އީރާނުން ހިންގާ ނިއުކްލިޔަރ ޕުރޮގުރާމުގެ ދަށުން ޔުރޭނިއަމް މުއްސަނދި ކުރުމުގެ މަސައްކަތް އިތުރަށް އަޕްގްރޭޑުކޮށް ފުޅާ ކުރަމުންދާ ކަމަށް އެޓޮމިކް ހަކަތައާ ބެހޭ ބައިނަލްއަޤުވާމީ އިދާރާ (އައި.އޭ.އީ.އޭ)އިން ބުނެފިއެވެ. އެ އިދާރާގެ ރިޕޯޓަކުން މި ކަން ހާމަވެފައި މި ވަނީ، އެ ޤައުމުގެ ނިއުކްލިޔަރ ހަކަތަ އުފެއްދުމުގެ ޕުރޮގުރާމު މަޑުޖައްސައިލުމަށް 2015 ވަނަ އަހަރު ހަދާފައިވާ އެއްބަސްވުމަށް އަލުން ރުޖޫޢަވުމަށް މަސައްކަތް ކުރަމުންދާ ދަނޑިވަޅެއްގައެވެ.
އައި.އޭ.އީ.އޭ.އިން ބުނީ، އީރާނުން ނަތަންޒްގައި ޤާއިމު ކޮށްފައިވާ ބިމުއަޑީގެ ދިރާސާ ކުރާ މަރުކަޒުގައި "އައި.އާރް-6 މަރުކާގެ އައު ސެންޓްރިފިއުޖް" ތަކެއް ބަހައްޓައި، ބޭނުން ކުރަން ފަށާފައިވާ ކަމުގައެވެ. މިއީ ޔުރޭނިއަމް މުއްސަނދި ކުރުމަށް ބޭނުން ކުރާ އެންމެ ފަހުގެ އާލާތްތައް ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
މި އާލާތްތައް ބޭނުން ކޮށްގެން، 60 އިންސައްތައިގެ މިނަށް ޔުރޭނިއަމް މުއްސަނދި ކުރަމުންދާ ކަމަށާއި، މިއީ ނިއުކްލިޔަރ ހަތިޔާރެއް އުފެއްދުމަށް ބޭނުންވާ މިންވަރާ ގާތް އަދަދެއް ކަމަށް މާހިރުން ބުނެއެވެ. ނަތަންޒްގެ އިތުރުން، އެހެން ސަރަޙައްދުތަކުގައި ޤާއިމު ކޮށްފައިވާ ދިރާސާ ކުރާ މަރުކަޒުތަކުގައި ވެސް ޔުރޭނިއަމް މުއްސަނދި ކުރުމުގެ މަސައްކަތް އެ ޤައުމުން ފަށާފައިވާ ކަމުގައި އައި.އޭ.އީ.އޭ.ގެ ރިޕޯޓުން ހާމަވެއެވެ.
އީރާނުގެ ނިއުކްލިޔަރ ހަކަތަ އުފެއްދުމުގެ ޕުރޮގުރާމު މަޑުޖައްސައިލުމަށް އެ ޤައުމާއި އެމެރިކާއާ ދެމެދު ވަނީ އެއްބަސްވުމެއް ހަދާފައެވެ. އަދި، ނިއުކްލިޔަރ ޕުރޮގުރާމާ ގުޅިގެން ހުޅަނގުން އީރާނާ ދެކޮޅަށް އިޤްތިޞާދީ ގޮތުން އަޅާފައިވާ ދަތިކުރުމުގެ ފިޔަވަޅުތަކަށް ލުޔެއް ދީފައެވެ. ނަމަވެސް، 2018 ވަނަ އަހަރު އެމެރިކާއިން ވަނީ މި އެއްބަސްވުން ރޫޅައިލާފައެވެ.
ނަމަވެސް، އީރާނާއި އެމެރިކާއިން ދަނީ މި އެއްބަސްވުމަށް އަލުން ރުޖޫޢަވުމާ ގުޅޭ ގޮތުން ނުރަސްމީ ވާހަކަތައް ބާއްވަމުންނެވެ. އަދި، މަޝްވަރާތަކަށް މިހާރު ވަނީ ކުރިއެރުންތަކެއް ވެސް ލިބިފައެވެ. އައި.އޭ.އީ.އޭ.ގެ އައު ރިޕޯޓުގައި ހާމަވެފައިވާ މަޢުލޫމާތާ އެކު އެއްބަސްވުމަށް ރުޖޫޢަވުމަށް ކުރަމުންދާ މަސައްކަތްތަކަށް ހީނަރުކަން އަންނާނެ ކަމަށް ބެލެވެއެވެ.
އެމެރިކާއާއި ހުޅަނގުގެ ބާރުތަކުން ތުހުމަތު ކުރާ ގޮތުގައި އީރާނުން ދަނީ ނިއުކްލިޔަރ ހަތިޔާރު އުފައްދަން މަސައްކަތް ކުރަމުންނެވެ. ނަމަވެސް، އީރާނުން ދަނީ މި ތުހުމަތުތައް ދޮގު ކުރަމުންނެވެ. އެ ޤައުމުން ބުނަނީ، ނިއުކްލިޔަރ ޕުރޮގުރާމަކީ މަދަނީ ބޭނުންތަކަށް ހަކަތަ އުފެއްދުމަށް ހިންގާ ޕުރޮގުރާމެއް ކަމުގައެވެ.