ތައިލެންޑާއި މިޔަންމާ ގުޅޭ ސަރަޙައްދީ ރޮނގު ކައިރީގައި އުފެދިފައިވާ ކޮޅިގަނޑަކާ ގުޅިގެން ބޯކޮށް ވާރޭ ވެހުމުގެ ސަބަބުން އެ ސަރަޙައްދުގެ ގިނަ ރަށްތަކެއްގައި ފެންބޮޑުވެ، ބޮޑެތި ގެއްލުންތަކެއް ލިބިއްޖެއެވެ. ފެންބޮޑުވުމާ ގުޅިގެން މިޔަންމާގެ ޝާން ސްޓޭޓްގެ ސައި ކޯރުގައި ހަދާފައިވާ ޑޭމްއެއް ވަނީ ފުރިގެން ބަންޑުންވެފައެވެ. އަދި، މި ކަމާ ގުޅިގެން، ޑޭމް ކައިރީގައިވާ ދެ ޤައުމުގެ ރަށްތަކަށް ވެސް އަސަރު ކުރިއެވެ.
ތައިލެންޑްގެ އުތުރުގައިވާ ޗަންގް ރާއީ ޕުރޮވިންސުގެ ރަށެއް ކަމުގައިވާ މޭ ސާއީގެ 20,000 އަށްވުރެ ގިނަ ގެއަށް ފެން ވަނެވެ. ފެން ބޮޑުވުމާ ގުޅިގެން ޢާންމުންގެ ގެދޮރަށާއި، މަގުތަކަށް ވެސް ބޮޑެތި ގެއްލުންތަކެއް ލިބިފައިވާ ކަމުގައި މޭ ސާއީގެ މާޔަރު ވިދާޅުވިއެވެ. އަދި، ބައެއް ސަރަޙައްދުތަކުގައި ބައެއް ހިސާބުތަކުގައި އުނަގަނޑާއި، މެޔާ ހަމައަށް ފެންބޮޑުވެފައިވާ ކަމަށް އޭނާ ވިދާޅުވިއެވެ.
ފެން ބޮޑުވުމާ ގުޅިގެން ގެތަކުގައި ބަންދުވެފައިވާ މީހުންނާއި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ތައިލެންޑުގެ އޮފިޝަލުން މިހާރު ދަނީ މަސައްކަތް ކުރަމުންނެވެ. ނަމަވެސް، ފެންބޮޑުވުމާ ގުޅިގެން އެއްވެސް މީހެއްގެ ފުރާނައަށް ނުރައްކާ ވި ކަމުގެ ރިޕޯޓެއް ކޮށްފައެއް ނެތެވެ.
ތައިލެންޑާއި މިޔަންމާ ގުޅޭ ސަރަޙައްދަށް ކުރިއަށް އޮތް ދުވަސްތަކުގައި މޫސުން ގޯސްވާނެ ކަމަށް ތައިލެންޑުގެ މޫސުމާ ބެހޭ އިދާރާއިން ލަފާ ކުރެއެވެ. އަދި، އެ ސަރަޙައްދުތަކުގައި އުފެދިފައިވާ ކޮޅިގަނޑު ތޫފާނަކަށް ބަދަލުވުމުގެ ފުރުޞަތު އޮތް ކަމަށާއި، އަވަށްޓެރި ލާއޯއަށް ބޯކޮށް ވާރޭވެހުމުގެ ސަބަބުން މީކޮންގް ކޯރު ފުރިގެން ބަންޑުންވެ، އެ ކަމުގެ އަސަރު ތައިލެންޑަށް ކޮށްފާނެ ކަމުގައި ވެސް އެ ޤައުމުގެ މޫސުމާ ބެހޭ އިދާރާއިން ބުނެއެވެ.