މާލީ ރިޕޯޓުތައް ގެނެސްދޭއިރު، ބައިނަލްއަޤްވާމީ މިންގަނޑުތަކަށް އަމަލުކުރުން މުހިންމު ކަމަށް އޮޑިޓަރ ޖެނެރަލް ހުސައިން ނިޔާޒީ ވިދާޅުވެއްޖެއެވެ.
އޮޑިޓަރ ޖެނެރަލް އަދި ސީއޭ މޯލްޑިވްސްގެ ރައީސް، ހުސައިން ނިޔާޒީ މިހެން ވިދާޅުވީ، އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދި މޯލްޑިވްސް (ސީއޭ މޯލްޑިވްސް) އިން އެކައުންޓިންގ ސްޓޭންޑާޑް ތަކަށް ޚާއްސަކޮށްގެން އިންތިޒާމްކުރި އައި.އެފް.އާރް.އެސް އަދި އައި.އެސް.އޭ.އެސް ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
2 ދުވަހުގެ މުއްދަތަކަށް މޯލްޑިވްސް ނޭޝަނަލް ޔުނިވަރސިޓީ ބިސްނަސް ސްކޫލްގެ އޮޑިޓޯރިއަމްގައި ކުރިއަށްދާ މި ފޯރަމް ފެށުމުގެ ރަސްމިއްޔާތުގައި ސީއޭ މޯލްޑިވްސްގެ ކައުންސިލްގެ އިތުރުން ޓެކްނިކަލް އެންޑް ސްޓޭންޑަރޑް ކޮމިޓީގެ މެމްބަރުންނާއި އަދި އެކައުންޓިންގ ދާއިރާގެ ފުންނާބު އުސް ފަރާތްތައް ބައިވެރިވެ ވަޑައިގެންނެވިއެވެ.
މި ހަފްލާއިގައި ވާހަކަދައްކަވަމުން، އޮޑިޓަރ ޖެނެރަލް އަދި ސީއޭ މޯލްޑިވްސްގެ ރައީސް، ހުސައިން ނިޔާޒީގެ ވާހަކަފުޅުގައި މެލޭޝިއަން އިންސްޓިޓިއުޓް އޮފް ޗާޓަރޑް ޕްރޮފެޝަނަލް އެކައުންޓެންޓްސްގެ އެހީތެރިކަން ފާހަގަކުރަށްވާ އެކަމަށް ޝުކުރު އަދާ ކުރެއްވިއެވެ. އަދި މިފަދަ ފޯރަމެއްގެ މުހިއްމުކަމާއި ގުޅޭގޮތުންވެސް ނިޔާޒީވަނީ ވާހަކަދައްކަވާފައެވެ.
" ފައިނޭންޝިއަލް ރިޕޯޓުތަކަކީ ގިނަ ބަޔަކު ބޭނުން ހިފާ އެއްޗެއް، އެހެން ކަމުން ރަނގަޅު މައުލޫމާތު ގެނެސްދިނުން މުހިއްމު، އެހެން ނޫން ނަމަ ގިނަ ޑިސްކްލޯޝަރތަކަކާއި އެމެންޑުމެންޓްސްތަކެއް ގެންނަންޖެހޭ." ނިޔާޒީ ވިދާޅުވިއެވެ.
މީގެ އިތުރުން މި ރަސްމިއްޔާތުގައި ވާހަކަދައްކަވަމުން ކޮމިޝަނަރ ޖެނެރަލް އޮފް ޓެކްސޭޝަން އަދި ސީއޭގެ މޯލްޑިވްސްގެ ކައުންސިލް މެމްބަރ ފަތުޙުﷲ ޖަމީލްވަނީ އެކައުންޓިންގ ސްޓޭންޑަރޑް ތަކުގެ މުހިންމުކަމާއި ސީޕީޑީ ސެޝަންތަކުގެ މުހިންމު ކަމުގެ މައްޗަށް ވާހަކަދައްކަވާފައެވެ.
މި ފޯރަމްގައި މެލޭޝިއަން އިންސްޓިޓިއުޓް އޮފް ޗާޓަރޑް ޕްރޮފެޝަނަލް އެކައުންޓެންޓްސްގެ ދެ މެމްބަރުންގެ އިތުރުން ކުރީގެ އޮޑިޓަރ ޖެނެރަލް އަދި ނައީމް އެންޑް ޖިނާން އެލް.އެލް.ޕީގެ ޕާޓްނަރ އިބްރާހިމް ނަޢީމްގެ ފަންނީ ސެޝަންތަކެއް ކުރިއަށް ގެންދިއުމަށްވަނީ ހަމަޖެހިފައެވެ. މި ސެޝަންތަކުގައި މައިގަނޑު ގޮތެއްގައި އަލިއަޅުވާލަން ހަމެޖެހިފައިވަނީ އެކައުންޓިންގ ސްޓޭންޑަޑުގެ އެންމެ ފަހުގެ އަޕްޑޭޓްތަކާއި، އަލަށް ނެރުނު ސްޓޭންޑަޑްތަކުގެ އިތުރުން ސްޓޭންޑަޑްތަކުގެ ޕްރެކްޓިކަލް އެޕްލިކޭޝަންއަށެވެ. މި ސީޕީޑީ ސެޝަންތަކުން އޮޑިޓް ފާރމްތަކުން ކުރާ އޮޑިޓްތަކުގެ ފެންވަރު ރަނގަޅުވެގެން ދާނެކަމަށް ސީއޭ މޯލްޑިވްސް އިން މައުލޫމާތު ދެއެވެ.
ސީއޭ މޯލްޑިވްސް އިން މި ފަދަ ފޯރަމެއް ކުރިއަށްގެންދިއުމުގެ މައިގަނޑު މަޤްޞަދަކީ އިންސްޓިޓިއުޓްގެ މެމްބަރުންނާއި، ދިވެހިރާއްޖޭގައި އެކައުންޓިންގ ޕްރޮފެޝަންގައި މަސައްކަތްކުރާ ފަރާތްތަކަށް ބޭނުންވާ ތައުލީމާއި ތަމްރީން ފޯރުކޮށްދީ، ރާއްޖޭގެ އެކައުންޓެންސީ ޕްރޮފެޝަން އިތުރަށް ހަރުދަނާކޮށް ކުރިއެރުމަށް މަގުފަހިކޮށްދިނުމެވެ. މީގެ އިތުރުން މި ފޯރަމްގައި ބައިނަލްއަގުވާމީ އޮޑިޓިން ހަމަތަކަށް އަންނަ ބަދަލުތަކާއި އެ ބަދަލު ތަކުގެ ސަބަބުން އޮޑިޓަރުންނާ އެކައުންޓެންޓުންގެ މަސައްކަތަށް އަންނާނެ ބަދަލުތަކަށް އަލިއަޅުވާލާނެއެވެ. މި ފޯރަމްގައި އޮޑިޓް ފާމް ތަކާއި އެހެނިހެން ފަރާތްތައް ހިމެނޭ ގޮތަށް ޖުމްލަ 200 ފަރާތުން ވަނީ ބައިވެރިވެފައެވެ.