މާދަމާ ފަށާ އެމްޑީޕީގެ ކޮންގްރެސް ފަސްކުރުމަކީ ޕާޓީގެ ޗެއަރޕާސަންއަށް އޮތް ބާރެއް ނޫންކަމަށާ، އަދި ކޮންގްރެސް ފަސްކުރަންޖެހޭވަރުގެ ސަބަބެއްވެސް ނެތްކަމަށް އެމްޑީޕީގެ ޗެއަރޕާސަން ފައްޔާޟު އިސްމާޢީލް ވިދާޅުވެއްޖެއެވެ.
ފައްޔާޟު މިހެން ވިދާޅުވީ މާދަމާ ބާއްވަން ނިންމާފައި އޮތް ކޮންގްރެސް ފަސްކޮށްދެއްވުމަށް، ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު ޢަލީ އާޒިމް އެދިވަޑައިގެންފައިވާތީ އެކަމާ ބެހޭގޮތުން ނޫސްވެރިން ސުވާލު ދެންނެވުމުންނެވެ.
މާދަމާގެ ކޮންގްރެސްގައި ބައިވެރިވާ، އަތޮޅުތަކަށް ނިސްބަތްވާ އެމްޑީޕީގެ އެކިއެކި ގޮފިތަކުގެ މަންދޫބުން މިއަދު ވަނީ މާލެއަންނަން ފަށާފައެވެ. އެމީހުންނަށް މަރުހަބާ ވިދާޅުވުމަށް ފައްޔާޟުވަނީ މާލޭ އެއް ނަމްބަރު ފާލަމަށް ވަޑައިގެންފައެވެ. ނޫސްވެރިންގެ ބައެއް ސުވާލުތަކަށް ޖަވާބުދެއްވަމުން ފައްޔާޟު ވިދާޅުވީ ކޮންގްރެސްއާ ގުޅޭ ގޮތުން ބައެއް މައްސަލަތައް ހުށަހަޅާފައި އެބަހުރިކަމަށެވެ. އެކަންކަމާ ގުޅިގެން އަޅަންޖެހޭ ފިޔަވަޅުތައް ޤަވާޢިދުން އަޅުއްވާނެކަމަށާ، އެހެންނަމަވެސް ކޮންގްރެސް ފަސްކުރަންޖެހޭވަރުގެ އެއްވެސްކަމެއް މިހާތަނަށް ފާހަގަކުރެވިފައި ނުވާކަމަށެވެ. އަދި ކޮންގްރެސް ފަސްކުރުމަކީ ސީދާ ޗެއަރޕާސަންއަށް އޮތް ބާރެއްވެސް ނޫންކަމަށާ، އެކަން ކުރެވޭނީ ޤައުމީ މަޖިލީހަށް ހުށަހަޅައިގެން ފާސްކޮށްގެންކަމަށްވެސް ފައްޔާޟު ވިދާޅުވިއެވެ.
ކޮންގްރެސް ފަސްކޮށްދެއްވުމަށް މެދު ހެންވޭރު ދާއިރާގެ މެމްބަރު އަލީ އާޒިމް އެދިވަޑައިގަތީ ކޮންގްރެސް އަށް ގޮފިތައް އުފައްދާފައިވާ ގޮތާ މެދު ބައެއް ތުހުމަތުތައް ކުރެއްވުމަށްފަހުއެވެ.
ފައްޔާޟު ވިދާޅުވީ މިފަހަރުގެ މި ކޮންގްރެސްއަކީ އެމްޑީޕީން މިހާތަނަށް ބާއްވާ އެންމެ ދެފުށްފެންނަ އިންސާފުވެރި ކޮންގްރެސްއަށް ވާނެކަމަށެވެ. އަދި ކޮންގްރެސްގެ އެންމެހައިކަންކަން ކުރިއަށްގެންދަވާނީ ޤަވާޢިޑާ އެއްގޮތަށްކަމުގެ ޔަޤީންކަންވެސް ފައްޔާޟު ދެއްވިއެވެ.
އެމްޑީޕީގެ މިފަހަރުގެ ކޮންގްރެސްއަށް 700އަށްވުރެ ގިނަ ގޮފި ރަޖިސްޓްރީކޮށްފައިވާކަމަށް މަޢުލޫމާތު ލިބެއެވެ.