ސޫރިޔާގައި ހަރަކާތްތެރިވާ ހަނގުރާމަވެރި ޖަމާޢަތްތަކުގެ އަމާޒުތަކަށް އެމެރިކާއިން ވަރުގަދަ ހަމަލާތަކެއް ދީފިއެވެ. މި ހަމަލާތައް އަމާޒުކޮށްފައި ވަނީ ސޫރިޔާގެ ދީރް އަލްޒޫރު ޕުރޮވިންސުގައި ހަނގުރާމަވެރި ޖަމާޢަތްތަކުން ބޭނުން ކުރާ ހަތިޔާރު ގުދަންތަކަކާއި ބަންކަރުތަކަކަށް ކަމުގައި އެމެރިކާއިން ބުނެއެވެ.
އަދި އެ ތަންތަނަކީ، އީރާނުގެ އިސްލާމިކް ރިވޮލޫޝަނަރީ ގާޑްސް ކޯއިން ވާގިވެރިވާ ހަނގުރާމަވެރި ޖަމާޢަތްތަކެއްގެ އަމާޒުތަކެއް ކަމަށް ވެސް އެމެރިކާއިން ބުނެއެވެ. މި ހަމަލާތަކުގައި ހަނގުރާމަވެރިންގެ ހަ މީހަކު މަރުވި ކަމަށް، ސޫރިޔާގެ މަސްރަޙު ދިރާސާ ކުރާ ފަރާތްތަކުން ބުނެއެވެ. ނަމަވެސް، އެ ސަރަޙައްދުގައި ހަރަކާތްތެރިވާ ހަނގުރާމަވެރިންގެ ޖަމާޢަތްތަކާ އެއްވެސް ގުޅުމެއް ނޯންނަ ކަމަށް ބުނެ، އީރާނުން ވަނީ އެމެރިކާގެ ތުހުމަތުތައް ދޮގުކޮށްފައެވެ.
އެމެރިކާގެ ރައީސް ޖޯ ބައިޑަން ވިދާޅުވީ، މި ހަމަލާތަކަކީ އެމެރިކާ ސިފައިންގެ ސަލާމަތާއި ރައްކާތެރި ކަން ކަށަވަރު ކުރުމަށް ދީފައިވާ ހަމަލާތަކެއް ކަމުގައެވެ. ޓެރެރިސްޓް ޖަމާޢަތެއް ކަމުގައިވާ އައި.އެސް.އާ ދެކޮޅަށް ހަނގުރާމަ ކުރަމުންދާ ގުޅިފައިވާ ލަޝްކަރުގައި އެމެރިކާގެ 1,000 އަށްވުރެ ގިނަ ސިފައިން ހަރަކާތްތެރިވެއެވެ.
އެ ލަޝްކަރުގެ އަސްކަރީ ދެ މަރުކަޒެއް ސޫރިޔާގައި ހުރެއެވެ. މީގެ ތެރެއިން އެ ޤައުމުގެ އިރު އުތުރުގައިވާ ގްރީން ވިލެޖާއި ދީރް އަލްޒޫރުގައި ހުންނަ އަސްކަރީ މަރުކަޒަށް ހަނގުރާމަވެރިންގެ ޖަމާޢަތްތަކުން މި މަހުގެ 15 ވަނަ ދުވަހު ވަނީ ހަމަލާތަކެއް ދީފައެވެ. އެ ހަމަލާތަކުގެ ފަހަތުގައި ވަނީ އީރާނުން ވާގިވެރިވާ ހަނގުރާމަވެރިންގެ ޖަމާޢަތްތަކަށް ކަމުގައި އެމެރިކާއިން ތުހުމަތު ކުރެއެވެ.
އެމެރިކާގެ އަސްކަރީ އުޅަނދުތަކުން ހަނގުރާމަވެރިންގެ 11 އަމާޒަކަށް ހަމަލާ ދީފައިވާ ކަމުގައި އެ ޤައުމުން ބުނެއެވެ. މި ހަމަލާތަކުގެ ބޭނުމަކީ، އެ ޤައުމުގައި ހަރަކާތްތެރިވާ އެމެރިކާގެ ފައުޖުތަކުގެ ސަލާމަތާއި ރައްކާތެރިކަން ކަށަވަރު ކުރުން ކަމަށާއި، ހަނގުރާމަވެރިންގެ ޖަމާޢަތްތަކާ ހަނގުރާމައެއް ފެށުމަށް ބޭނުން ނުވާ ކަމުގައި އެމެރިކާގެ އަސްކަރިއްޔާގެ އިސް އޮފިޝަލަކު ވިދާޅުވިއެވެ.
އެމެރިކާއިން މި ހަމަލާތައް ދީފައި މި ވަނީ، ސޫރިޔާގައި ހަރަކާތްތެރިވަމުން ދިޔަ އީރާނުގެ އަސްކަރީ އިސް ޖެނެރަލަކު މަރައިލާފައިވާ ކަން އީރާނުން ހާމަ ކުރިތާ އެއް ދުވަސް ފަހުންނެވެ. އީރާނުގެ އިސްލާމިކް ރިވޮލޫޝަނަރީ ގާޑްސް ކޯގެ އިސް ޖެނެރަލެއް ކަމުގައިވާ އަބުލްފަޒުލް ޢަލީޖާނީ މަރައިލާފައި ވަނީ ސޫރިޔާގެ އަސްކަރިއްޔާގެ މުޝީރެއްގެ ގޮތުގައި އެ ޤައުމުގައި ހަރަކާތްތެރިވަމުން ދަނިކޮށް ކަމަށް ވެސް އީރާނުން ބުނެއެވެ.