ރަޝިޔާއާއި ޔޫކްރެއިނުގެ ފައުޖުތަކާ ދެމެދު ކުރަމުންދާ ހަނގުރާމައިގައި ޔޫކްރެއިނުގެ އެނެރްހޮޑާރްގައި ހުންނަ ޒަޕޮރީޜިޔާ ނިއުކްލިޔަރ ހަކަތަ އުފައްދާ ޕްލާންޓަށް ލިބިފައިވާ ގެއްލުންތައް ދިރާސާކޮށް، އެ ތަނުގެ ހާލަތު ދެނެގަތުމަށް އެޓޮމިކް ހަކަތައާ ބެހޭ ބައިނަލްއަޤުވާމީ އިދާރާ (އައި.އޭ.އީ.އޭ)ގެ ވަފުދެއް އެ ރަށަށް ދިޔުމަށް ދަތުރު ފަށައިފިއެވެ. ރަޝިޔާ ސިފައިން ޔޫކްރެއިނުގެ ދެކުނުގައިވާ ޒަޕޮރީޜިޔާ ނިއުކްލިޔަރ ޕްލާންޓު ހިފާފައި ވަނީ މާރިޗު މަހުގެ ތެރޭގައެވެ.
ހަނގުރާމައިގައި ދެ ފަރާތުން ދެމުންދާ ހަމަލާތަކުގައި ޒަޕޮރީޜިޔާ ޕްލާންޓަށް ވަނީ ގެއްލުން ލިބިފައެވެ. އެ ޕްލާންޓަށް އަރާފައިވާ ހަމަލާތަކުގެ ޒިންމާ އެއްވެސް ޤައުމަކުން އުފުލާފައެއް ނުވެއެވެ. ނަމަވެސް، ޕްލާންޓު ކައިރީގައި ހަނގުރާމަ ކުރަމުން ދިއުމާ ގުޅިގެން، އެ ތަނަށް ގެއްލުންވެ، ނިއުކްލިޔަރ ކާރިސާއެއް ހިނގައިފާނެ ކަމުގެ ބިރު ވަނީ އިތުރުވެފައެވެ.
"އެއީ ވިލާތުގެ ސަރަޙައްދުގައި ހުންނަ އެންމެ ބޮޑު ނިއުކްލިޔަރ ޕްލާންޓް. އެ ތަނުގެ ސަލާމަތާއި ރައްކާތެރިކަން ކަށަވަރު ކުރުމަކީ އެންމެންގެ ޒިންމާއެއް،" އައި.އޭ.އީ.އޭ.ގެ އިސްވެރިޔާ ރަފަޔަލް ގްރޮޓްސީ ވިދާޅުވިއެވެ. އައި.އޭ.އީ.އޭ.ގެ ވަފުދެއް މި ހަފުތާގެ ފަހުކޮޅު ޒަޕޮރީޜިޔާއަށް ދާނެ ކަމަށް އޭނާ ވިދާޅުވިއެވެ.
ޒަޕޮރީޜިޔާ ނިއުކްލިޔަރ ޕްލާންޓު ކައިރީގައި ހަމަލާ ބަދަލުކުރުން ހުއްޓައިލާ، އެ ތަނުގެ ސަލާމަތާއި ރައްކާތެރިކަން ކަށަވަރު ކުރުމަށް އ.ދ.އިން ވަނީ ދެ ޤައުމަށް ވެސް ގޮވައިލާފައެވެ. އަދި، ޔޫކްރެއިނުން ވަނީ، އެ ސަރަޙައްދުގައި ހަރަކާތްތެރިވާ ރަޝިޔާ ސިފައިން އެ ސަރަޙައްދު ދޫކޮށް ދިއުމަށް ވެސް ގޮވައިލާފައެވެ. އެ ތަން އޮތީ ރަޝިޔާގެ އަތްދަށުގައި ނަމަވެސް، ޕްލާންޓުގައި މަސައްކަތް ކުރަނީ ޔޫކްރެއިނުގެ މުވައްޒަފުންނެވެ.
އެ ތަނަށް ދީފައިވާ ހަމަލާތަކާ ގުޅިގެން ނިއުކްލިޔަރ ރޭޑިއޭޝަން ލީކުވުމުގެ ހާދިސާއެއް ހިނގައިފާނެތީ، ޒަޕޮރީޜިޔާގެ އޮފިޝަލުން ދަނީ ރައްކާތެރިކަމުގެ ފިޔަވަޅުތައް އަޅަމުންނެވެ. އަދި، އެ ފަދަ ހާލަތެއްގައި އަމަލު ކުރާނެ ގޮތް އެ ސަރަޙައްދުގައި ދިރިއުޅޭ ރައްޔިތުންނަށް ކިޔައިދެމުންނެވެ.
ޒަޕޮރީޜިޔާ ޕްލާންޓު ހުންނަ ސަރަޙައްދަށް ހަމަލާ ދިނުން ހުއްޓައިލުމަން ބައިނަލްއަޤްވާމީ މުޖުތަމަޢުން ގޮވައިލަމުން ދިޔަ ނަމަވެސް، ހަމަލާތަކަށް ހުއްޓުމެއް އައިސްފައެއް ނެތެވެ. ޔޫކްރެއިނުން ބުނީ، އޮގަސްޓު 28 ގައި ވެސް ރަޝިޔާގެ ފައުޖުތަކުން އެ ތަނަށް ހަމަލާ ދީފައިވާ ކަމުގައެވެ. އަދި، ރަޝިޔާއިން ވެސް ބުނީ، ޔޫކްރެއިނުގެ ސިފައިން އެ ތަނަށް އާޓިލަރީ ބަޑީގެ ހަމަލާތައް ދެމުންދާ ކަމުގައެވެ.