އިތިއޯޕިޔާގެ އުތުރުގައިވާ ޓިގްރޭ ސަރަޙައްދަށް ދިން ވައިގެ ހަމަލާތަކެއްގައި ޢާންމުންގެ ހަތަރު މީހުން މަރުވެއްޖެއެވެ. އިތިއޯޕިޔާގެ ޓިގްރޭ ސަރަޙައްދު މިހާރު އޮތީ ސަރުކާރާ ދެކޮޅު ހަނގުރާމަވެރިންގެ އަތްދަށުގައެވެ. ޓިގްރޭގެ ރަށެއް ކަމުގައިވާ މެކެލޭއަށް ވައިގެ ހަމަލާތަކެއް ދީފައި ވަނީ އެ ޤައުމުގެ އަސްކަރިއްޔާއިން ކަމަށް ޓިގްރޭގެ ހަނގުރާމަވެރި ޖަމާޢަތްތަކުން ތުހުމަތު ކުރެއެވެ.
މެކެލޭއަކީ ޓިގްރޭގެ ވެރި ރަށުގެ ގޮތުގައި ބަލާ ރަށެވެ. އެ ރަށަށް ދީފައިވާ ވައިގެ ހަމަލާގައި މަރުވި މީހުންގެ ތެރޭގައި ދެ ކުޑަކުދިން ވެސް ހިމެނޭ ކަމަށް އެ ސަރަޙައްދުގެ ޞިއްޙީ އޮފިޝަލުން ބުނެއެވެ. ކުޑަކުދިންގެ ޕާކަކަށް އަމާޒުކޮށް ދީފައިވާ މި ހަމަލާގައި ގިނަ އަދަދެއްގެ ބަޔަކު ޒަޚަމުވި ކަމުގައި ވެސް އޮފިޝަލުން ބުނެއެވެ.
އިތިއޯޕިޔާގެ ސަރުކާރުގެ ފައުޖުތަކާއި ހަނގުރާމަވެރި ޖަމާޢަތްތަކާ ދެމެދު ހަމަލާ ބަދަލު ކުރުން މެދުކަނޑައިލާފައި އޮތުމަށްފަހު، ހުސްވި ހަފުތާގެ ތެރޭގައި އަނެއްކާ ވެސް މި ވަނީ ހަމަލާ ބަދަލު ކުރަން ފަށާފައެވެ. އިތިއޯޕިޔާގެ ސަރުކާރުން ވަނީ، އެ ޤައުމުގެ އަސްކަރީ މަރުކަޒުތަކާއި ސިފައިން ތަމްރީނު ކުރާ މަރުކަޒުތައް ހުންނަ ސަރަޙައްދުތަކަށް ދަތުރު ނުކުރުމަށް ޓިގްރޭގެ ރައްޔިތުންނަށް އަންގާފައެވެ.
އިތިއޯޕިޔާގެ ސަރުކާރާއި ޓިގްރޭ ސަރަޙައްދުގައި ހަރަކާތްތެރިވާ ހަތިޔާރު އެޅި ޖަމާޢަތްތަކާ ދެމެދު ހަނގުރާމަ ފެށުނީ 2020 ވަނަ އަހަރުގެ ނޮވެންބަރު މަހުއެވެ. އަދި، މި ހަނގުރާމަ، އެ ސަރަޙައްދުގައިވާ އަފާރް އަދި އަމްހާރާއަށް ވެސް ފެތުރުނެވެ. އަދި، ޓިގްރޭ ހަނގުރާމަވެރިން އިތިއޯޕިޔާގެ ވެރިރަށް އަޑިސް އަބަބާ ހިފަން ވެސް މަސައްކަތް ކުރިއެވެ.
މި ހަނގުރާމަ ވަގުތީ މެދުކަނޑައިލަން ދެ ފަރާތުން އެއްބަސްވުމެއް އެކުލަވައިލާ އަމަލު ކުރަން ފަށާފައި ވަނީ މި އަހަރުގެ މާރިޗު މަހުގައެވެ. އަދި، ހަނގުރާމައިގެ ސަބަބުން ހާލުގައި ޖެހުނު މީހުންނަށް ކާބޯތަކެއްޗާއި އިންސާނީ އެހީތެރިކަން ފޯރުކޮށްދިނުމަށް މަސައްކަތް ފެށިއެވެ. މި ހަނގުރާމައާ ގުޅިގެން އެތައް މިލިޔަން ބަޔަކަށް ވަނީ ހާލުގައި ޖެހި، ބަނޑުހައިހޫނުކަމާ ކުރިމަތިލާން ޖެހިފައެވެ.