ސްރީލަންކާއާއި އެ ޤައުމަށް ލޯނު ދޫކޮށްފައިވާ ޤައުމުތަކާ ދެމެދު މަޝްވަރާތަކެއް ބޭއްވުމަށް މެދުވެރިއެއްގެ ދައުރު އަދާކުރަން ޖަޕާނުން އެއްބަސްވެއްޖެއެވެ. ކޮވިޑް-19އާ ގުޅިގެން ކުރިމަތިވި އިޤްތިޞާދީ ހާލަތުގައި ސްރީލަންކާގެ މާލީ ހާލަތު ވަނީ ދަށްވެފައެވެ. އަދި، ބޭރު ފައިސާގެ ރިޒާވް ހުސްވެ، އެ ޤައުމަށް ވަނީ އިޤްތިޞާދީ ކާރިސާއެއް ކުރިމަތިވެފައެވެ
.
ސްރީލަންކާއަށް ކުރިމަތިވެފައިވާ މާލީ ހާލަތުން އަރައިގަތުމަށް މަސައްކަތް ކުރަމުންދާ މި ދަނޑިވަޅުގައި، އެ ޤައުމަށް ލޯނު ދޫކޮށްފައިވާ ފަރާތްތަކާ ބައްދަލުކޮށް މަޝްވަރާ ކުރުމަށް އެ ޤައުމުން ދަނީ މަސައްކަތް ކުރަމުންނެވެ. މި ބައްދަލުވުންތައް ވިލަރެސް ކުރުމުގައި އެހީތެރިކަން ފޯރުކޮށްދޭން ޖަޕާނުން ދަނީ މަސައްކަތް ކުރަމުންނެވެ. ސްރީލަންކާގެ ދަރަންޏާ ބެހޭ މި މަޝްވަރާތައް ޖަޕާނުގައި ބޭއްވުމަށް މަސައްކަތް ކުރަމުން ދާއިރު، މި މަޝްވަރާތަކުގައި ޗައިނާއިން ބައިވެރިވާނެ ކަން އަދި ސާފުވެފައެއް ނުވެއެވެ. ސްރީލަންކާއަށް އެންމެ ގިނައިން ލޯނު ދޫކޮށްފައިވާ ޤައުމަކީ ޗައިނާއެވެ. އެހެންކަމުން، ޗައިނާގެ ބައިވެރިވުން ނެތި، މި ފަދަ މަޝްވަރާތަކަކުން ކާމިޔާބީއެއް ނުލިބޭނެ ކަމަށް ބެލެވެއެވެ.
ސްރީލަންކާއިން ބޭރު ޤައުމުތަކުން ނަގާފައިވާ ލޯނުތަކުގެ 10 އިންސައްތަ ދީފައި ވަނީ ޗައިނާއިންނެވެ. 2000 ވަނަ އަހަރާއި 2020 ވަނަ އަހަރާ ދެމެދު ޗައިނާއިން ސްރީލަންކާއަށް ދޫކޮށްފައިވާ ލޯނުގެ އަދަދު 12 ބިލިޔަން ޑޮލަރަށް އަރައެވެ. 2020 ވަނަ އަހަރު ނިމުނު އިރު، ސްރީލަންކާއިން ޗައިނާއަށް އަނބުރާ ދައްކަން ޖެހިފައިވާ ފައިސާގެ އަދަދު 6.3 ބިލިޔަން ޑޮލަރަށް އަރައެވެ. އެ އަހަރުގެ ތެރޭގައި ވެސް ސްރީލަންކާއިން ވަނީ 3 ބިލިޔަން ޑޮލަރު ލޯނެއް ޗައިނާއިން ހޯދާފައެވެ.
ސްރީލަންކާގެ ރައީސް ރަނިލް ވިކްރަމަސިންހަ ވިދާޅުވީ، އެ ޤައުމުގެ ދަރަނި "ރީސްޓްރަކްޗަރ" ކުރުމަށް ޤައުމުތަކުގެ އެހީތެރިކަން ހޯދުމަށް ބޭނުންވާ ކަމުގައެވެ. އަދި، އެ ޤައުމަށް ލޯނު ދީފައިވާ ޤައުމުތަކުގެ މެދުގައި މި ކަމާ ގުޅޭ މަޝްވަރާތައް ބޭއްވުމަށް ޖަޕާނުގެ އެހީތެރިކަމަށް އެދިފައިވާނެ ކަމުގައެވެ. ސެޕްޓެންބަރު މަހުގެ ތެރޭގައި ޖަޕާނަށް ވަޑައިގަންނަވައި، ބޮޑުވަޒީރު ފުމިއޮ ކިޝިޑާއާ އެކު ބާއްވާ ބައްދަލުވުމުގައި މި ކަމާ މެދު ވިކްރަމަސިންހަ މަޝްވަރާ ކުރައްވާނެއެވެ.
ސްރީލަންކާއަށް ދެ ވަނައަށް އެންމެ ބޮޑު އަދަދަކުން ލޯނު ދޫކޮށްފައި ވަނީ ޖަޕާނުންނެވެ. ސްރީލަންކާގެ ދަރަނީގެ އަދަދު 29 ބިލިޔަން ޑޮލަރަށް އަރާ ކަމަށް އިންޓަރނޭޝަނަލް މަނިޓަރީ ފަންޑު (އައި.އެމް.އެފް)އިން ބުނެއެވެ. އަދި، އެ ޤައުމަށް ކުރިމަތިވެފައިވާ މާލީ ހާލަތުން އަރައިގަތުމަށް އައި.އެމް.އެފް.އިން 3 ބިލިޔަން ޑޮލަރުގެ މާލީ އެހީ ހޯދުމަށް ސްރީލަންކާއިން ދަނީ މަސައްކަތް ކުރަމުންނެވެ.