މަކުނުވިދުރި ޖެހޭ މީހުންގެ އަދަދު ފާއިތުވި ހަފުތާގެ ތެރޭގައި 21 އިންސައްތަ ދަށްވެފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެފިއެވެ. މި ބަލި ޖެހޭ މީހުންގެ އަދަދު ކޮންމެ ވެސް ވަރަކަށް މަދުވެފައި ވީ ނަމަވެސް، ފާއިތުވި މަހެއްހާ ދުވަހުގެ ތެރޭގައި މި ބަލީގެ ކޭސްތަކުގެ އަދަދު ދިޔައީ އިތުރުވަމުންނެވެ.
މަކުނުވިދުރިއަކީ ޢާންމު ޞިއްޙަތަށް އޮތް ކުއްލި ނުރައްކަލެއްގެ ގޮތުގައި ޑަބްލިޔު.އެޗް.އޯ.އިން ކަނޑައަޅާފައި ވަނީ ޖުލައި މަހުގެ ތެރޭގައެވެ. ދުނިޔޭގެ އެކި ކަންކޮޅުތަކުން މިހާތަނަށް 41,000 އަށްވުރެ ގިނަ މީހުންނަށް ވަނީ މި ބަލި ޖެހިފައެވެ. އަދި، 96 ޤައުމަކުން މި ބަލި ފެނިފައި ވާއިރު، 12 މީހަކު ވަނީ މި ބަލީގައި މަރުވެފައެވެ.
ވިލާތުގެ ޤައުމުތަކުގައި މި ބަލި ފެތުރޭ މިންވަރު ކޮންމެ ވެސް ވަރަކަށް ކޮންޓްރޯލް ކުރެވިފައިވާ ކަމަށް ބެލެވޭ ކަމުގައި ޑަބްލިޔު.އެޗް.އޯ.އިން ބުނެއެވެ. "ވިލާތުގެ ޤައުމުތަކުގައި މި ބަލި ފެތުރޭ މިންވަރު ދަށްވެފައިވާ ތަން ފެނޭ. އެއީ ޢާންމު ޞިއްޙަތު ރައްކާތެރި ކުރުމަށް އަޅާފައިވާ ފިޔަވަޅުތަކާ ގުޅިގެން. އަދި، ބައްޔާ ގުޅޭ ގޮތުން މީހުންގެ މެދުގައި ހޭލުންތެރިކަން އިތުރު ކުރުމުން. އަދި ވެކްސިން ދޭން ފެށުމުން،" އެ ޖަމުޢިއްޔާގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސް ވިދާޅުވިއެވެ.
ފާއިތުވި ހަފުތާގައި މި ބަލީގެ ކޭސްތަކުގެ އަދަދު ދަށްވި ނަމަވެސް، އެ މުއްދަތުގެ ތެރޭގައި 24 ޤައުމެއްގައި މި ބަލި ޖެހޭ މީހުންގެ އަދަދު އިތުރުވިއެވެ. މީގެ ތެރޭގައި އެމެރިކާ ހިމެނެއެވެ. މި ވަގުތު މި ބަލި އެންމެ ހަލުވި ކަމާ އެކު ފެތުރެމުން ދަނީ އެ ޤައުމުގައެވެ. އަދި، ބަލި ޖެހިފައިވާ މީހުންގެ ތެރެއިން 34 އިންސައްތަ މީހުންނަކީ އެމެރިކާ މީހުންނެވެ. އެ ޤައުމުގައި މި ބަލި ޖެހިފައިވާ މީހުންގެ އަދަދު 17,000 އިން މައްޗަށް އަރައެވެ.
ޓެޑްރޯސް ވިދާޅުވީ، އެމެރިކާ ބައްރުގެ ޤައުމުތަކުގައި މި ބަލި ހަލުވި ކަމާ އެކު ފެތުރެމުންދާ ކަމުގައެވެ. އަދި، ލެޓިން އެމެރިކާގެ ޤައުމުތަކުގައި މި ބައްޔާ ގުޅޭ ގޮތުން ޢާންމުންގެ މެދުގައި ހޭލުންތެރިކަން އިތުރު ކުރުމަށް މަސައްކަތް ކުރަން ޖެހިފައިވާ ކަމުގައި ވެސް އޭނާ ވިދާޅުވިއެވެ. ފާއިތުވި މަހެއްހާ ދުވަހުގެ ތެރޭގައި ބަލި ޖެހިފައިވާ މީހުންގެ 60 އިންސައްތަ މީހުންނަކީ އެމެރިކާ ބައްރުގެ ޤައުމުތަކުގެ މީހުންނެވެ. "އެ ޤައުމުތަކުގެ މީހުން ހޭލުންތެރިކޮށް، ޢާންމު ޞިއްޙަތު ރައްކާތެރި ކުރުމަށް ފިޔަވަޅުތަކެއް އަޅަން ޖެހޭ. އަދި، ވެކްސިން ފޯރުކޮށްދޭން ޖެހޭ،" ޓެޑްރޯސް ވިދާޅުވިއެވެ.
މި ބަލި އެންމެ ފުރަތަމަ ދެނެގަނެވިފައި ވަނީ 1970 ގެ އަހަރުތަކުގެ ތެރޭގައި އެފްރިކާ ބައްރުންނެވެ. ކޮވިޑް-19އާ ޚިލާފަށް، މި އަހަރުގެ ތެރޭގައި މި ބަލި ފެތުރެން ފެށި އިރު، މި ބައްޔަށް ޚާއްޞަކޮށްފައިވާ ވެކްސިނެއް ވަނީ އުފައްދާފައެވެ. އަދި، ސައިންސްވެރިން ވަނީ މި ބައްޔަށް ފަރުވާތައް ހޯދާފައެވެ. ނަމަވެސް، ބަލި ފެތުރެމުންދާ ހަލުވިކަމާ އެއްވަރަށް، ވެކްސިން އުފައްދާ މިންވަރު މިހާރު މި ވަނީ އިތުރު ކުރަން ޖެހިފައެވެ.