ތުރުކީގައި ރާއްޖެ އިސްތިހާރުކުރުމަށް އެމްއެމްޕީއާރުސީއިން ތުރުކީގެ ޤައުމީ އެއަރލައިން، ޓާކިޝް އެއަރލައިނާ ގުޅިގެން ކެމްޕެއިނެއް ކުރިއަށް ގެންގޮސްފިއެވެ.
ތިން މަސްދުވަހުގެ މުއްދަތަކަށް ކުރިއަށް ގެންދިޔަ މި ކެމްޕެއިންގެ މައިގަނޑު މަޤްސަދަކީ ދިވެހިރާއްޖެއަކީ ތުރުކީގެ ފަތުރުވެރިންގެ މެދުގައި އެންމެ މަގުބޫލު އަދި ރައްކާތެރި މަންޒިލުގެގޮތުގައި ދަމަހައްޓާ އިސްތިހާރުކުރުން ކަމަށެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަންޝް ކޯޕަރޭޝަން، އެމްއެމްޕީއާރުސީން ވިދާޅުވީ މިއަހަރުގެ ފެބުރުއަރީމަހު ފެށި މި ބްރޭންޑް އެވެއަރނަސް މި ކެމްޕެއިނުގެ ދަށުން ޓާކިޝް އެއަރލައިންސްގެ ހުރިހާ ފްލައިޓެއްގެ އިންހައުސް އެންޓަރޓެއިންމަންޓު ސިސްޓަމް މެދުވެރިކޮށް ފަސިންޖަރުންނަށް ދިވެހިރާއްޖޭގެ ރީތި މަންޒަރުތަކާއި، ފަތުރުވެރިކަމުގެ ޕްރޮޑަކްޓްތަކާއި ޚާއްސަ ތަޖުރިބާތައް ދައްކުވައިދޭ 30 ސިކުންތުގެ ޕްރޯމޯ ވީޑިއޯ އެއް ވަނީ ދައްކާލާފައި ކަމަށެވެ. މި ވީޑިއޯގެ ޒަރިއްޔާއިން ދިވެހިރާއްޖެގެ ޖަޒީރާ ރަށްތަކާއި، ރާއްޖޭގެ ފަތުރުވެރިކަމުގެ ޕްރިޑަކްޓްތައް އަދި ތަފާތު ތަޖުރިބާތައް ވަނީ ދައްކާލާފައެވެ.
މި ވީޑިއޯ ސްލޮޓް ގައި ހަމައެކަނި އިސްތިހާރުކުރެވުނީ ދިވެހިރާއްޖެއެވެ. މި އެެއަރލައިނުން ކުރި 44,800 ދަތުރުގައި މި ވީޑިއޯ ދައްކާ، 11.2 މިލިއަން މީހުނަށް މި ވީޑިއޯ ފެނިގެންދިޔަކަމަށް އެމްއެމްޕީއާރުސީން ލަފާކުރެއެވެ.
ބައިނަލްއަޤްވާމީ ގިނަ ރޫޓްތަކަކަށް ދަތުރުކުރާ ތުރުކީގެ ގައުމީ އެއަރލައިންއަކީ ހުޅަނގު، އިރުމަތީ އަދި މެދުތެރޭ ޔޫރަޕްގެ ގައުމުތަކުގެ އިތުރުން މެދުއިރުމަތީގެ ގައުމުތަކުގެ ގިނަ ފަރާތްތަކުގެ މެދުގައި މަޤުބޫލު އެއަރލައިނެއް ކަމުން މި ކެމްޕެއިން މެދުވެރިކޮށް ރާއްޖެއަށް ބޮޑު ވިޒިބިލިޓީއެއް ލިބިފައިވާ ކަމަށް ބެލެވެއެވެ.
ބޮޑެތި އެއާލައިންތަކާއެކު ޖޮއިންޓް ކެމްޕޭންތައް ހިންގުމަކީ އެމްއެމްޕީއާރުސީއިން އިންޑަސްޓްރީ ސްޓޭކްހޯލްޑަރުންނާއެކު މަސައްކަތް ކުރުމަށް ގެންގުޅޭ ގްލޯބަލް ސްޓްރެޓަޖީގެ ދަށުން ކުރެވޭ މަސައްކަތެކެވެ. ގްލޯބަލް މާކެޓިން ސްޓްރެޓެޖީގެ ދަށުން އެމްއެމްޕީއާރުސީ އިން ވަނީ ގަތަރު އެއާވޭސް، އެމިރޭޓްސް، ސިންގަޕޫރު އެއާލައިންސް އެންޑް އެއާއޭޝިއާ ފަދަ އެއާލައިންތަކާ އެކު ތަފާތު ޖޮއިންޓް ޕްރޮމޯޝަނަލް ކެމްޕޭންތައް ހިންގާފައެވެ.
މިދިޔަ އަހަރުވެސް ތުރުކީ މާކެޓުގައި ރާއްޖޭގެ މަޤުބޫލުކަން އިތުރުކުރުމަށް އެމްއެމްޕީއާރުސީއިން ވަނީ އެކި ހަރަކާތްތައް ހިންގާފައެވެ. މިގޮތުން ތުރުކީގެ ޖާނަލިސްޓުންނަށް ހާއްސަ ފެމިލިއަރައިޒޭޝަން ދަތުރެއް ވަނީ ކުރިއަށް ގެންގޮސްފައެވެ. މިއަހަރުވެސް މި ރީޖަން އަދި މާކެޓަށް ޚާއްސަކޮށް އިތުރު ހަރަކާތްތަކެއް ކުރިއަށް ގެންދަން ރޭވިފައިވާއިރު، މީގެތެރޭގައި ތުރުކީގެ މައި ޓުއަރ އޮޕަރޭޓަރަކާއެކު ހިންގުމަށް ހަމަޖެހިފައިވާ ޖޮއިންޓް މާކެޓިން ކެމްޕެއިނެއް ހިމެނެއެވެ.
ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރުސީއިން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއަރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ޤައުމުތަކުގައި ރޯޑްޝޯތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކުގެ އިތުރުން މާކެޓިން ކެމްޕެއިންތައް ވަނީ ހިންގާފައެވެ.