ޑިފެންސް މިނިސްޓްރީން އެކުލަވާލާފައިވާ "ނޭޝަނަލް މެރިޓައިމް ސެކިއުރިޓީ ސްޓްރެޓެޖީ" އާއި "ޑިފެންސް ވައިޓް ޕޭޕަރ" އާ ބެހޭ ގޮތުން ސްޓޭކްހޯލްޑަރުންނަށް ޑިސްކަޝަން ފޯރަމެެއް މިއަދު ބާއްވައިފިއެވެ.
ޑިފެންސް މިނިސްޓްރީން ހުށަހަޅާ މި ސިޔާސަތުތަކަކީ، ދިވެހިރާއްޖޭގެ ދިފާޢުއާއި، ދިވެހިރާއްޖޭގެ މެރިޓައިމް ޑޮމެއިންގެ ސަލާމަތަށްޓަކައި ސަރުކާރު އެކަށައަޅާފައިވާ ވިޝަންގެ ބިންގާގެ ގޮތުގައި އެކުލަވާލާ ލިޔުންތަކެކެވެ.
މީރުމާ މާލަމުގައި މިއަދު ފެށި މި ފޯރަމް ފެށުމުގެ ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ޑިފެންސް އަލްއުސްތާޛާ މާރިއާ އަޙްމަދު ދީދީއެވެ. އަދި، ފޯރަމްގައި މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، ޑރ. ޙުސައިން ރަޝީދު ޙަސަން އާއި މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ބައިވެރިވެވަޑައިގެންނެވިއެވެ.
އޭގެއިތުރުން، އޭޝިއާ އަދި ޕެސިފިކް ސަރަހައްދުގައި އޮތް ދިފާޢީ އަދި ސެކިއުރިޓީ ޑައިނަމިކްސްއާ ބެހޭގޮތުންނާއި، ދިވެހިރާއްޖޭގެ ނޭޝަނަލް މެރިޓައިމް ސެކިއުރިޓީ ސްޓްރެޓެޖީ ޕްރޮސެސްއިން އޮބްޒާވްކުރެވޭ ކަންކަމާ ގުޅޭގޮތުން، އޮސްޓްރޭލިއަން ނޭޝަނަލް ޔުނިވަރސިޓީގެ ސީނިއަރ ރިސަރޗް ފެލޯ ވިތު ދަ ނޭޝަނަލް ސެކިޔުރިޓީ ކޮލެޖު، ޑރ. ޑޭވިޑް ބްރޫވްސްޓާ ވަނީ މުހިންމު ނުކުތާތަކަކަށް އަލިއަޅުއްވާލައްވައި ވާހަކަ ދައްކަވާފައެވެ.
ޑިފެންސް މިނިސްޓްރީން ވިދާޅުވީ ދެ ދަންފަޅިއަކަށް ކުރިއަށްގެންދިޔަ މި ފޯރަމްގެ ފުރަތަމަ ދަންފަޅި ޚާއްޞަކޮށްފައިވަނީ، ދިވެހިރާއްޖޭގެ ނޭޝަނަލް މެރިޓައިމް ސެކިޔުރިޓީ ސްޓްރެޓެޖީއާ ބެހޭ ގޮތުން މަޝްވަރާ ކުރުމަށްކަމަށެވެ.. މިގޮތުން ފުރަތަމަ ދަންފަޅީގައި، މިނިސްޓަރ އޮފް ޑިފެންސް އަލްއުސްތާޛާ މާރިއާ އަޙްމަދު އިސްވެ ހުންނަވައި، ސްޓޭކްހޯލްޑަރުންގެ މެދުގައި ޑިސްކަޝަން ސެޝަނެއް ކުރިއަށްގެންދެއްވިއެވެ. އަދި އެ ޑިސްކަޝަން ކުރިއަށް ގެންދިޔުމުގެ ކުރިން، މެރިޓައިމް ސެކިޔުރިޓީ ތަރައްޤީކުރުމަށް ޓަކައި އެޕްރޯޗުކުރުމަށް ގައުމީ ސްޓްރެޓެޖީއެއް އެކުލަވާލުމާ ގުޅޭގޮތުން، ޑރ. ޑޭވިޑް ބްރޫވްސްޓާ ވާހަކަ ދެއްކެވިއިރު، ދިވެހިރާއްޖޭގެ ޤައުމީ މެރިޓައިމް ސެކިއުރިޓީ ސްޓްރެޓެޖީގެ ޑްރާފްޓްއާ ބެހޭގޮތުން މިނިސްޓްރީ އޮފް ޑިފެންސްގެ ޕްރިންސިޕަލް ޑައިރެކްޓަރ އޮފް ސްޓްރެޓެޖިކް ސެކިޔުރިޓީ އެންޑް އެސެސްމެންޓްސް، ލެފްޓިނެންޓް ކާނަލް އަޙްމަދު ޝަރީފް ވެސް ވާހަކަ ދައްކަވާ، މުހިންމު ނުކުތާތައް ފާހަގަ ކުރެއްވިއެވެ.
މެންދުރު ފަހު، ފޯރަމްގެ ދެވަނަ ދަންފަޅި ޚާއްޞަކޮށްފައިވަނީ ޑިފެންސް ވައިޓް ޕޭޕަރއާ ގުޅޭގޮތުން މަޝްވަރާކުރުމަށެވެ. މި ގޮތުން މި ދަންފަޅީގައި، ކުރިއަށްގެންދިޔަ ސެޝަންތަކުގެ މޮޑަރޭޓަރެއްގެ ގޮތުގައި މިނިސްޓަރ މާރިއާ އަޙްމަދު ދީދީ ބައިވެރިވެ ވަޑައިގެންނެވިއެވެ. ޑިފެންސް ވައިޓް ޕޭޕަރގެ ޑްރާފްޓާ ބެހޭގޮތުން ސްޓޭކްހޯލްޑަރުންނާއެކު އެ ކަމަނާ ވަނީ ޑިސްކަޝަންއެއް ކުރިއަށް ގެންގޮސްފައެވެ.
މި ދަންފަޅީގައި، ދިވެހިރާއްޖޭގެ ދިފާޢުއާއި، ޑިފެންސް ސެކްޓަރ އޯގަނައިޒްކުރުމާ ބެހޭގޮތުން އެމްއެންޑީއެފް ކޮލެޖު އޮފް ޑިފެންސް އެންޑް ސެކިޔުރިޓީ ސްޓަޑީޒްގެ ޑެޕިޔުޓީ ކޮމާންޑަރ ލެފްޓިނެންޓް ކާނަލް އިބްރާހީމް އަޝްރަފް ވާހަކަ ދެއްކެވިއިރު، ޑިފެންސް ވައިޓް ޕޭޕަރުގެ ޑްރާފްޓާ ބެހޭގޮތުން، އެމްއެންޑީއެފްގެ ޕްރިންސިޕަލް ޑައިރެކްޓަރ އޮފް ޕްލޭންސް، ޕޮލިސީ އެންޑް ރިސޯސް މެނޭޖްމަންޓް، ލެފްޓިނެންޓް ކާނަލް ޙަސަން އާމިރު ވެސް ވާހަކަ ދެއްކެވިއެވެ.
މިފޯރަމްގައި ރާއްޖެއަށް ކަނޑައަޅުއްވައިފައި ހުންނަވާ ބޭރު ގައުމުތަކުގެ ބައެއް ސަފިރުންނާއި ސަރުކާރުގެ ބައެއް މުވައްސަސާ ތަކުގެ އިތުރުން ނޫސްވެރިން ވެސް ބައިވެރިވެ ވަޑައިގެންނެވިއެވެ.