އައްޑޫ ސިޓީގެ ކަނބިހަ ބީޗު ސަރަހައްދަށް ސީލްއެއް ވަދެއްޖެއެވެ.
އިއްޔެ ހަވީރު ހިތަދޫގެ ކަނބިހަ ބީޗު ސަރަހައްދަށް ވަތް ސީލްގެ ފޮޓޯތަކާއި ވީޑިއޯތައް ވަނީ ސޯޝަލް މީޑިއާގައި ވަރަށް ބޮޑަށް ދައުރުވެފައެވެ.
ސީލް ފެނުނު ކަނބިހަ ބީޗް ސަރަހައްދަކީ ހިތަދޫ ލިންކު ރޯޑާއި ދިމާލުން އޮންނަ ސަރަހައްދެކެވެ. އެ ސަރަހައްދަށް އިއްޔެ ވަތް ސީލްގެ ދިގުމިނުގައި ގާތްގަނޑަކަށް 3 ފޫޓު ހުންނާނެކަމަށް ލަފާކުރެވެއެވެ.
ކަނބިހަ ބީޗަށް ވަތް ސީލް ބަލާލުމަށް އެ ސަރަހައްދަށް ގިނަ ބަޔަކު އިއްޔެ ވަނީ ޖަމާވެފައެވެ. އަދި ފުލުހުންގެ އެހީތެރިކަމާއެކު ސީލް އެ ސަރަހައްދުން ނެރުނުކަމަށްވެސް މައުލޫމާތު ލިބިފައިވެއެވެ.
އައްޑޫ ސިޓީން ސީލެއް ފެނިފައިވާއިރު، މީގެ 16 އަހަރުން 15 ޖުލައި 2006 ވަނަ އަހަރުވެސް އައްޑޫއިން ވަނީ ސީލެއް ފެނިފައެވެ.
އީޕީއޭ އިން ކުރި ޓްވީޓެއްގައި ބުނީ ރާއްޖެއަށް އެކި ފަހަރު މަތިން ބެހިގެން އަންނަ ސީލްފަދަ ޖަނަވާރު ހިފަން އުޅެ، މިފަދަ ދިރުންތަކަށް އުނދަގޫކޮށް، ގޯނާއެއްގެ އަމަލު ނުކުރުމަށް އިލްތިމާސްކުރާކަމަށެވެ. އަދި އައްޑޫއިން ފެނުނު ސީލްއަކީ އިންސާނުންނަށް ނުރައްކާތެރި ސީލްއެއް ނޫން ކަމަށްވެސް އީޕީއޭއިން ބުންޏެވެ.
ސީލްއަކީ ފިނި ސަރަހައްދުތަކުގެ ކަނޑުތަކުން ފެންނަ އެއްޗެކެވެ. އާންމުކޮށް ސީލް އުޅެނީ އާކްޓިކް އަދި އެޓްލާންޓިކް ކަނޑުގެ ސަރަހައްދުތަކުގައެވެ. އެހެންކަމުން ހޫނުގަދަ ސަރަހައްދުތަކުން އާއްމުކޮށް ސީލްއެއް ނުފެންނާނެއެވެ.
ކޮންމެ އަހަރަކުވެސް އެކި މޫސުންތަކުގައި ބައެއް ސަރަހައްދުތަކުގައި އުޅޭ ސީލްތައް އެތައް ހާސް މޭލަކަށް ހިޖުރަކުރެއެވެ. އެހެންކަމުން އިއްޔެ ހިތަދޫ ކަނބިހާ ބީޗްއިން އެ ފެނުނު ސީލްއަކީ ހިޖުރަކުރުމުގެ ތެރޭގައި އެ ސަރަަހައްދަށް އައިސްފައިވާ ސީލެއްކަމަށް ލަފާކުރެއެވެ.