މާލެއިން ފުރައިގެން ނ.އަތޮޅަށް ދަތުރުކުރި ބޯޓެއް ފަރަށް އަރައިފިއެވެ.
އެމްއެންޑީއެފް އިން ބުނީ، މާލެއިން ފުރައިގެން ނ.އަތޮޅަށް ދަތުރު ކުރަމުންއައި "ލަންދޫ ބޯޓު" ވަނީ ދިޔަވެ ކ.ގާފަރު ފަރަށް އަރާފައިކަމަށެވެ. ފަރަށް އެރި ބޯޓަށް އެހީތެރިކަން ފޯރުކޮށްދިނުމުގައި ގާފަރު ރައްޔިތުންގެ އިތުރުން، އެ ސަރަހައްދުން ދަތުރުކުރަމުންދިޔަ އެހެން އުޅަނދުތައްވެސް ހަރަކާތްތެރިވަމުންދާ ކަމަށް އެމްއެންޑީއެފްއިން ހާމަކުރެއެވެ.
މި ހާދިސާގެ މަޢުލޫމާތު ލިބިފައިވަނީ 10:55 ހާއިރު ކަމަށް އެމްއެންޑީއެފް އިން ބުނެއެވެ. އެބޯޓުގައި ތިބީ ކިހާ ބަޔަކުކަމެއް އަދި ސާފުނުވާކަމަށާއި، ބޯޓުގައި ތިބި ބަޔަކު، މިހާރު ގާފަރަށް ގެންގޮސްފައިވާކަމަށް މަޢުލޫމާތު ލިބިފައިވާކަމަށްވެސް އެމްއެންޑީއެފް އިން ބުނެއެވެ.
އެމްއެންޑީއެފް އިން ބުނީ ކޯސްޓްގާޑު އެ ސަރަހައްދަށް ދަތުރުކުރަމުން އަންނަކަމަށެވެ.
މިދުވަސްވަރަކީ މޫސުން ގޯސްވެ، ކަނޑުގަދަ ދުވަސްވަރެއްކަމުން، މޫސުމަށް ސަމާލުކަން ދީގެން ދަތުރުފަތުރުކުރުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.