މަކުނުވިދުރި ޖެހިގެން ސްޕެއިންގެ ރައްޔިތަކު މަރުވެއްޖެއެވެ. އެ މީހާ މަރުވެފައިވާކަން ސްޕެއިނުން ޖުލައި 29 ވަނަ ދުވަހު އިޢުލާނު ކޮށްފައި ވާއިރު، މިއީ މި ބަލީގައި ވިލާތުގެ ޤައުމަކުން މީހަކު މަރުވި ކަމަށް ރިޕޯޓު ކޮށްފައިވާ ފުރަތަމަ ފަހަރެވެ. އަދި، އެފްރިކާ ބައްރުން ބޭރުން މި ބަލީގައި މަރުވި ދެވަނަ މީހާއެވެ.
ސްޕެއިންގެ ޞިއްޙަތާ ބެހޭ ވުޒާރާއިން ބުނީ، އެ ޤައުމުގައި މި ބަލި ޖެހިފައިވާ މީހުންގެ އަދަދު މިހާރު 4,298 އަށް އަރާފައިވާ ކަމުގައެވެ. މީގެ ތެރެއިން 120 މީހުންނަށް ހޮސްޕިޓަލުގައި އެޑްމިޓްކޮށްގެން ފަރުވާ ދެމުން ދާ ކަމުގައި ވެސް އެ އިދާރާއިން ބުނެއެވެ. މިއީ، އެ ޤައުމުގައި މި ބަލި ޖެހިފައިވާ މީހުންގެ 3.2 އިންސައްތައެވެ. މި ބަލީގައި މަރުވި މީހާގެ އިތުރު މަޢުލޫމާތެއް އެ ޤައުމުން ހާމަކޮށްފައެއް ނުވެއެވެ.
މަކުނުވިދުރިއަކީ ޢާންމު ޞިއްޙަތަށް އޮތް ނުރައްކަލެއްގެ ގޮތުގައި ކަނޑައަޅައި، ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން އެ ކަން އިޢުލާނު ކޮށްފައި ވަނީ ޖުލައި 23 ވަނަ ދުވަހުއެވެ. މި ބަލި ޖެހިފައިވާ މީހުން ދުނިޔޭގެ 75 ޤައުމަކުން ފެނިފައި ވާއިރު، މި ބަލި ޖެހިފައިވާ މީހުންގެ އަދަދު މިހާރު ވަނީ 16,000 އަށްވުރެ މައްޗަށް އަރާފައިވާ ކަމަށް ވެސް ޑަބްލިޔު.އެޗް.އޯ.އިން ރިޕޯޓު ކުރިއެވެ.
ބްރެޒިލްއިން ވެސް މި ވަނީ މި ބަލީގައި މީހަކު މަރުވެފައިވާ ކަން އިޢުލާނު ކޮށްފައެވެ. އެ ޤައުމުގެ ޞިއްޙަތާ ބެހޭ ވުޒާރާއިން ބުނީ މި ބަލީގައި މަރުވެފައި ވަނީ އުމުރުން 41 އަހަރުގެ ފިރިހެނެއް ކަމުގައެވެ. މިއީ، އެމެރިކާ ބައްރުން މި ބަލީގައި މަރުވި ފުރަތަމަ މީހާއެވެ. ބްރެޒިލްގައި މި ބަލި ޖެހިފައިވާ މީހުންގެ އަދަދު މިހާރު ވަނީ 1,066 އަރާފައެވެ. އަދި، އިތުރު 513 މީހަކަށް ބަލި ޖެހިފައިވާ ކަމަށް ޝައްކު ކުރެވެއެވެ.
މި ބައްޔަށް ޚާއްޞަ ކޮށްފައިވާ ވެކްސިނަކަށް ވިލާތުގެ ކޮމިޝަނުން ވަނީ ހުއްދަ ދީފައެވެ. މި ވެކްސިން އުފައްދާފައި ވަނީ ޑެންމާކުގެ ބޭސްވެރިކަމާ ބެހޭ ކުންފުންޏެއް ކަމުގައިވާ ބަވޭރިއަން ނޯޑިކްއިންނެވެ. މި ވެކްސިނަށް އެމެރިކާއާއި ކެނެޑާގެ ޞިއްޙީ އިދާރާތަކުން ވެސް ވަނީ ހުއްދަ ދީފައެވެ.