މި އަހަރުގެ ތެރޭގައި ވިލާތުގެ ޤައުމުތަކުގައި ޤަދުރަތީ ގޭހުގެ އަގު ވަނީ ދިހަ ގުނައަށް އުފުލިފައެވެ. އިނގިރޭސި ވިލާތުގައި ޤުދުރަތީ ގޭހުގެ އަގު ފެބުރުވަރީ މަހު ހުރީ "ތަރމް"އެއް 36 ޕެންސްގެ ރޭޓުގައެވެ. ނަމަވެސް، މި ހިނގާ އޮގަސްޓު މަހުގެ ތެރޭގައި ތަރމްއެއްގެ އަގު ވަނީ 537 ޕެންސަށް އުފުލިފައެވެ. ތަރމްއަކީ ޤުދުރަތީ ގޭސް ބޭނުން ކުރާ މިންވަރު ކަނޑައެޅުމަށް ބޭނުންކުރާ މިންގަނޑެކެވެ.
އިނގިރޭސި ވިލާތުގެ ގޭބީސީތަކުގައި ޤުދުރަތީ ގޭސް ޢާންމު ގޮތެއްގައި ބޭނުން ކުރަނީ ކެއްކުމާއި، ފިނި މޫސުމުގައި ފެނާއި ގޭތެރޭގެ ފިނިހޫނުމިން ކޮންޓްރޯލް ކުރުމަށެވެ. އިނގިރޭސި ވިލާތުގެ 78 އިންސައްތަ ގޭބީސީތަކުގައި ފިނިމޫސުމުގައި ފިނިހޫނުމިން ކޮންޓްރޯލް ކުރުމަށް ބޭނުން ކުރަނީ ޤުދުރަތީ ގޭހެވެ. މީގެ އިތުރުން، 2021 ވަނަ އަހަރު އިނގިރޭސި ވިލާތުގެ އިންޖީނުގެތަކުން އުފައްދާފައިވާ ކަރަންޓުގެ 40 އިންސައްތަ އުފައްދާފައި ވަނީ ޤުދުރަތީ ގޭސް ބޭނުން ކޮށްގެންނެވެ.
ކޮވިޑް-19ގެ ބަލިމަޑުކަމާ އެކު ޤައުމުތަކުގައި އަމަލު ކުރަމުން ދިޔަ ފުރަބަންދުތައް އުވައިލައި، މަޑުޖެހިފައި އޮތް އިޤްތިޞާދުތައް ހިނގައިގަންނަން ފެށުމާ އެކު ހަކަތައިގެ އަގުތައް އުފުލެން ފެށިއެވެ. އޮފީސްތަކާއި، ސިނާޢީ މަސައްކަތް ކުރާ ކާރުޚާނާތައް ހިންގުމަށް އިތުރަށް ހަކަތަ ބޭނުން ކުރަން ޖެހުނެވެ.
މި އަހަރު ފެށުމާ އެކު ހަކަތައިގެ އަގު އިތުރަށް އުފުލިގެން ދިޔައެވެ. ސަބަބަކަށް ވީ، ރަޝިޔާއާއި ޔޫކްރެއިނާ ދެމެދު ފެށި ހަނގުރާމައެވެ. ރަޝިޔާއަކީ ވިލާތުގެ ޤައުމުތަކަށް ތެލާއި ގޭސް އެންމެ ގިނަ އަދަދަކަށް ފޯރުކޮށްދޭ އެއް ޤައުމެވެ. އެ ޤައުމުގައި ބޭނުން ކުރާ ޤުދުރަތީ ގޭހުގެ 40 އިންސައްތަ ވިއްކަނީ ރަޝިޔާއިންނެވެ. 2021 ވަނަ އަހަރު ރަޝިޔާއިން ވަނީ 241.3 ބިލިޔަން ކިޔުބިކް މީޓަރުގެ ގޭސް ވިއްކާފައެވެ.
ޔޫކްރެއިން ހަނގުރާމައާ ގުޅިގެން، ރަޝިޔާއާ ދެކޮޅަށް އަޅާ އިޤްތިޞާދީ ދަތިކުރުމުގެ ފިޔަވަޅެއްގެ ގޮތުން އެ ޤައުމުން ތެލާއި ގޭސް ގަންނަ މިންވަރު މަދު ކުރުމަށް ވިލާތުގެ ޤައުމުތަކުން މަސައްކަތް ފެށިއެވެ. ވިލާތުގެ އިއްތިހާދުން ވަނީ ރަޝިޔާއިން ގަންނަ ޤުދުރަތީ ގޭހުގެ މިންވަރު 15 އިންސައްތައިން ދަށް ކުރަން ނިންމާފައެވެ. މިއާއެކު، ރަޝިޔާ ނޫން އެހެން ޤައުމުތަކުން ވިއްކާ ޤުދުރަތީ ގޭހަށް އޮތް ޑިމާންޑު އިތުރުވެ، އަގުތައް އުފުލުނެވެ.
ރަޝިޔާ-ޔޫކްރެއިން ހަނގުރާމަ ފެށުމުގެ ކުރިން ޖަރުމަނު ވިލާތުގައި ބޭނުން ކުރާ ޤުދުރަތީ ގޭހުގެ 55 އިންސައްތަ ގަންނަނީ ރަޝިޔާއިންނެވެ. ނަމަވެސް، އެ އަދަދު މިހާރު ވަނީ 35 އިންސައްތައަށް ދަށްކޮށްފައެވެ. މި ކަމާ ގުޅިގެން، ރަޝިޔާއިން ވަނީ ވިލާތުގެ ޤައުމުތަކަށް ގޭސް ފޯރުކޮށްދޭ މިންވަރު ވެސް ދަށްކޮށްފައެވެ. އަދި ވިލާތުގެ ބައެއް ޤައުމުތަކަށް ގޭސް ވިއްކުން މުޅިން ހުއްޓައިލާފައެވެ.
ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އެޅުމާއެކު އެ ޤައުމުން ވިއްކާ ގޭހުގެ އަގު ރަޝިޔާގެ ފައިސާއިން ދެއްކުމަށް އެ ޤައުމުން އެދުނެވެ. ނަމަވެސް، ބައެއް ޤައުމުތަކުން ވަނީ މި ކަމާ ދެކޮޅު ހަދާފައެވެ. އަދި، ރަޝިޔާ ރޫބްލްއިން ފައިސާ ދެއްކުމަށް ދެކޮޅު ހެދި ޤައުމުތަކުގެ ތެރޭގައި ހިމެނޭ ބަލްގޭރިޔާ، ފިންލެންޑް، ޕޮލެންޑް، ޑެންމާކް އަދި ނެދަލެންޑްސްއަށް ގޭސް ވިއްކުން ރަޝިޔާއިން ހުއްޓައިލިއެވެ. އަދި، ވިލާތުގެ އެހެން ޤައުމުތަކަށް ވެސް ގޭސް ވިއްކުން މުޅިން ހުއްޓައިލަފާނެ ކަމުގެ ބިރު އޮތީ ހީވެފައެވެ.
ތެލާއި ގޭހުގެ އަގު އުފުލުމުން ފައިދާ ކުރަނީ އެ ތަކެތި އުފައްދާ، އެއްތަނުން އަނެއްތަނަށް އުފުލާ ކުންފުނިތަކަށެވެ. ގޭސް އުފައްދާ ކުންފުންޏެއް ކަމުގައިވާ ޝެލްއަށް މި އަހަރުގެ އޭޕްރިލްއާއި ޖޫން މަހާއި ދެމެދު ލިބުނު ފައިދާގެ އަދަދު 11.1 ބިލިޔަން ޑޮލަރަށް އަރައެވެ. އަދި، އެހެން ކުންފުންޏެއް ކަމުގައިވާ ބީ.ޕީ.އަށް ލިބުނު ފައިދާ ވަނީ 8.1 ބިލިޔަން ޑޮލަރަށް އަރާފައެވެ.