ލީބިޔާގެ ވެރިރަށް ތަރާބުލުސްގައި އިދިކޮޅު ފެކްޝަންތަކުގެ މެދުގައި ހިނގަމުންދާ ހަމަނުޖެހުންތަކުގައި 27 މީހުން މަރުވެއްޖެއެވެ. މި ހަމަނުޖެހުންތަކުގައި މަރުވި މީހުންގެ ތެރޭގައި ޢާންމުންގެ 17 މީހުން ހިމެނޭ ކަމަށާއި، 80 އަށްވުރެ ގިނަ މީހުން ޒަޚަމުވެފައިވާ ކަމުގައި އެ ޤައުމުގެ ޞިއްޙަތާ ބެހޭ ވުޒާރާއިން ބުނެއެވެ.
މި ހަމަނުޖެހުންތައް ހިނގާފައި ވަނީ، އެ ޤައުމުގައި އެކުލަވައިލާފައިވާ ވަގުތީ ސަރުކާރަށް ތާޢީދުކުރާ ހަތިޔާރު އެޅި ޖަމާޢަތްތަކާއި، އެ ޤައުމުގެ ޤާނޫނު ހަދާ މަޖިލީހުން އެކުލަވައިލާފައިވާ ވަކި ސަރުކާރަކަށް ތާޢީދުކުރާ ހަތިޔާރު އެޅި ޖަމާޢަތްތަކާ ދެމެދެވެ. ވަކި ސަރުކާރުން ވެރިކަން ކުރަމުން ދަނީ ލީބިޔާގެ އިރުމަތީގައިވާ މިޞްރާތާގައެވެ.
ލީބިޔާގައި ޤާއިމު ކޮށްފައިވާ ވަގުތީ ސަރުކާރުގެ ބޮޑުވަޒީރަކީ ޢަބްދުލްޙާމިދު އަލްދުބައިބާއެވެ. ނަމަވެސް، ލީބިޔާގެ ޤާނޫނު ހަދާ މަޖިލީހުން ވަނީ އޭނާގެ މަޤާމުގެ ދައުރު ހަމަވެފައިވާ ކަމަށް ބުނެ، އޭނާގެ ބަދަލުގައި ބޮޑުވަޒީރު ކަމުގެ މަޤާމަށް ފާތީ ބަޝާޣާ ޢައްޔަން ކޮށްފައެވެ. ނަމަވެސް، ވެރިކަން ދޫކޮށްލައްވަން އަލްދުބައިބާ އެއްބަސްވެފައެއް ނުވެއެވެ. އޭނާ ވިދާޅު ވަނީ، ވެރިކަން ދޫކޮށްލައްވާނީ އިންތިޚާބެއް ބޭއްވުމަށް ފަހުގައި ކަމުގައެވެ.
މި ކަމާ ގުޅިގެން ފާތީ ބަޝާޣާ ވަނީ ލީބިޔާގެ އިރުމަތީގައިވާ މިޞްރާތާގެ ވަކި ސަރުކާރުން ޤާއިމުކޮށްފައެވެ. ބަޝާޣާއަކީ އެ ސަރަޙައްދުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ލީބިޔަން ނޭޝަނަލް އާމީ (އެލް.އެން.އޭ)ގެ އިސްވެރިޔާ ޚަލީފާ ޙަފްތާރަށް ވާގިވެރިވާ ބޭފުޅެކެވެ. އޮގަސްޓު 27 ގެ ހަމަނުޖެހުންތައް ފެށުނީ، އެލް.އެން.އޭ.ގެ ހަނގުރާމަވެރިން ވެރިރަށް ތަރާބުލުސްއަށް އަރައި، އެ ރަށުގެ ސަރަޙައްދުތައް ހިފަން މަސައްކަތް ކުރުމުންނެވެ.
ނަމަވެސް ލީބިޔާގެ އަސްކަރިއްޔާއާއި އަލްދުބައިބާއަށް ތާޢީދު ކުރާ ހަތިޔާރު އެޅި ޖަމާޢަތްތަކުން ވަނީ އެލް.އެން.އޭ.ގެ ހަނގުރާމަވެރިންނަށް ހުރަސް އަޅާފައެވެ. އަލްދުބައިބާއާއި ބަޞާޣާއަށް ތާޢީދު ކުރާ ފަރާތްތަކާ ދެމެދު މަޝްވަރާތައް ބާއްވައި، ލީބިޔާގެ ދާޚިލީ ހަމަނުޖެހުންތަކަށް ޞުލްޙަވެރި ހައްލެއް ގެނައުމަށް ދަނީ މަސައްކަތް ކުރަމުންނެވެ. ދެ ފެކްޝަނުން ވެސް މަސައްކަތް ކުރަމުން ދަނީ ވަގުތީ ސަރުކާރު ހިންގުމުގެ ޒިންމާތައް މަތިކޮށްފައިވާ ޕްރެޑިޒެންސީ ކައުންސިލުގެ ބާރުވެރިކަން ހޯދުމަށެވެ.