އެމެރިކާއިން ޗައިނާގެ "އެއް-ޗައިނާ" ސިޔާސަތު މުގުރާލައިފައިވާ ކަމުގައި ވިދާޅުވެ، ޗައިނާ ސަރުކާރުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ވޮންގ ލިޒިން އެމެރިކާއަށް ފާޑު ވިދާޅުވެއްޖެއެވެ. ލިޒިން މިހެން ވިދާޅުވެފައި ވަނީ، އެމެރިކާގެ ހައުސް އޮފް ރެޕްރެޒެންޓެޓިވްސްގެ ރައީސް ނޭންސީ ޕެލޯސީ ޓައިވާނަށް ކުރެއްވި ޒިޔަރަތާ ގުޅޭ ގޮތުން ދިވެހި މީޑިޔާތަކުން ކުރި ސުވާލުތަކަށް ޖަވާބު ދެއްވަމުންނެވެ.
ލިޒިން ވިދާޅުވީ، ޕެލޯސީ ޓައިވާނަށް ކުރެއްވި ދަތުރުފުޅާ އެކު، ޗައިނާއާއި އެމެރިކާއާ ދެމެދު ހަދާފައިވާ ތިން އެއްބަސްވުމަކާ އެމެރިކާއިން ޚިލާފުވެފައިވާ ކަމުގައެވެ. އަދި، ޕެލޯސީގެ ދަތުރުފުޅަކީ ޗައިނާގެ މިނިވަންކަމާއި ސިޔާދަތަށް އަރައިގަތުން ކަމުގައި އެ ޤައުމުން ދެކޭ ކަމަށާއި، ދެ ޤައުމުގެ ދެމެދުގައި އޮތް ސިޔާސީ ގުޅުމަށް މި ދަތުރުފުޅުގެ ސަބަބުން ނޭދެވޭ އަސަރުތަކެއް ކޮށްފައިވާ ކަމުގައެވެ.
ޗައިނާގެ "އެއް-ޗައިނާ" ސިޔާސަތަކީ، އ.ދ.ގެ ޢާންމު މަޖިލީހުން 1971 ވަނަ އަހަރު ފާސްކޮށްފައިވާ 2758 ނަންބަރު ޤަރާރުން ބަލައިގަނެފައިވާ ސިޔާސަތެއް ކަމުގައި ވެސް ލިޒިން ވިދާޅުވިއެވެ. މި ގޮތުން، 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނީއްސުރެ، 181 ޤައުމަކުން މި ސިޔާސަތު ބަލައިގަނެފައިވާ ކަމުގައި ވެސް ލިޒިން ވިދާޅުވިއެވެ.
1979 ވަނަ އަހަރު ޗައިނާއާއި އެމެރިކާއާ ދެމެދު އެކުލަވައިލާފައިވާ ޖޮއިންޓް ކޮމިއުނިކޭއަށް އިޝާރާތް ކުރައްވާ ލިޒިން ވިދާޅުވީ، ޗައިނާގެ ސަރުކާރާކީ ޗައިނާގެ ހުރިހާ ބިމެއްގައި ވެރިކަން ކުރާ ޤާނޫނީ ސަރުކާރު ކަމުގައި އެމެރިކާއިން ބަލައިގަނެފައިވާ ކަމުގައެވެ. އަދި، ޓައިވާނާ އެކު އެއްވެސް ގުޅުމެއް ބޭއްވޭނީ، މި ސިޔާސަތުގެ މައްޗަށް ބިނާކޮށް ކަމުގައި އެމެރިކާއިން ޤަބޫލުކޮށް، އެއްބަސްވެފައިވާ ކަމުގައެވެ.
ޕެލޯސީގެ ދަތުރުފުޅަކީ، އެމެރިކާއާއި ޗައިނާއާ ދެމެދު ވެފައިވާ އެއްބަސްވުންތަކާ ޚިލާފަށް، ޓައިވާނާއި އެމެރިކާއާ ދެމެދު އޮތް ގުޅުން އިތުރަށް ބަދަހިކުރުމުގެ މަޤުޞަދުގައި ކުރައްވާފައިވާ ދަތުރުފުޅެއް ކަމުގައި ވެސް ލިޒިން ވިދާޅުވިއެވެ. އަދި، ކޮންގްރެސްގެ އެންމެ އިސް ލީޑަރުގެ ހައިސިއްޔަތުން ޕެލޯސީ ޓައިވާނަށް ކުރެއްވި ދަތުރުފުޅު، އެމެރިކާގެ ވެރިކަން ކުރާ ބާރުން ހުއްޓުވަން ޖެހޭނެ ކަމަށް ޗައިނާއިން ޤަބޫލު ކުރާ ކަމުގައި ވެސް ލިޒިން ވިދާޅުވިއެވެ.
އެމެރިކާއާއި ޗައިނާއާ ދެމެދު އެންމެ ހޫނު ބަހުޘެއް މިހާރު ކުރެވެމުންދާ އެއް މައުޟޫޢަކީ ޓައިވާނުގެ މައްސަލަ ކަން ފާހަގަ ކުރައްވައި ލިޒިން ވިދާޅުވީ، ޕެލޯސީގެ ދަތުރުފުޅާ އެކު ޓައިވާނަކީ މިނިވަން ދަޢުލަތެއްގެ ގޮތުގައި ކަނޑައެޅުމަށް "ވަކިވެގަނެފައިވާ ފަރާތްތަކުން" ހިންގާ އަމަލުތަކަށް ޕެލޯސީގެ ދަތުރުފުޅާ ގުޅިގެން ހިތްވަރު ލިބިފައިވާ ކަމުގައެވެ. އަދި، ޓައިވާނަކީ، ހަތިޔާރެއް ގޮތުގައި ބޭނުންކޮށް، ޗައިނާ "އޮބަހައްޓާފައި" ބާއްވަން އެމެރިކާއިން މަސައްކަތް ކުރާ ކަމުގައި ވެސް ލިޒިން ތުހުމަތު ކުރެއްވިއެވެ.
ދިވެހިރާއްޖެއާއި ޗައިނާއާ ދެމެދު އޮތް ގުޅުމަށް އަލިއަޅުއްވައިލައްވައި ލިޒިން ވިދާޅުވީ، ރާއްޖެއަކީ ވެސް ޗައިނާގެ "އެއް-ޗައިނާ" ސިޔާސަތު ބަލައިގަންނަ ޤައުމެއް ކަމަށާއި، ދެ ޤައުމުގެ ދެމެދުގައި ޒަމާނުއްސުރެ އޮތް ގާތް ގުޅުން ބިނާވެފައި ވަނީ މި އަސާސްގެ މައްޗަށް ކަމުގައެވެ. އަދި، ދެ ޤައުމުގެ ދެމެދުގައި އޮތް ދޭދޭ ގުޅުންތައް އިތުރަށް ބަދަހި ކުރުމަށް ޗައިނާއިން އިސްކަންދޭ ކަމުގައި ވިދާޅުވެ، ލިޒިން ވަނީ މި ގުޅުންތައް އިތުރަށް ހަރުދަނާ ކުރަން ދެ ޤައުމުން ވެސް ގުޅިގެން މަސައްކަތް ކުރާނެ ކަމަށް ޤަބޫލުފުޅު ކުރައްވާ ކަމުގައި ވިދާޅުވެފައެވެ.