ޕެސިފިކް ކަނޑުގެ ހުޅަނގުގައި އުފެދިފައިވާ ބާރުގަދަ ތޫފާނެއް ކަމުގައިވާ ހިއްނަމްނޯރް ދެކުނު ކޮރެޔާއާ ދިމާލަށް މިސްރާބު ޖަހައިފިއެވެ. އެ ޤައުމުގެ މޫސުމާ ބެހޭ އިދާރާއިން ބުނީ މި ތޫފާން ސެޕްޓެންބަރު 6 ގެ ވަގުތެއްގައި އެ ޤައުމުގެ ސަރަޙައްދުތަކަށް އަރާނެ ކަމުގައެވެ.
މި ތޫފާން މިހާރު ދަނީ 19 ކިލޯމީޓަރުގެ ބާރު މިނުގައި އުތުރަށް ދަތުރު ކުރަމުންނެވެ. އަދި، ސެޕްޓެންބަރު 6 ގެ ވަގުތެއްގައި ދެކުނު ކޮރެޔާގެ ބަނދަރުމަތީ ރަށެއް ކަމުގައިވާ ބޫސާން ކައިރިއަށް ތޫފާން އަރާނެ ކަމަށް އެ ޤައުމުގެ މޫސުމާ ބެހޭ އިދާރާއިން އިންޒާރު ކުރެއެވެ. އޭގެ ކުރިން، އެ ޤައުމުގެ ދެކުނުގައިވާ ރަށްތަކެއް ކަމުގައިވާ ޖޭޖޫ އައިލެންޑްސްއަށް ތޫފާނުގެ އަސަރު ފޯރާނެއެވެ.
"މި ތޫފާނާ އެކު ވަރަށް ބޮޑަށް ވައި ބާރުވާނެ ކަމަށް ބެލެވޭ. އަދި ބޯކޮށް ވާރޭ ވެހޭނެ. ކަނޑުތައް ވެސް ވަރަށް ގަދަވާނެ. އަދި، އައްސޭރިފަށުގެ ސަރަޙައްދުތަކުގައި ރާޅު ބޮޑުވެ އުދައަރާނެ ކަމަށް ވެސް ލަފާ ކުރެވޭ،" ދެކުނު ކޮރެޔާގެ މޫސުމާ ބެހޭ އިދާރާއިން އިންޒާރު ކުރަމުން ބުންޏެވެ. ބޫސާންއާއި އެ ރަށް ކައިރީގައިވާ ހިސާބުތަކަށް ހުސްވި ހަފުތާ ބަންދުގެ ތެރޭގައި ވެސް ވަރަށް ބޮޑަށް ވިއްސާރަ ކުރިއެވެ.
ތޫފާން ހިންނަމްނޯރްއަކީ ފަސްވަނަ ގިންތީގެ ތޫފާނެއް ކަމުގައި ނާސާއިން ބުނެއެވެ. މިއީ މި އަހަރުގެ ތެރޭގައި އުފެދުނު ފަސްވަނަ ކެޓެގަރީގެ ފުރަތަމަ ތޫފާނެވެ. ތޫފާނާ އެކު ގަޑިއަކު 220 ކިލޯމީޓަރުގެ ބާރުމިނުގައި ވައި ޖެހެމުންދާ ކަމުގައި އެމެރިކާގެ ޖޮއިންޓް ޓައިފޫން ވޯނިންގް ސިސްޓަމްއިން ބުނެއެވެ. އަދި، ކުރިއަށް އޮތް ދުވަސްތަކުގައި 260 ކިލޯމީޓަރަށް ވައި ބާރުވާނެ ކަމަށް ބެލެވެއެވެ. މި ތޫފާނާ ގުޅިގެން ލިބޭ ގެއްލުންތައް ކުޑަ ކުރަން ފިޔަވަޅުތައް އެޅުމަށް ދެކުނު ކޮރެޔާގެ ރައީސް ޔޫން ސުކް-ޔޯލް ވަނީ ގޮވައިލައްވާފައެވެ. އަދި، އެ ޤައުމުގައި ހަރަކާތްތެރިވާ ގިނަ ކުންފުނިތަކަކުން ވަނީ، ވަގުތީ ގޮތުން މަސައްކަތްތައް ހުއްޓައިލާ، ކާރުޚާނާތަކާއި އޮފީސްތައް ބަންދު ކޮށްފައެވެ. ކޮރެއަން އެއަރލައިންސްއާއި އޭޝިޔާނާ އެއަރލައިންސްގެ ގިނަ ދަތުރުތައް ވެސް މިހާރު ވަނީ ހުއްޓައިލާފައެވެ.
މި އަހަރުގެ މިހާތަނަށް ޕެސިފިކް ކަނޑުގެ ސަރަޙައްދުގައި ޖުމުލަ 13 ތޫފާނެއް އުފެދިފައިވެއެވެ. މީގެ ތެރެއިން ހަތަރު ތޫފާނަކަށް ވަނީ ޓައިފޫންގެ ދަރަޖަ ދީފައެވެ. ޕެސިފިކް އަދި އެޓްލާންޓިކް ކަނޑުގެ ސަރަޙައްދުތަކުގައި މޭ މަހުން ފެށިގެން އޮގަސްޓުގެ ނިޔަލަށް ގިނަ އަދަދެއްގެ ތޫފާންތަކެއް އުފެދޭ ނަމަވެސް، އޮގަސްޓު މަހުގެ ތެރޭގައި އެޓްލާންޓިކް ކަނޑުގެ ސަރަޙައްދުގައި އެންމެ ތޫފާނެއް ވެސް އުފެދިފައެއް ނުވެއެވެ. މިއީ 1997 ވަނަ އަހަރަށްފަހު، އެ ސަރަޙައްދުގައި ތޫފާނެއް ނުއުފެދޭ ފުރަތަމަ އޮގަސްޓު މަހެވެ.