މިމަހު ފަހުކޮޅުން ފެށިގެން ފްލޯޓިންގ ސިޓީގެ ނަމޫނާ ގެތަކެއް އާއްމުންނަށް ދައްކާލުމަށް ތައްޔާރުވަމުންދާ ކަމަށް މިޕްރޮޖެކްޓުގެ ދިވެހި ކޮންސަލްޓަންޓު ވިދާޅުވެއްޖެއެވެ.
ރާއްޖޭގައި ފްލޯޓިން ސިޓީ ތަރައްޤީކުރުމުގެ މަސައްކަތް ކުރިއަށްގެންދަނީ ނެދަލެންޑްސްގެ ޑަޗް ޑޮކްލޭންޑު ކުންފުނިންނެވެ. މިދިޔަ ފެބްރުއަރީމަހުގެތެރޭ ފްލޯޓިންގ ސިޓީގެ ފުރަތަމަ ގެތައް އިމާރާތްކުރުމުގެ މަސައްކަތްވަނީ ބައިސަން މޯލްޑިވްސް އާއި ހަވާލުކޮށްފައެވެ.
ޕީއެސްއެމް ނިއުސްއާއި ވާހަަކަދައްކަވަމުން، ފްލޯޓިންގ ސިޓީ މަޝްރޫޢުގެ ދިވެހި ކޮންސަލްޓަންޓް އިބްރާހީމް ރިޔާޒް ވިދާޅުވީ ވިއްސާރައާއި ގުޅިގެން އާއްމުންނަށް އެތަން ދައްކާލުމުގެ މަސައްކަތް ލަސްވެފައިވާ ކަމަށެވެ. އެހެން ނަމަވެސް މިހާރު މެޓް އޮފީހުންދޭ މައުލޫމާތަށް ބަލާއިރު، މިމަހު މެދުތެރޭ މޫސުން ރަނގަޅުވާނެ ކަމަށް ލަފާކުރެވޭ ކަމަށާއި، އެހެންކަމުން އެއަށްފަހު އެތަން ދައްކާލުމަށް ތައްޔާރުވާނެ ކަމަށެވެ.
" މިމަހު ފަހުކޮޅު ދައްކާލަން ހުޅުވާލެވޭނެ، ގެތައްވެސް ނިމިފަ ހުރީ، އެހެން ނަމަވެސް މޫސުން ގޯސްވުމުގެ ސަބަބުން ލަސްވީ،" ރިޔާޒް ވިދާޅުވިއެވެ.
ނަމޫނާއެއްގެގޮތުގައި ދައްކާލުމަށް ހަމަޖެހިފައިވަނީ ފްލޯޓިންގ ސިޓީގެ މަގެކެވެ. އެ މަގުގެ ދެ ފަރާތުގައި ގެތައް ހުންނާނެ ކަމަށާއި، މަގުގައި ގަސްތައްވެސް ހުންނާނެ ކަމަށް ރިޔާޒް ވިދާޅުވިއެވެ. މިއާއެކު ފްލޯޓިންގ ސިޓީ ނިމިގެންދާއިރު ހުންނާނެ ގޮތް ސިފަވެގެންދާނެއެވެ. ފްލޯޓިންގ ސިޓީ ތަރައްޤީކުރަމުންދަނީ މާލެ އަތޮޅު އާރަށް ކައިރީ އޮންނަ ފަޅެއްގައެވެ. މާލެއިން ފްލޯޓިންގ ސިޓީއަށް ލޯންޗުގައި 10 މިނެޓުން ދެވޭނެއެވެ.
ރިޔާޒް ވިދާޅުވީ ފްލޯޓިން ސިޓީގެ ގެތައް ބަލާލަން ބޭނުންވާ ފަރާތްތަކަށް ނަންނޯޓުކުރުމުގެ ފުރުސަތު ވެބްސައިޓު މެދުވެރިކޮށް ހުޅުވާލާނެ ކަމަށެވެ. އަދި އެތަން ބަލާލަން ބޭނުންވާ ފަރާތްތަކަށް ޓްރާންސްޕޯޓު ހަމަޖައްސާދޭނެ ކަމަށާއި، ބަލާލަން ބޭނުންވާ ހުރިހާ ފަރާތަކަށްވެސް އެ ފުރުސަތު ފަހިކޮށްދޭނެ ކަމަށް ރިޔާޒް ވިދާޅުވިއެވެ.
ފްލޯޓިން ސިޓީ ތަރައްޤީކުރަނީ 20000 މީހުންގެ އާބާދީއަކަށް އަމާޒްކޮށެވެ. ފްލޯޓިން ސިޓީގެ މިމަޝްރޫޢު ނިމިގެންދާއިރު މިސަރަޙައްދަށް ރިސޯޓުތަކާއި ސިޓީ ހޮޓާތަކާއި ބޮޑެތި ފިހާރަތަކުގެ އިތުރުން ސިއްޙީ ޚިދުމަތާއި ސްކޫލްތައް އައުމާއެކު މިއީ އިތުރަށް އުފެދޭ ވަޒީފާތައްކަމަށް މަސައްކަތުގެ ލޯކަލް ކޮންސަލްޓަންޓް ފާހަގަކުރައްވައެވެ.
ފްލޯޓިންގ ސިޓީ އަޅާއިރު މުޅިންވެސް ތިމާވެއްޓާއި ރަހުމަތްތެރި ގޮތްތަކެއް ބޭނުން ކުރެވޭނެއެވެ. އަދި މިއީ ރާއްޖޭގައި ހިންގާ މިފަދަ ފުރަތަމަ މަޝްރޫއެވެ. މިއީ ރާއްޖޭގެ ގެދޮރު އިމާރާތް ކުރުމުގެ ދާއިރާ ބަދަލު ކޮށްލުމުގެ މަޤްސަދުގައި ކުރިއަށްގެންދާ ބިޔަ މަޝްރޫއެކެވެ.