ދަ ރިޓްޒް ކާލްޓަން ރިސޯޓްގެ ކޮންމެ މުވައްޒަފަކަށް ސަރވިސް ޗާޖުގެ ގޮތުގައި މިދިޔަމަހު 1317 ޑޮލަރު ލިބިއްޖެއެވެ. މިއީ ދިވެހި ރުފިޔާއިން ބަލާނަމަ 20317 ރުފިޔާއެވެ.
ރިސޯޓު ވޯކާސް މޯލްޑިވްސް ފޭސްބުކް ޕޭޖުގައި ވަނީ 58 ރިސޯޓެއްގެ ސަރވިސް ޗާޖާއި ގުޅޭ މައުލޫމާތުތައް އާއްމުކޮށްފައެވެ. މިދިޔަ މަހު އެންމެ ގިނަ އަދަދަކަށް ސަރވިސް ޗާޖު ދިން ރިސޯޓަކަށް ރިޓްސް ކާލްޓަން ރިސޯޓުވެފައިވާއިރު، އެ ރިސޯޓަކީ މިދިޔަމަހު 1000 ޑޮލަރަށްވުރެ ބޮޑު އަދަދަކުން ސަރވިސް ޗާޖު ދީފައިވާ ހަމައެކަނި ރިސޯޓެވެ.
މިދިޔަ އަހަރުތެރޭ ހުޅުވާފައިވާ ރިޓްޒް ކާލްޓަން މޯލްޑިވްސް ފަރި އައިލެންޑްސް ރިސޯޓަކީ އެންމެ މަތީ ފެންވަރުގެ ރިސޯޓެކެވެ. މާލެ އަތޮޅުގައި ތަރައްޤީކޮށްފައިވާ ރިސޯޓަކީ 100 ކޮޓަރީގެ ރިސޯޓެކެވެ.
ރިސޯޓުތަކުގައި މަސައްކަތްކުރާ މުވައްޒަފުން ދޭ މައުލޫމާތުތަކުގެ މައްޗަށް ބިނާކޮށް ރިސޯޓް ވޯކާސް އިން ނެރޭ ސަރވިސް ޗާޖުގެ އަދަދުތަކާއި ގުޅޭ މައުލޫމާތުތަކުން ދައްކާގޮތުން 700 ޑޮލަރަށްވުރެ ބޮޑު އަދަދަކުން ސަރވިސް ޗާޖު ބަހާފައިވަނީ 5 ރިސޯޓަކުންނެވެ. އެއީ ދަ ރިޓްޒް ކާލްޓަން، އަނަންތާރާ ކިހާވަށް މޯލްޑިވްސް، ވަން އެންޑު އޮންލީ ރީތި ރަށް، އަންސާނާ ވެލަވަރު މޯލްޑިވްސް އަދި އޯޒަން ރިސަރވް ބޮލިފުށިއެވެ.
އޮގަސްޓުމަހު އެންމެ ދަށްކޮށް ސަރވިސް ޗާޖު ދިން ރިސޯޓުތަކުގެ ސަރވިސް ޗާޖުގެ ގޮތުގައި ދިން އަދަދު އުޅެނީ 5000 ރުފިޔާއަށްވުރެ ދަށުގައެވެ.