12 އަހަރުގެ ޖަލު ހުކުމެއް ތަންފީޒު ކުރަން ފަށާފައިވާ މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާގަށް އެ ޤައުމުގެ ރަސްގެފާނު މަޢާފު ދެއްވުމުގެ ފުރުޞަތު ބޮޑު ކަމަށާއި، ޖަލު ހުކުމުން އޭނާ ސަލާމަތްވާނެ ކަމަށް ޤަބޫލު ކުރައްވާ ކަމުގައި ކުރީގެ ބޮޑުވަޒީރު މަހާތިރު މުޙައްމަދު ވިދާޅުވެއްޖެއެވެ. ކޮރަޕްޝަނާއި މަނީ ލޯންޑްރިންގގެ ދައުވާ ސާބިތުވެ، ނަޖީބުގެ މައްޗަށް މެލޭޝިޔާގެ ދަށު ކޯޓަކުން އިއްވާފައިވާ 12 އަހަރުގެ ޖަލު ހުކުމާއި ޖޫރިމަނާ އެ ޤައުމުގެ ސުޕްރީމް ކޯޓުން ވަނީ އޮގަސްޓު 23 ވަނަ ދުވަހު ދަމަހައްޓާފައެވެ.
މި ކަމާ ގުޅިގެން، ނަޖީބަށް ތާޢީދު ކުރާ މީހުން ވަނީ އޭނާއަށް މަޢާފުދީ، އޭނާ މިނިވަން ކުރުމަށް ގޮވައިލާ ރަސްގެފާނު އައްސުލްޠާން ޢަބްދުاللهއަށް ޕެޓިޝަނެއް ހުށަހަޅާފައެވެ. ނަޖީބާ ދެކޮޅަށް ކޮރަޕްޝަންގެ ކުށް ސާބިތުވެ، ހުކުމް އިއްވާފައި ވަނީ 2020 ވަނަ އަހަރުއެވެ. 12 އަހަރަށް ޖަލަށްލުމުގެ އިތުރުން، ޖޫރިމަނާއެއްގެ ގޮތުގައި 46.88 މިލިޔަން އެމެރިކާ ޑޮލަރު ދައުލަތަށް ދެއްކުމަށް ވެސް އޭނާގެ މައްޗަށް ވަނީ ހުކުމް ކޮށްފައެވެ.
ނަޖީބު މައްޗަށް ސާބިތުވެފައި ވަނީ މެލޭޝިޔާގެ ދައުލަތުގެ ފަންޑެއް ކަމުގައިވާ ވަން-މެލޭޝިޔާ ޑިވެލޮޕްމަންޓް ބަރްހާދްގެ ފައިސާގެ ތެރެއިން 10 މިލިޔަން ޑޮލަރަށް ޚިޔާނާތްތެރިވުމާއި މަނީ ލޯންޑްރިންގގެ ދައުވާއެވެ. ވެރިކަމުގައި ހުންނެވި އިރު، ނަޖީބު ވަނީ، ކޮރަޕްޝަންގެ ތުހުމަތުތައް ތަހުޤީޤު ކުރުމަށް ހުރަސް އަޅާފައެވެ. އެ ފަންޑަކީ ނަޖީބުގެ ސަރުކާރުން 2009 ވަނަ އަހަރު އުފައްދާފައިވާ ފަންޑެކެވެ. އެއީ، މެލޭޝިޔާގެ ބޮޑުވަޒީރު ކަމުގެ މަޤާމު ފުރުއްވި ފުރަތަމަ އަހަރެވެ.
ތަހުޤީޤަށް ހާމަވެފައިވާ ގޮތުގައި، އެ ފަންޑުން 4.5 ބިލިޔަން ޑޮލަރު ވަނީ ގެއްލިފައެވެ. އަދި، އޭގެ ތެރެއިން 1 ބިލިޔަން ޑޮލަރު ނަޖީބުގެ އަމިއްލަ ބޭންކް އެކައުންޓަށް ޖަމާކޮށްފައިވާ ކަން ވެސް ތަހުޤީޤަށް ވަނީ ހާމަވެފައެވެ. އޭނާގެ އަނބިމީހާ ރޯސްމާ މަންޞޫރު ވެސް ކޮރަޕްޝަން ހިންގުމުގައި ބައިވެރިވެފައިވާ ކަމަށް ތުހުމަތު ކުރެވޭ އިރު، އޭނާގެ މައްޗަށް ވެސް ވަނީ ކޮރަޕްޝަންގެ ދައުވާ އުފުލާފައެވެ.
އިނގިރޭސި ވިލާތުގައި ތަޢުލީމު ހާސިލު ކޮށްފައިވާ ނަޖީބު ވަނީ 2009 ވަނަ އަހަރުން ފެށިގެން 2018 ވަނަ އަހަރާ ހަމައަށް މެލޭޝިޔާގެ ބޮޑުވަޒީރުގެ މަޤާމު ފުރާފައެވެ. އިންތިޚާބުގައި އޭނާއަށް ނާކާމިޔާބީއާ ކުރިމަތިލާން ޖެހުނީ، ކޮރަޕްޝަންގެ ތުހުމަތުތަކާ ގުޅިގެންނެވެ. 69 އަހަރުގެ ނަޖީބު މައްޗަށް ދަށު ކޯޓުން ހުކުމް ކޮށްފައި ވަނީ ދައުލަތުގެ ފައިސާއަށް ޚިޔާނާތްތެރިވުމާއި، މަނީ ލޯންޑްރިންގގެ ދައުވާތަކަށެވެ. ނަމަވެސް، ނަޖީބު ގެންދަނީ މި ދައުވާތަކަށް އިންކާރު ކުރަމުންނެވެ.