ޒިމްބާބުވޭގައި ހަލުވިކަމާ އެކު ފެތުރެމުންދާ ހިމަބިހި ޖެހިގެން މަރުވި މީހުންގެ އަދަދު 685 އަށް އަރައިފިއެވެ. ފާއިތުވި ދެ ހަފުތާގެ ތެރޭގައި މި ބަލީގައި މަރުވާ މީހުންގެ އަދަދު ވަނީ 4 ގުނައަށް އިތުރުވެފައެވެ. ގައިންގަޔަށް އަރާ ނުރައްކާތެރި ބައްޔެއް ކަމުގައިވާ ހިމަބިހި ފެތުރުން ކޮންޓްރޯލް ކުރުމަށް އެޤައުމުގެ ޞިއްޙަތާ ބެހޭ ވުޒާރާއިން ދަނީ ވެކްސިން ޖެހުމުގެ ކެމްޕޭނެއް ހިންގަމުންނެވެ.
އެ ޤައުމުގައި މި ބަލި ޖެހިފައިވާ މީހުންގެ އަދަދު މިހާރު ވަނީ 6,034 އަށްވުރެ މައްޗަށް އަރާފައެވެ. މި ބަލި ޖެހިފައިވާ މީހުންގެ ތެރޭގައި ގިނައީ ކުޑަކުދިންނެވެ. އުމުރުން 6 މަހާއި 15 އަހަރާއި ދެމެދުގެ 4,266 ކުއްޖަކަށް މި ބަލި ޖެހިފައިވާ ކަމުގައި އެ ޤައުމުގެ ޞިއްޙަތާ ބެހޭ ވުޒާރާއިން ބުނެއެވެ.
ޒިމްބާބުވޭގެ އިންފޮމޭޝަން މިނިސްޓަރ މޮނިކާ މުޓްސްވަންގްވާ ވިދާޅުވީ، ބަލި ފެތުރެމުން ދަނީ އެކިއެކި ސަބަބުތަކާ ގުޅިގެން ވެކްސިން ދިނުމަށް ދެކޮޅު ހަދަމުންދާ މީހުންގެ މެދުގައި ކަމުގައެވެ. "ބަލި ޖެހިފައިވާ ގިނަ ކުޑަކުދިންނަށް ވެކްސިން ދީފައެއް ނެތް. އެހެންވެ، ޢާންމުންގެ ޞިއްޙަތު ރައްކާތެރި ކުރުމަށް ޤާނޫނީ ގޮތުން ކުރެވެން ހުރި މަސައްކަތްތައް މިހާރު ފަށައިފިން،" މުޓްސްވަންގްވާ ވިދާޅުވިއެވެ.
ދިރާސީ އައު އަހަރުގެ ކިޔެވުން ފެށުމުގެ ކުރިން ޒިމްބާބުވޭގެ ސްކޫލްތަކުގެ ދަރިވަރުންނަށް ވެކްސިން ދިނުމަށް ޚާއްޞަ ކެމްޕޭނެއް ފަށާފައި ވާއިރު، ކުޑަކުދިންނަށް ވެކްސިން ދިނުމަށް ހުރިހާ އެންމެން ވެސް އެއްބާރުލުން ދިނުމަށް އެ ޤައުމުގެ ޞިއްޙަތާ ބެހޭ ވުޒާރާއިން ވަނީ ގޮވައިލާފައެވެ. ސެޕްޓެންބަރު 1 ވަނަ ދުވަހު އެކަނި ވެސް އެ ޤައުމުގައި 197 މީހަކަށް ވަނީ މި ބަލި ޖެހިފައެވެ. އަދި، އެ ދުވަހު 37 މީހުން މި ބަލީގައި މަރުވިއެވެ.