި ހުރިހާ ވަޞީލަތްތައް ހަމައެވެ. މިވަގުތު އެ ދަރިވަރުން ވަގުތީ ސްކޫލްގައި ކިޔެވިނަމަވެސް ދެވަނަ ފިޔަވަހީގައި މިހާރު އަޅަމުން އަންނަ ބޮޑެތި ސްކޫލްތަކަށް އެ ދަރިވަރުން ބަދަލުކުރާނެއެވެ. މިހާރުވެސް ދެވަނަ ފިޔަވަހީގައި ބޮޑެތި ސްކޫލްތައް އިމާރާތް ކުރުމުގެ މަސައްކަތް ކުރަމުން އަންނައިރު މާލަސްތަކެއް ނުވެ އެ ސްކޫލްތައްވެސް ހުޅުވާނެއެވެ. އަދި އަންނަ ދިރާސީ އަހަރާ ހަމަޔަށް އެ ސްކޫލްތައް ހުޅުވާ ކިޔަވައިދޭން ފެށުމަށް ސަރުކާރުން ވަނީ އަމާޒުހިފާފައެވެ.
ޤަބޫލުކުރަންޖެހޭ ހަގީގަތަކީ ހިޔާ ފްލެޓް ސަރަހައްދުގައި މީހުން ދިރިއުޅެން ފެށިއިރު އެތަނުގައި ދިރިއުޅޭ ރައްޔިތުންނަށް ބޭނުންވާނެ ޒަރޫރީ އެއްވެސް ވަޞީލަތެއް ޤާއިމްކޮށްފައި ނެތްކަމެވެ. ބަލިވެއްޖެނަމަ ސިއްޙީ ފަރުވާ ދޭނެ ހޮސްޕިޓަލެއް، ސިއްޙީ މަރުކަޒެއް އެތާކު ނެތެވެ. އަމުދުން ދަރިވަރުންނަށް ރަނގަޅު ތަޢުލީމެއް ފޯރުކޮށްދޭނެ އެއްވެސް ވަޞީލަތެއް ނެތެވެ. ދޭހާ އަތްވަކާއި ވެހޭހާ ވާރެއެއްގައި ބަރު ފޮތްދަބަސް ކޮނޑުގައި އަޅުވައިގެން ދާން ޖެހުނީ ޖެހިގެން އޮންނަ އަވަށަކަށޭ ބުނުމަކުން ދޮގަކަށް ނުވާނެއެވެ. ބައެއް ދަރިވަރުންނާއި ބެލެނިވެރިން ފައިމަގުގައެވެ. އަނެއްބަޔަކު ބޮޑު ކުލި ދީފައި ޓެކްސީތަކުގައެވެ. ނަމަވެސް އެ ތަކުލީފަށް ލުޔެއް ގެނެސްދީ، ފައިމަގުގައާއި ޓެކްސީތަކުގައި ދަރިވަރުން ސްކޫލަށް ފޮނުވަން ކުރި ޚަރަދުތައް ނިމުމަކަށް ގެނެސްދިނީ މި ސަރުކާރުންނެވެ.