މެދުކެނޑުމަކަށްފަހު ހޮޓެލް އޭޝިއާ އެގްޒިބިޝަން އެންޑް ކަލިނަރީ ޗެލެންޖް މިއަހަރު ބާއްވަން ނިންމައިފިއެވެ. ހޮޓެލް އޭޝިއާއަކީ ކެއްކުމުގެ ހުނަރުތަކާއެކު އެގްޒިބިޝަނެއް ހިމެނޭގޮތައް ރާއްޖޭގައި ބާއްވާ ބައިނަލްއަޤްވާމީ އެންމެބޮޑު ހޮސްޕިޓާލިޓީ ޙަރަކާތެވެ.
މިއީ ވިޔަފާރިތަކަށް އެއްތަނަކުން ބައްދަލުކޮށް ވިޔަފާރީގެ ގުޅުން ބަދަހިކުރުމަށް މަގުފަހިކޮށްދިނުމަށް ބާއްވާ ފެއަރއެކެވެ. ކޮންމެ އަހަރަކުވެސް ހޮޓެލް އޭޝިއާގައި ޕްރޮފެޝަނަލް ޝެފުންގެ ކަލިނަރީ އާޓްސްގެ ހުނަރުތައް ދައްކާލުމުގެ ފުރުސަތު ދިނުމަށް "ކަލިނަރީ ޗެލެންޖް" ސެގްމެންޓް ކުރިޔަށް ގެންދެއެވެ.
ހޮޓެލް އޭޝިއާ ފެއަރ ބާއްވާތާ 15 އަހަރު ވަނީ ވެފައެވެ. ނަމަވެސް ކޯވިޑް-19އާ ގުޅިގެން ފާއިތުވި 2 އަހަރުވެސް މި ފެއަރ ވަނީ ކެންސަލްކޮށްފައެވެ. މިއަހަރުގެ ހޮޓެލް އޭޝިއާ އޮންނާނީ އޮކްޓޯބަރ މަހުގެ 10އިން 12އަށެވެ. މިފަހަރުގެ ފެއަރ އޮންނާނީ ދަރުބާރުގޭގައެވެ.
މިއަހަރުގެ އެގްޒިބިޝަންގައި 175 އަށްވުރެ ގިނަ ސްޓޯލް ހުންނާނެއެވެ. އަދި ކަލިނަރީ ޗެލެންޖްގައި 20 ކެޓަގަރީއަކުން ދުނިޔޭގެ އެކި ކަންކޮޅުތަކުން 500 ޝެފުން ވާދަކުރާނެއެވެ.
ހޮޓެލް އޭޝިއާ މިއަހަރުވެސް އިންތިޒާމުކުރަނީ މޯލްޑިވްސް އެގްޒިބިޝަން އެންޑް ކޮންފަރެންސް ސަރވިސަސް (މެކްސް) އަދި ލަންކާ އެގްޒިބިޝަން އެންޑް ކޮންފަރެންސް ސަރވިސަސް (ލެކްސް) އަދި ބެސްޓެބައި މޯލްޑިވްސްއިން ގުޅިގެންނެވެ.