މި ސަރުކާރުގެ 4 އަހަރު އެމްޓީސީސީއާއި އާރުޑީސީން އެކަނިވެސް 4000 ވަޒީފާ އުފައްދާފައިވާކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ. މިނިސްޓަރ އަމީރު މިހެން ވިދާޅުވީ، މި ސަރުކާރުން އުފެއްދީ އެންމެ 4000 ވަޒީފާކަމަށް ކުރީގެ ރައީސް އަބްދުﷲ ޔާމީން ވިދާޅުވެފައިވާތީ އެކަމަށް ރައްދުދެއްވަމުންނެވެ.
ފިނޭންސް މިނިސްޓަރ އިބްރާހީމް އަމީރު މިހެން ވިދާޅުވީ އެމްޑީޕީގެ ފަރާތުން ކުރިއަށްގެންދިޔަ އެމްޑީޕީ ކޮންގްރެސް 2022 ގައި ވާހަކަފުޅު ދައްކަވަމުންނެވެ. މިނިސްޓަރ އަމީރު ވިދާޅުވީ، ހަމައެކަނި އެމްޓީސީސީވެސް މި ސަރުކާރުގެ 4 އަހަރު ދުވަހުގެ ތެރޭގައި 3973 ވަޒީފާ އުފައްދާފައިވާކަމަށެވެ. އެހެންކަމުން އާރުޑީސީއާއި އެމްޓީސީސީއަށް އެކަނި ބެލިނަމަވެސް މި ސަރުކާރުން މިހާތަނަށް 5200 ވަޒީފާ އުފައްދާފައިވާކަމަށެވެ.
"ރައީސް ޔާމީން ވިދާޅުވި ތިމަން މަނިކުފާނުގެ ސަރުކާރުގައި 104000 ވަޒީފާއެއް އުފެދުނު ވާހަކަ. މިސަރުކާރުގައި މިހާތަނަށް ގާތްގަނޑަކަށް 4000 ވަޒީފާއެއްގެ ވާހަކަ. އަޅުގަނޑު ހަމަ ޔަޤީންކަމާއިއެކު ފާހަގަކޮށްލަން ބޭނުންވަނީ އެމްޓީސީސީން އުފެއްދި ވަޒީފާތަކާއި އާރުޑީސީން އުފެއްދި ވަޒީފާއަށް އެކަނި ބެލިއަސް އަޅުގަނޑުމެންގެ މި 4 އަހަރުގެތެރޭ 4000 ވަޒީފާ އުފެއްދިފައިވާނެ." އަމީރު ވިދާޅުވިއެވެ.
މި ސަރުކާރުން ވަޒީފާ ބޭނުންވާ ފަރާތްތަކަށް ވަޒީފާ ހޯދައިދިނުމަށް ވަނީ ޖޮބް ސެންޓަރެއްވެސް އުފައްދާފައެވެ. ޖޮބް ސެންޓަރ ޕޯޓަލްއަކީ ވަޒީފާގެ ބާޒާރުގައި ހުރި ފުރުސަތުތައް ދިވެހިންނަށް ވީހާވެސް ފަސޭހަކަމާއިއެކު ފޯރުކޮށްދިނުމަށް އިކޮނޮމިކް މިނިސްޓްރީން ޤާއިމްކޮށްފައިވާ ޕޯޓަލްއެކެވެ.
ޖޮބް ސެންޓަރ ޕޯޓަލްއާއި ގުޅޭގޮތުން ވާހަކަދައްކަވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ، ޖޮބް ސެންޓަރުތަކަކީ ވަޒީފާތައް ހޯދަން މަސައްކަތްކުރާ ފަރާތްތަކާއި އަދި ވަޒީފާ އުފައްދާ ވިޔަފާރިތަކާއި ގުޅުވާލުމަށްޓަކައި ސަރުކާރުން ކުރާ މަސައްކަތެއްކަމަށެވެ. އެގޮތުން މިހާތަނަށް ވަޒީފާ ބޭނުންވެގެން މި ޕޯޓަލްގައި 39297 ފަރާތަކުން އަދި ވަޒީފާ ފޯރުކޮށްދޭ 1117 ފަރާތަކުން ރަޖިސްޓްރީކޮށްފައިވާކަމަށެވެ.
"32 ކައުންސިލްއެއްގައި ޖޮބް ސެންޓަރުގެ ޑެސްޓް އެބަ ހިމެނޭ. އަދި އޭގެއިތުރުން ޖޮބް ޕޯޓަލްގައި 39297 ވަޒީފާ ހޯދާ ފަރާތްތައް މިހާރުވެސް ރެޖިސްޓްރީވެފައި އެބައޮތް. އަދި މަސައްކަތްތެރިކަމުގެ ފަހި މާހައުލެއް ބިނާކުރުމަށްޓަކައި 1117 ވަޒީފާދޭ ފަރާތައް މިހާރުވެސް ރަޖިސްޓްރީވެފައި އެބައިން ވަޒީފާ ދިނުމުގެ މަޤްސަދުގައި." އަމީރު ވިދާޅުވިއެވެ.
ޖޮބް ޕޯޓަލްއަށް މިދިޔަ އަހަރުގެތެރޭ އިކޮނޮމިކް މިނިސްޓްރީން ވަނީ ބަދަލުތަކެއް ގެނެސް ރީލޯންޗްވެސް ކޮށްފައެވެ. އެ އިކޮނޮމިކް މިނިސްޓްރީން ވިދާޅުވީ، ޕޯޓަލްއަށް ގެނައި ބަދަލާއިއެކު ދިވެހި މަސައްކަތްތެރިންނަށް ވަޒީފާގެ ފުރުސަތު ފަހިކޮށް ވަޒީފާ ދިނުމުގައި ދިވެހިންނަށް އިސްކަން ދިނުމަށް ސަރުކާރުން ކުރާ މަސައްކަތަށް އިތުރު ކާމިޔާބީއެއް ލިބިގެންދިޔަކަމަށެވެ.
މި ވެބްސައިޓް ފަރުމާކޮށްފައިވަނީ މައިގަނޑު 3 ބައެއް އެކުލެވޭ ގޮތަށެވެ. އެއީ ވަޒީފާދޭ ފަރާތައް ޚާއްސަ ޕޯޓަލްއެއް، ވަޒީފާ ހޯދާ ފަރާތްތަކަށް ޚާއްސަ ޕޯޓަލްއެއް އަދި ވަޒީފާތަކަށް ބޭނުންވާ ކޯސްތަކާއި ތަމްރީން ޕްރޮގްރާމްތައް ހިންގާ ފަރާތްތަކަށް އެފަދަ ޕްރޮގްރާމްތައް ލިސްޓްކޮށްގެން ކުރިއަށްގެންދިއުމަށް ޚާއްސަ ޕޯޓަލްއެކެވެ.