އީރާނުން ނިއުކްލިޔަރ ހަތިޔާރު އުފެއްދުން ހުއްޓުވުމުގެ މަޤުޞަދުގައި އެކުލަވައިލާފައިވާ އެއްބަސްވުމަށް އަލުން ރުޖޫޢަވުމަށް މިހާރު ކުރަމުންދާ މަސައްކަތްތަކަށް އެ ޤައުމުން މަރުޙަބާ ކިޔައިފިއެވެ. މި ޕުރޮގުރާމު އިތުރަށް ފުޅާކުރުން ހުއްޓުވުމަށް އީރާނާއި ހުޅަނގުގެ ބާރުތަކާ ދެމެދު އެއްބަސްވުމެއް އެކުލަވައިލާފައި ވަނީ 2015 ވަނަ އަހަރުއެވެ.
ނަމަވެސް، އީރާނުގެ އިސްވެރިންނާއި އެމެރިކާގެ ކުރީގެ ރައީސް ޑޮނަލްޑް ޓްރަމްޕާ ދެމެދު 2018 ވަނަ އަހަރު އުފެދުނު ކޯޅުންގަނޑެއްގައި ޓްރަމްޕް ވަނީ އެއްބަސްވުމުން ވަކިވާން ނިންމަވާފައެވެ. އެއްބަސްވުމަށް އަލުން ރުޖޫޢަވުމަށް އީރާނާއި ހުޅަނގުގެ ބާރުތަކުން މިހާރު ދަނީ މަސައްކަތް ކުރަމުންނެވެ.
މި ކަމާ ގުޅޭ ގޮތުން މަޝްވަރާ ކުރުމަށް އީރާނުގެ ޚާރިޖީ ވަޒީރު ޙުސައިން އާމިރުޢަބްދުاللهހިއަންއާއި ވިލާތުގެ އިއްތިހާދުގެ ޚާރިޖީ ސިޔާސަތާ ބެހޭ އިސްވެރިޔާ ޖޯސެފް ބޮރެލް ވަނީ ފޯނުން ގުޅުއްވައި ވާހަކަފުޅު ދައްކަވާފައެވެ. އާމިރުޢަބްދުاللهހިއަން ވިދާޅުވީ އެއްބަސްވުމަށް އަލުން ރުޖޫޢަވުމަށް ކުރާ މަސައްކަތްތަކާ މެދު އެ ޤައުމުން ހިތްހަމަޖެހޭ ކަމަށާއި، މަޝްވަރާތަކަށް މަރުޙަބާ ކިޔާ ކަމުގައެވެ.
ނިއުކްލިޔަރ ޕުރޮގުރާމާ ގުޅޭ އެއްބަސްވުމުގެ އައު ދެލިކޮޕީއެއް ބޮރެލް ވަނީ އާމިރުޢަބްދުاللهހިއަން އަށް ހުށަހަޅާފައެވެ. މި ދެލިކޮޕީގެ ދަށުން، ނިއުކްލިޔަރ ޕުރޮގުރާމު އިތުރަށް ފުޅާކުރުން އީރާނުން މަޑުޖައްސައިލުމުން، ހުޅަނގުގެ ބާރުތަކުން އެ ޤައުމާ ދެކޮޅަށް އަޅާފައިވާ އިޤްތިޞާދީ ދަތި ކުރުމުގެ ފިޔަވަޅުތަކެއް ލުއިތަކެއް ދޭނެއެވެ. އަދި، އެކި ދާއިރާތަކުން އެ ޤައުމަށް އެހީތެރިކަން ފޯރުކޮށްދޭން ފަށާނެއެވެ.
މި އެއްބަސްވުމުގެ ބޭނުމަކީ އީރާނުން ނިއުކްލިޔަރ ހަތިޔާރެއް އުފެއްދުމުގެ ޤާބިލުކަން ހޯދުން ހުއްޓުވުމެވެ. ނަމަވެސް، އެ ޤައުމުން އެ ފަދަ ހަތިޔާރެއް އުފެއްދުމަށް ބޭނުންވާ މިންވަރަށް މިހާރު ވެސް ޔުރޭނިއަމް މުއްސަނދި ކުރަމުންދާ ކަމުގައި ހުޅަނގުގެ ބާރުތަކުން ތުހުމަތު ކުރެއެވެ. އީރާނުން ބުނަނީ، އެ ޤައުމުގެ ނިއުކްލިޔަރ ޕުރޮގުރާމަކީ މަދަނީ ބޭނުންތަކަށް ހަކަތަ އުފެއްދުމަށް ހިންގާ ޕުރޮގުރާމެއް ކަމުގައެވެ.