1969 ވަނަ އަހަރުގެ ޖުލައި މަހުގެ 20 ވަނަ ދުވަހަކީ އިންސާނުންނަށް ތާރީޚީ ދުވަހެކެވެ. އެއީ، އިންސާނަކު އެންމެ ފުރަތަމަ ފަހަރަށް ހަނދުގައި ފިޔަވަޅު އެޅި ދުވަހެވެ. އެމެރިކާގެ ޖައްވީ އިދާރާ ނާސާގެ ޖައްވީ އުޅަނދު އެޕޯލޯ 11 ގައި ދަތުރު ކުރުމަށް ފަހު ހަނދަށް ފައިބައި އެންމެ ފުރަތަމަ ފަހަރަށް ހަނދުގައި ފިޔަވަޅު އެޅި އިންސާނަކީ ނީލް އާމްސްޓްރޯންގްއެވެ.
އޭގެ ފަހުން ވެސް އިންސާނުން ހަނދަށް ގޮސްފައިވެއެވެ. އަދި، ދިރާސާ ކުރުމަށް ހަނދުން ސާމްޕަލްތައް ނަގައިގެން ދުނިޔެއަށް ގެނެސްފައިވެއެވެ. 1969 ވަނަ އަހަރާއި 1972 ވަނަ އަހަރާ ދެމެދު އެމެރިކާއިން ޖުމުލަ ހަ އުޅަނދެއް ހަނދަށް ފޮނުވާފައިވެއެވެ. އަދި މި އުޅަނދުތަކުގައި ޖުމުލަ 12 އިންސާނުން ވަނީ ހަނދަށް ގޮސްފައެވެ. 1972 ވަނަ އަހަރަށް ފަހު އެ ޕުރޮގުރާމު ވަނީ އެކި ސަބަބުތަކަށް ޓަކައި ހުއްޓައިލާފައެވެ.
ނަމަވެސް، އިންސާނުން ހަނދަން ދަތުރު ކުރުމުގެ މަސައްކަތް އަނެއްކާ ވެސް މި ވަނީ ފަށާފައެވެ. ނާސާއިން ވަނީ، ހަނދަށް ދަތުރު ކުރުމަށް އައު ރޮކެޓެއް އުފައްދާފައެވެ. އަދި، "ސްޕޭސް ލޯންޗް ސިސްޓަމް (އެސް.އެލް.އެސް)"ގެ ނަން ދީފައިވާ ރޮކެޓް އުދުއްސައިލަން ތައްޔާރުވެފައެވެ.
މި ރޮކެޓް އުދުއްސައިލުމަށް ކުރިން ހަމަޖެހިފައި އޮތީ އޮގަސްޓު 29 ގައެވެ. ނަމަވެސް، ދިމާވި ޓެކްނިކަލް މައްސަލަތަކަކާ ގުޅިގެން އެ ކަން ވަނީ އެންމެ ފަހު ވަގުތު ފަސްކޮށްފައެވެ. ނާސާއިން ބުނީ، އެސް.އެލް.އެސް.ގެ ދަތުރު ފަސްކޮށްފައި ވަނީ އޭގައި ބޭނުން ކުރާ ހޮޅިއަކުން ތެޔޮ ލީކުވުމާއި، ފިނިހޫނުމިން ބެލުމަށް ބޭނުންކުރާ އާލާތްތަކެއް މަސައްކަތް ނުކުރުމާއި، ރޮކެޓާއެކު ފޮނުވާ ކެޕްސޫލް ކަމުގައިވާ "އޮރާޔަން" ހޫނުން ރައްކާތެރި ކުރުމަށް ބޭނުންކުރާ އިންސިއުލޭޝަން ފޯމަށް ގެއްލުންވުމާ ގުޅިގެން ކަމުގައެވެ.
އެސް.އެލް.އެސް.އަށް ކުރިމަތިވި ޓެކްނިކަލް މައްސަލަތައް ނާސާއިން މިހާރު ވަނީ ހައްލު ކޮށްފައެވެ. މޫސުން ތަންދޭ ނަމަ ސެޕްޓެންބަރު 3 ގައި އުޅަނދު ޖައްވަން އުދުއްސައިލާނެއެވެ. އަދި، ހަނދަށް ކުރާ ދަތުރު ފަށާނެއެވެ. ނަމަވެސް، މި ދަތުރުގައި އިންސާނުން ބައިވެރިއެއް ނުވާނެއެވެ. މި ޕުރޮގުރާމު ކާމިޔާބުވެއްޖެ ނަމަ، ނާސާއިން މަސައްކަތް ކުރަމުން ދަނީ 2025 ވަނަ އަހަރުގެ ކުރިން އަލުން އިންސާނުން ހަނދަށް ފޮނުވާށެވެ.
އެސް.އެލް.އެސް.އާއި އޮރާޔަން އުފައްދާފައި ވަނީ ގިނަ ޤައުމުތަކެއްގެ ބައިވެރިވުމާ އެކުއެވެ. އެމެރިކާގެ އިތުރުން ވިލާތުގެ ޤައުމުތަކާއި ކެނެޑާ އަދި ޖަޕާނުގެ ޖައްވީ އިދާރާތަކުން މި ޕުރޮގުރާމުގައި ބައިވެރިވެއެވެ. މީގެ އިތުރުން، ޖައްވަށް ދަތުރުކުރާ އަމިއްލަ ކުންފުންޏެއް ކަމުގައިވާ ސްޕޭކްސް-އެކްސް ވެސް މި ޕުރޮގުރާމުގައި ބައިވެރިވެއެވެ.
އިންސާނުން އަލުން ހަނދަށް ފޮނުވުމަށް ހިންގާ މި ޕުރޮގުރާމަށް ނާސާއިން މިހާތަނަށް 37 ބިލިޔަން ޑޮލަރު ވަނީ ޚަރަދުކޮށްފައެވެ. އަދި، 2025 ވަނަ އަހަރުގެ ކުރިން މި ޕުރޮގުރާމަށް 93 ބިލިޔަން ޑޮލަރު ޚަރަދުވާނެ ކަމަށް ބެލެވެއެވެ. މި ޕުރޮގުރާމުގެ ދަށުން ހަނދަށް ދަތުރު ކުރާ އެސްޓްރޮނޯޓުންނަށް އެ ތަނުގައި ދިރިއުޅެވޭނެ ޚާއްޞަ މަރުކަޒެއް ވެސް ބިނާ ކުރާނެއެވެ. މި މަރުކަޒު ބޭނުން ކުރާނީ އިންސާނުން މާސްއަށް ދަތުރު ކުރުމުގެ ކުރިން ކުރަން ޖެހޭ ދިރާސާތައް ކުރުމަށެވެ.