ވޭތުވެދިޔަ 2 އަހަރަކީ ރާއްޖޭގެ ތައުލީމީ ނިޒާމަށް ދަތި ދެ އަހަރެވެ. ކޯވިޑް-19ގެ ބަލިމަޑުކަމާއެކު އެތައް ގޮންޖެހުންތަކެއް ކުރިމަތިވި ދެ އަހަރެވެ.
ނަމަވެސް ރާއްޖެ ވެގެން ގޮސްފައިވަނީ ހާލަތަށް އައި ބަދަލުތަކަށް ހޭނި، މެދުކެނޑުމެއް ނެތި ތަޢުލީމު ދިނުން ކުރިއަށްގެންދިޔަ ދުނިޔޭގެ މަދު ޤައުމުތަކުގެ ތެރެއިން ޤައުމަކަށެވެ. ސްކޫލަށް ހާޒިރު ނުވެވުނުނަމަވެސް، އިންޓަނެޓް މެދުވެރިކޮށް އޮންލައިންކޮށް ކިޔަވައިދޭން ފެށީ ގޮންޖެހުންތަކާއެކުއެވެ.
މުދައްރިސުންގެ ބުރަ މަސައްކަތާއެކު، ދަރިވަރުންނާއި ބެލެނިވެރިން މަސައްކަތް ކުރީ ހިތްވަރާއެކުއެވެ. މިއަދު ފެނިގެން މިދަނީ ހިތްވަރު އެލުވާނުލާ ކުރި ބުރަ މަސައްކަތުގެ ނަތީޖާއެވެ.
2020،2021ވަނަ އަހަރުގެ ދިރާސީ އަހަރަކީ، ރާއްޖޭގެ ތާރީޚުގައި އެންމެ ގިނަ ދަރިވަރުން ގަދަ 10ގައި ހިމެނުނު އަހަރެވެ.
2021ވަނަ އަހަރާއި 2022ވަނަ އަހަރު ރާއްޖެއިން 5955 ދަރިވަރުން ވަނީ އެސް.އެސް.ސީ އަދި އޯލެވެލް އިމްތިޙާނުތަކުގައި ބައިވެރިވެފައެވެ. އަދި 2641 ދަރިވަރުންވަނީ އެޗް.އެސް.ސީ އަދި އޭލެވެލް އިމްތިޙާނުތަކުގައި ބައިވެރިވެފައެވެ. މީގެތެރެއިން ބޮޑު އިންސައްތައެއް ރާއްޖޭގެ ގަދަ 10ގައި ވަނީ ހިމެނިފައެވެ.
ޘާނަވީ އިމްތިޙާނުތައް ނިންމި ދަރިވަރުންގެ ތެރެއިން 757 ދަރިވަރުން ވަނީ ޤައުމީ ގަދަ 10 ގައި ހިމެނިފައެވެ. މީގެތެރެއިން 13 ދަރިވަރަކު ވަކިވަކި މާއްދާތަކުން ދުނިޔޭގެ ގަދަ 10 ގައި ހިމެނިފައިވާއިރު 6 ދަރިވަރަކު ވަނީ ހައި އެޗީވްމަންޓް އެވޯޑް ޙާޞިލުކޮށްފައެވެ.
މަތީ ޘާނަވީ އިމްތިޙާނު ނިންމި ދަރިވަރުންގެ ތެރެއިން 348 ދަރިވަރަކު ޤައުމީ ގަދަ 10 ގައި ހިމެނިފައިވެއެވެ. މީގެތެރެއިން 41 ދަރިވަރަކު ވަނީ ވަކިވަކި މާއްދާތަކުން ދުނިޔޭގެ އެންމެ މޮޅު 10 ވަނައިގެ ތެރެއިން 52 ވަނައެއް ޙާޞިލުކޮށްފައެވެ.
މަތި އަރުތަވެރިންގެ އިނާމު ދިނުމުގެ ޙަފްލާ ޝަރުވެރިކޮށްދެއްވީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއެވެ.
މި ރަސްމިއްޔާތުގައި ވާހަކަފުޅުދައްކަވަމުން އެޑިއުކޭޝަން މިނިސްޓަރ ޑރ.އާއިޝަތު އަލީ ވިދާޅުވީ މިއީ މުޅި ޤައުމު ފަޚުރުވެރިވާ ދުވަހެއްކަމަށެވެ. އަދި މިއީ ދަރިވަރުންނާ ޓީޗަރުންނާ ބެލެނިވެރިންގެ ނުގުޑާ އަޒުމުކަމަށެވެ.
"މި ނިމުނީ އަދި ހަރުފަތެއް. މުޅި ހަޔާތް އަދި އޮތީ ކުރިއަށް. މަތީ ތަޢުލީމުގެ ފުރުޞަތު ސަރުކާރުން މިވަނީ ވަރަށް ބޮޑަށް ހުޅުވާލާފަ. އުއްމީދަކީ މި ފުރުޞަތުގެ ބޭނުން ހިފާ، މަތީ މަޢުލީމުގެ ހަރުފަތްތައް ތިޔަ ދަރިވަރުން ގިރާކުރުން." މިނިސްޓަރ އައިޝަތު އަލީ ވިދާޅުވިއެވެ.
އިނާމު ޙާސިލްކުރި ދަރިވަރުންގެ ޢަދަދު ގިނަވުމުގެ ސަބަބުން، އިނާމު ދިނުމުގެ ޙަފްލާވެސް ކުރިއަށްގެންދިޔައީ ދެ ރެޔަށް ބަހާލައިގެންނެވެ. ސާނަވީ އަދި މަތީ ސާނަވީ ހިމެނޭހެން ޖުމްލަ 1105 ދަރިވަރުން އިނާމު ޙާސިލްކުރިއެވެ.