ނ.މަނަދުއާއި އެއަތޮޅު ކެނދިކުޅުދޫ ހޮސްޕިޓަލް ޢިމާރާތް ހަދައިދޭނެ ބަޔަކު ހޯދަން ފިނޭންސް މިނިސްޓްރީން އިޢުލާންކޮށްފިއެވެ. މަނަދޫ ހޮސްޕިޓަލް އިމާރާތް ހަދަން އިޢުލާނުކުރި މިއީ ދެވަނަ ފަހަރެވެ.
މަނަދުއަކީ މ.އަތޮޅު ހޮސްޕިޓަލް ހިންގަމުން އަންނަ ރަށެކެވެ. ސަރުކާރުން އެރަށުގައި ކުރިއަށްގެންދިއުމަށް ނިންމާފައިވާ މަސައްކަތަކީ، ޚިދުމަތް ދިނުމަށް އެކަށީގެންވާ އިމާރާތެއް ހަދައި، ސިއްޙީ ޚިދުމަތްތައް އިތުރަށް ފުޅާކުރުމެވެ.
މަނަދޫ ހޮސްޕިޓަލްގެ އާ އިމާރާތުގެ މަސައްކަތަށް ކުރަން އިޢުލާނުކުރި މިއީ ދެވަނަ ފަހަރެވެ. މިދިޔަ ޖޫން މަހު ރައްޔިތުންގެ މަޖިލީހުގައި ވާހަކަދައްކަވަމުން ހެލްތު މިނިސްޓަރު އަޙްމަދު ނަސީމް ވިދާޅުވީ ހޮސްޕިޓަލްގެ ޢަމަލީ މަސައްކަތް ކޮންޓްރެކްޓަރަކާ ހަވާލުނުކުރެވި ވަނީ އެކަމަށް ހުށައެޅި އަގުތައް ބޮޑުވުމުންކަމަށެވެ.
ހޮސްޕިޓަލްގެ ޑިޒައިން މަސައްކަތައް ވަނީ ބަޔަކާ ހަވާލުކޮށްފައެވެ. މަނަދުއާއި ކެނދިކުޅުދޫ ހޮސްޕިޓަލްގެ މަސައްކަތަށް ހުޅުވާލާފައިވަނީ ކޮންޓްރެކްޓަރ ފައިނޭނެސް އުސޫލުންނެވެ.
މަނަދޫ ހޮސްޕިޓަލްގެ ކޮންސްޓްރަކްޝަން މަސައްކަށް ޝައުގުވެރިވާ ފަރާތްތަކުގެ ބީލަން ހުޅުވުން އޮންނާނީ އަންނަ ސެޕްޓެމްބަރު މަހުގެ 8ވަނަ ދުވަހުއެވެ. ޕްރޮޖެކްޓްގެ ބިޑް ސެކިއުރިޓީގެ ގޮތުގައި 1800000 ރުފިޔާ ހުންނަން ޖެހެއެވެ.
ފިނޭންސް މިނިސްޓްރީއިން ވަނީ ނ.ކެނދިކުޅުދޫގެ ހޮސްޕިޓަލް އިމާރާތްކޮށްދޭނެ ބަޔަކު ހޯދުމަށްވެސް އިޢުލާންކޮށްފައެވެ. މި ޕްރޮޖެކްޓްގެ ބިޑް ސެކިއުރިޓީގެ ގޮތުގައި 690000 ރުފިޔާ ބަހައްޓަން ޖެހެއެވެ.
ސަރުކާރުންވަނީ ގިނަ ރަށްތަކެއްގައި ހޮސްޕިޓަލް އިމާރަތްކުރުމުގެ މަޝްރޫޢުތައް އިޢުލާންކޮށްފައެވެ. މީގެތެރޭގައި ސިއްޙީ މަރުކަޒުތައް ހިންގަމުން އައި ބައެއް ރަށްރަށުގެ މަރުކަޒުތައް ހޮސްޕިޓަލްތަކަށް ބަދަލުކުރުމުގެ މަޝްރޫޢު ހިމެނެއެވެ.
މީގެތެރޭގައި 30 އެނދުގެ ހޮސްޕިޓަލްތަކާއި 50 އެނދުގެ ހޮސްޕިޓަލްތައް ހިމެނެއެވެ.
މި އަހަރުގެ މޭ މަހު ވަނީ 4 ރަށެއްގެ ހޮސްޕިޓަލްގެ ޢަމަލީ މަސައްކަތް ކޮންޓްރެކްޓަރާ ހަވާލުކޮސްފައެވެ. މި މަސައްކަތްތަކުގެ ތެރެއިން ޓެލެކޮމިއުނިކޭޝަން ކޮންސަލްޓަންސް އިންޑިއާ ލިމިޓެޑާ ޙަވާލުކުރައްވާފައިވަނީ ހއ.އަތޮޅު ހޮސްޕިޓަލާއި ދ.އަތޮޅު ހޮސްޕިޓަލާއި ގއ.އަތޮޅު ހޮސްޕިޓަލާއި ރ.އަލިފުށީގެ ހޮސްޕިޓަލް ޑިޒައިން ކުރުމާއި އިމާރާތްކުރުމުގެ މަސައްކަތެވެ.