ރަޝިޔާއިން ސިފައިންގެ އަދަދު އިތުރު ކުރަނީ

ރަޝިޔާގެ އަސްކަރިއްޔާގެ ސިފައިންގެ އަދަދު އިތުރު ކުރަން އެ ޤައުމުގެ ރައީސް ވްލަޑިމިއަރ ޕުޓިން ނިންމަވައިފިއެވެ. މި. ނިންމުމާ ގުޅިގެން އެ ޤައުމުގެ އަސްކަރިއްޔާއިން ވަނީ ވަޒީފާތަކަށް އިތުރު މީހުން ހޯދުމުގެ ކެމްޕޭނެއް ފަށާފައެވެ. އަލަށް ރެކްރޫޓު ކުރާ ސިފައިންގެ ތެރެއިން 137,000 އަކީ ހަނގުރާމައިގެ ކުރީ ސަފުގައި ހަރަކާތްތެރިވުމަށް ހޯދާ މީހުންނެވެ.

ޕުޓިން ނިންމަވާފައި ވަނީ ރަޝިޔާގެ އަސްކަރިއްޔާގެ ސިފައިންގެ އަދަދު 2.04 މިލިޔަނަށް އިތުރު ކުރުމަށެވެ. އެ ޤައުމުގެ އަސްކަރިއްޔާގައި މިހާރު ވެސް މަސައްކަތް ކުރަމުންދާ ސިފައިންގެ އަދަދު 1.9 މިލިޔަނަށް އަރައެވެ. އޭގެ ތެރޭގައި ހިމެނެނީ މިލިޔަނެއްހާ ސިފައިންނާއި، 900,000 އެއްހާ ސިވިލް ސަރވިސް މުވައްޒަފުންނެވެ. ރަޝިޔާއިން ޔޫކްރެއިނާ ދެކޮޅަށް ކުރަމުންދާ ހަނގުރާމައިގައި އެ ޤައުމުގެ ގިނަ އަދަދެއްގެ ސިފައިން މަރުވެފައިވާ ކަމަށް މަސްރަޙު ދިރާސާ ކުރާ ފަރާތްތަކުން ބުނެއެވެ. ޔޫކްރެއިނުން ބުނީ، ހަނގުރާމައިގައި މިހާތަނަށް 45,000 އަށްވުރެ ގިނަ ރަޝިޔާ ސިފައިން މަރުވެ، ޒަޚަމުވެފައިވާ ކަމުގައެވެ. މި އަދަދު 80,000 އާ ގާތް ކުރާނެ ކަމުގައި ހުޅަނގުގެ ޤައުމުތަކުން ބުނެއެވެ. ނަމަވެސް، ރަޝިޔާއިން މިހާތަނަށް ހާމަކޮށްފައި ވަނީ އެންމެ 1,351 ސިފައިންގެ މަރުގެ މަޢުލޫމާތެވެ.

ރަޝިޔާއިން ސިފައިންގެ އަދަދު އިތުރު ކުރި ނަމަވެސް، ޔޫކްރެއިނުގައި ކުރަމުންދާ ހަނގުރާމައިގެ ނަތީޖާއަށް އެއްވެސް ބަދަލެއް އަންނާނެ ކަމަކަށް ހުޅަނގުގެ ޤައުމުތަކުން ޤަބޫލެއް ނުކުރެއެވެ. އަދި، އެކި ކުށްތަކުގައި ހުކުމް ތަންފީޒު ކުރަމުންދާ ޤައިދީންނަށް ވެސް އަސްކަރިއްޔާގެ ވަޒީފާ ދިނުމަށް ޕުޓިން ހުށަހަޅުއްވާފައިވާ ކަމުގައި ހުޅަނގުން ތުހުމަތު ކުރެއެވެ.

ފާއިތުވި ފަސް އަހަރުގެ ތެރޭގައި އަސްކަރީ ވަޒީފާތައް އަދާކޮށްފައިވާ މީހުންގެ އަދަދުތައް ހިމަނައިގެން ބަލާއިރު ރަޝިޔާގެ އަސްކަރިއްޔާގެ ސިފައިންގެ އަދަދު 2.9 މިލިޔަނަށް އަރާނެއެވެ. އެއީ، 900,000 އެކްޓިވް ސިފައިންނާއި، 2 މިލިޔަނެއްހާ ރިޒަރވް ސިފައިން ހިމެނޭ ގޮތުންނެވެ. ޔޫކްރެއިނުގެ އަސްކަރިއްޔާގެ އަދަދުތަކަށް ބަލައިލާއިރު، އެ ޤައުމުގެ ސިފައިންގެ އަދަދު 1.09 މިލިޔަނަށް އަރައެވެ. މީގެ ތެރޭގައި ހިމެނެނީ 196,000 އެކްޓިވް ސިފައިންނާއި 900,000 ރިޒަރވް ސިފައިންނެވެ.