ރަޝިޔާއިން ވިލާތުގެ ޤައުމުތަކަށް ގޭސް ފޯރުކޮށްދޭން ބޭނުންކުރާ ނޯޑް ސްޓްރީމް 1 ހޮޅިތައް އަލުން ހުޅުވުން މުއްދަތެއް ނެތް ގޮތަށް ފަސްކޮށްފިއެވެ. ނޯޑް ސްޓްރީމް 1 އަކީ ޖަރުމަނުވިލާތު މަގުން ވިލާތުގެ ޤައުމުތަކަށް ރަޝިޔާއިން ޤުދުރަތީ ގޭސް ފޯރުކޮށްދޭން ބޮލްޓިކް ކަނޑުގެ އަޑީގައި އަޅާފައިވާ ހޮޅިތަކެކެވެ.
މަރާމާތުގެ މަސައްކަތްތަކެއް ކުރުމަށް ކަމަށް ބުނެ ރަޝިޔާއިން މީގެ ތިން ދުވަސް ކުރިން ވަނީ މި ހޮޅިތައް ބަންދު ކޮށްފައެވެ. އަދި، ސެޕްޓެންބަރު 3 ގައި ހޮޅިތައް އަލުން ހުޅުވައި، ވިލާތަށް ގޭސް ގުޅައިދިނުމަށް ކުރިން ހަމަޖެހިފައި އޮތް ނަމަވެސް، ހޮޅިތައް އަދިވެސް ހުޅުވާފައެއް ނުވެއެވެ.
މި ހޮޅިތަކުން ވިލާތަށް ގޭސް ފޯރުކޮށްދެނީ ރަޝިޔާގެ މައި ގޭސް ކުންފުނި ކަމުގައިވާ ގޭޒްޕްރޮމްއިންނެވެ. އެ ކުންފުނިން ބުނީ، ހޮޅިތައް އަޅުން ހުޅުވުން ފަސްކޮށްފައި ވަނީ، އިތުރު މަރާމާތުތަކެއް ކުރަން ޖެހުމުން ކަމުގައެވެ. ޕޮރްޓޮވާޔާ ކޮންޕްރެސަރ ސްޓޭޝަންގައި ބޭނުން ކުރާ ޓަރބައިނެއް ހަލާކުވެ، ތެޔޮ ލީކުވަމުންދާ ކަމުގައި އެ ކުންފުނިން ބުންޏެވެ. އަދި، މަރާމާތައް ފަހު ހޮޅިތައް އަލުން ހުޅުވޭނެ ތާރީޚެއް އެ ކުންފުނިން ބުނެފައެއް ނުވެއެވެ.
ހޮޅިތައް މަރާމާތު ކުރުމުގެ މަސައްކަތް ހަވާލުކޮށްފައި އޮންނަނީ ސީމަންސް އެނަރޖީ ކިޔާ ކުންފުންޏަކާއެވެ. އެ ކުންފުނިން ބުނީ، ޕޮރްޓޮވާޔާ ކޮމްޕްރެސަރ ސްޓޭޝަންގެ އެންމެ ޓަރބައިންއެއް ހަލާކުވުމުގެ ސަބަބުން ގޭސް ފޯރުކޮށްދިނުން ހުއްޓޭނެ ކަމަށް ޤަބޫލު ނުކުރެވޭ ކަމުގައެވެ. އަދި، ޓަރބައިނެއް ހަލާކުވެ، ތެޔޮ ލީކުވަމުންދާ ކަން ގޭޒްޕްރޮމްއިން އެ ކުންފުންޏަށް އަންގާފައި ނުވާ ކަމަށާއި، މަރާމާތު ކުރުމަށް ވެސް އެދިފައި ނުވާ ކަމުގައެވެ.
ރަޝިޔާއިން ސިފައިން ވަނީ ފެބުރުއަރީ 24 ވަނަ ދުވަހު ޔޫކްރެއިނަށް އަރައި، ހަނގުރާމަ ފަށާފައެވެ. މި ކަމާ ގުޅިގެން އެމެރިކާއާއި ހުޅަނގުގެ ބާރުތަކުން ވަނީ ރަޝިޔާއާ ދެކޮޅަށް އިޤުތިޞާދީ ގޮތުން ދަތިކުރުމުގެ ފިޔަވަޅުތަކެއް އަޅާފައެވެ. ރަޝިޔާއިން ބުނަނީ، ނޯޑް ސްޓްރީމް 1 ހޮޅިތައް މަރާމާތު ކުރުމަށް ހުރަސް އެޅިފައި ވަނީ ދަތިކުރުމުގެ ފިޔަވަޅުތަކާ ގުޅިގެން ކަމުގައެވެ.
މިއީ، ދަތިކުރުމުގެ ފިޔަވަޅުތަކުގެ ރައްދުގައި ވިލާތުގެ ޤައުމުތަކަށް ޖެއްސުން ކުރުމުގެ ގޮތުން ރަޝިޔާއިން އަޅާފައިވާ ފިޔަވަޅެއް ކަމުގައި ވިލާތުގެ ޤައުމުތަކުން ދެކެއެވެ. ޔޫރަޕިއަން ކޮމިޝަންގެ ރައީސާ އުރްސުލާ ފޮންޑެ ލަޔަން ވަނީ، ރަޝިޔާއިން ފޯރުކޮށްދޭ ގޭހުގެ އަގު ކޮންޓްރޯލް ކުރުމަށް ހުށަހަޅާފައެވެ. އަދި، ގޭހަކީ ހަތިޔާރެއްގެ ގޮތުގައި ރަޝިޔާއިން ބޭނުން ކުރަމުންދާ ކަމުގައި ވެސް ފޮންޑެ ލަޔަން ތުހުމަތު ކުރައްވައެވެ. ނަމަވެސް، ރަޝިޔާއިން މި ތުހުމަތުތައް ދޮގު ކުރެއެވެ.
ރަޝިޔާ-ޔޫކްރެއިން ހަނގުރާމައާ ގުޅިގެން ތަކެތީގެ އަގުތައް ދަނީ އުފުލެމުންނެވެ. އެންމެ ބޮޑަށް އަސަރުކޮށްފައި ވަނީ ތެލާއި ގޭހުގެ އަގަށެވެ. ރަޝިޔާއިން ވިލާތަށް ގޭސް ފޯރުކޮށްދޭ މިންވަރު ކޮންޓްރޯލް ކުރުމާ ގުޅިގެން، ވިލާތުގެ ޤައުމުތަކުގައި ގޭހުގެ އަގު ވަނީ އިންތިހާއަށް އުފުލިފައެވެ. 2021 އޮގަސްޓުން ފެށިގެން ވިލާތުގެ ޤައުމުތަކުގައި ބޭނުން ކުރާ ގޭހުގެ އަގު ވަނީ 400 އިންސައްތައަށް އުފުލިފައެވެ.
މި ކަމާ ގުޅިގެން ކުރިއަށް އޮތް ފިނި މޫސުމުގައި ވިލާތުގެ އިއްތިހާދުގެ ޤައުމުތަކުގެ ރައްޔިތުންނަށް ބޮޑެތި ދަތިތަކާ ކުރިމަތިލާން ޖެހޭނެއެވެ. ސަބަބަކީ، ރަޝިޔާއިން ފޯރުކޮށްދޭ ގޭހަކީ ވިލާތުގެ ޤައުމުތަކުގައި ގޭތެރޭގެ ފިނިހޫނުމިން ކޮންޓްރޯލް ކުރުމަށް ބޭނުން ކުރާ މައިގަނޑު ވަސީލަތެވެ. މި ކަމާ ގުޅިގެން ގޭސް ބޭނުން ކުރާ މިންވަރު ދަށް ކުރުމަށް ވިލާތުގެ ޤައުމުތަކުން ދަނީ އެ ޤައުމުތަކުގެ ރައްޔިތުންނަށް އިރުޝާދު ދެމުންނެވެ.