ހައުސިން ޑިވެލޮޕްމަންޓް ފައިނޭންސް ކޯޕަރޭޝަން، އެޗްޑީއެފްސީގެ ޑިރެކްޓަރުންގެ ބޯޑުގެ މެމްބަރު ކަމަށް ޚާލިދް ސުލައިމާން އައްޔަންކޮށްފައެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވިދާޅުވީ، އެކުންފުނީގެ ބޯޑު މެމްބަރަކަށް އައްޔަންކޮށްފައި ވަނީ ޅ. ހިންނަވަރު، ލަންދޫގެ، ޚާލިދް ސުލައިމާން ކަމަށެވެ.
ހާލިދް ސުލައިމާންގެ އިތުރުން އެޗްޑީއެފްސީގެ ބޯޑުގައި މިހާރު ތިއްބަވަނީ ނުވަ ބޭފުޅުންނެވެ. އެއީ ބޯޑުގެ ނޮމިނީ ކޮންރެޑް ޑި ޝޫޒާ، އަލްޓަނޭޓް ޑައިރެކްޓަރ އާސިފް ސައީދު ޗީމާ، މެނޭޖިން ޑިރެކްޓަރ ރަހީމާ ސަލީމް، ނޮމިނީ ޑައިރެކްޓަރ އަމީނާ އަރީފު، ނޮމިނީ ޑައިރެކްޓަރ، ކޯހޭ ނޫރް ބިންތް މަހުމޫދުލް ހަސަން، ނޮމިނީ ޑައިރެކްޓަރ ހާމިދު ޞާދިގު، އިންޑިޕެންޑެންޓް ޑައިރެކްޓަރ މުހައްމަދު އަހުމަދު، އިންޑިޕެންޑެންޓް ޑައިރެކްޓަރ އައިޝަތު ޝިޒްނާ އަދި އަލްޓަނޭޓް ޑައިރެކްޓަރ މުހައްމަދު ޒުހެއިރުއެވެ.
އެޗްޑީއެފްސީއަކީ ގެދޮރުގަތުމަށް ބޭނުންވާ މާލީ އެހީތެރިކަން ދިނުމަށް 2004 ވަނަ އަހަރު ރައީސުލްޖުމްހޫރިއްޔާގެ ޚާއްސަ ގަރާރެއްގެ ދަށުން، އުފެއްދި ކުންފުންޏެކެވެ. އެކުންފުނި ޕަބްލިކް ލިމިޓެޑް ކުންފުންޏަކަށް ބަދަލުކޮށް، ކުންފުނީގެ 51 އިންސައްތަ ހިއްސާ ބޭރުގެ ބައެއް ފަރާތްތަކަށް ވިއްކާލާފައި ވަނީ 2008 ވަނަ އަހަރުއެވެ.