ޅ.ނައިފަރުގައި ޤާއިމްކުރާ ފެނުގެ ނިޒާމުގެ ޢަމަލީ މަސައްކަތް ނިންމައި މިމަހުގެ ނިޔަލަށް ޚިދުމަތްދިނުމަށް ތައްޔާރުވެއްޖެއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ނައިފަރު ކައުންސިލްގެ ރައީސް މުހައްމަދު ރަޝީދު ވިދާޅުވީ މިހާރު ކުރަމުންދަނީ މިމަހުގެ ނިޔަލަށް ފެނުގެ ޚިދުމަތް ދިނުމަށް ވާންޖެހޭ ތައްޔާރީތަކުގެ މަސައްކަތްތައް ކަމަށެވެ. އަދި ފެނުގެ ނިޒާމްގެ ޢަމަލީ މަސައްކަތް ނިމި ނެޓްވޯކް ޓެސްޓް ކުރުމުގެ މަރުހަލާވެސް މިހާރު ނިމިފައިވާ ކަމަށް އޭނާ ވިދާޅުވިއެވެ.
އާބާދީގައި 5600 އަށްވުރެ ގިނަ މީހުން ދިރިއުޅޭ ނައިފަރަކީ ފެނުގެ ނިޒާމަށް އިންތިހާއަށް ބޭނުންވެފައިވާ ރަށެއްކަމަށާއި މިއީ ރަށުގެ ރައްޔިތުންގެ ވަރަށް ދުވަސްވީ އުއްމީދެއް ފުރިހަމަވުންކަމަށް ކަމަށްވެސް ޕީއެސްއެމް ނިއުސްއަށް މަޢުލޫމާތު ދެއްވަމުން ނައިފަރު ކައުންސިލްގެ ރައީސް މުހައްމަދު ރަޝީދު ވިދާޅުވިއެވެ.
ޕްލޭނިންގ މިނިސްޓްރީން ވިދާޅުވީ ނައިފަރުގައި ޤާއިމްކުރި ފެނުގެ ނިޒާމުގެ ދަށުން އެ ރަށުގެ 1510 ގެއަކަށް ފެނުގެ ޚިދުމަތް ފޯރުކޮށްދޭނެކަމަށެވެ. އެގޮތުން ދުވާލަކަށް 100 ޓަނުގެ ފެން އުފައްދައި ދެ އާރް.އޯ ޕްލާންޓާއި ފެން ރައްކާކުރުމަށް 1300 އަކަމީޓަރުގެ ޓޭންކެއް ޤާއިމްކޮށްފައިވާނެކަމަށް އެ މިނިސްޓްރީން ވިދާޅުވިއެވެ.
މި މަސައްކަތަކީ މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗައިން، މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އާ ޙަވާލުކޮށްގެން ކުރިއަށްގެންދާ މަޝްރޫޢެކެވެ. މި މަޝްރޫޢުގެ ދަށުން ފެން ރައްކާކުރުމަށް ބަހައްޓާފައިވާ ތާނގީތަކުގެ ނުނިމިހުރި މަސައްކަތްތަކާއި، ބޯހޯލް އަދި ރިޖެކްޓް ލައިންގެ މަސައްކަތް ކުރުމާއި ރަށުގެ ގޭގޭގައި ފެން މީޓަރ ބަހައްޓައި ފެނުގެ ކަނެކްޝަން ގުޅައިދީ، ގެތަކަށް ރައްކާތެރި ފެން ފޯރުކޮށްދިނުމުގެ މަސައްކަތް އެމްޑަބްލިއުއެސްސީން ވަނީ ކޮށްފައެވެ.
މި މަޝްރޫޢަކީ ދައުލަތުގެ ބަޖެޓުން 24.2 މިލިއަން ރުފިޔާ ޚަރަދުކޮށްގެން ކުރިއަށްގެންދިޔަ މަޝްރޫޢެކެވެ.