ސޫރިޔާގެ ހުޅަނގު އުތުރުގައިވާ ރަށެއް ކަމުގައިވާ މިޞްޔާފަށް ޔަހޫދީ އިސްރާޢީލުގެ އަސްކަރީ މަތިންދާބޯޓުތަކުން ބޮން އަޅައިފިއެވެ. މި ކަން ހާމަކޮށްފައި ވަނީ ސޫރިޔާގައި ޤާއިމުވެގެން ތިބޭ ރަޝިޔާގެ އަސްކަރީ ފައުޖުތަކުންނެވެ.
އިސްރާޢީލުގެ އަސްކަރީ މަތިންދާބޯޓުތަކުގެ މިސައިލާއި ބޮމުގެ ހަމަލާތައް އަމާޒު ކޮށްފައި ވަނީ މިޞްޔާފުގައި ހުންނަ ދިރާސާ ކުރާ މަރުކަޒަކަށް ކަމުގައި ރަޝިޔާގެ ފައުޖުތަކުން ބުނެއެވެ. އެ ތަނަށް އަމާޒުކޮށް ހަތަރު ކްރޫޒް މިސައިލާއި 16 ބޮން ފޮނުވައިލާފައިވާ ކަމުގައި ރަޝިޔާއިން ބުނެއެވެ.
ސޫރިޔާގެ ފައުޖުތަކުން ވަނީ، އެ ތަނަށް އަމާޒުކޮށް އިސްރާޢީލުގެ އަސްކަރީ އުޅަނދުތަކުން ފޮނުވައިލި ބައެއް މިސައިލުތައް ވައިގެ ތެރޭގައި ގޮއްވައިލާފައެވެ. ނަމަވެސް، ޔަހޫދީންގެ މި ހަމަލާގައި އެ މަރުކަޒަށް ވަރަށް ބޮޑެތި ގެއްލުންތަކެއް ލިބުނު ކަމުގައި ރަޝިޔާއިން ހާމަކުރެއެވެ.
2015 ވަނަ އަހަރުން ފެށިގެން ރަޝިޔާގެ އަސްކަރީ ފައުޖުތަކުން ދަނީ ސޫރިޔާގެ އެކި ކަންކޮޅުތަކުގައި ހަރަކާތްތެރި ވަމުންނެވެ. އަދި، ސޫރިޔާގެ ރައީސް ބައްޝާރުލް އަސަދުގެ ސަރުކާރު ދެމެހެއްޓުމަށް، އަސަދާ ދެކޮޅު ހަތިޔާރު އެޅި ޖަމާޢަތްތަކާ ދެކޮޅަށް ކުރަމުންދާ ހަނގުރާމައިގައި ބައިވެރިވަމުންނެވެ.
ޔަހޫދީ އިސްރާޢީލުން ދޭތެރެދޭތެރެއިން ދަނީ ސޫރިޔާގެ އަމާޒުތަކަށް ވައިގެ ހަމަލާތައް އަމާޒު ކުރަމުންނެވެ. ޔަހޫދީން ބުނަނީ، މި ހަމަލާތަކަކީ ސޫރިޔާގައި ހަރަކާތްތެރިވާ އީރާނުން ވާގިވެރިވާ ހަނގުރާމަވެރިންގެ ޖަމާޢަތްތަކަށް އަމާޒުކޮށް ދޭ ހަމަލާތަކެއް ކަމުގައެވެ. އެ ޖަމާޢަތްތަކުގެ ތެރޭގައި ލުބުނާނުގެ ހިޒްބުالله ޖަމާޢަތަށް ނިސްބަތްވާ ހަނގުރާމަވެރިން ވެސް ހިމެނެއެވެ. އީރާނާއި ހިޒްބުގެ ހަނގުރާމަވެރިން ވެސް ދަނީ އަސަދުގެ ސަރުކާރަށް ވާގިވެރިވަމުންނެވެ.