މެދުއިރުމަތީގެ ޤައުމުތަކުގައި ހިންގާ ސަރަޙައްދީ މަޝްރޫޢުތަކުގައި ފަލަސްތީނުގެ ބައިވެރިވުން މުހިންމު ކަމަށް ވިދާޅުވެ، މަޝްރޫޢުތަކުގައި ފަލަސްތީނު ބައިވެރި ކުރުމަށް ޢުރުދުންގެ ރަސްގެފާނު ޢަބްދުالله ގޮވައިލައްވައިފިއެވެ. އޭނާ މި ކަމަށް ގޮވައިލައްވާފައި ވަނީ، އިސްރާޢީލުގެ ބޮޑުވަޒީރު ޔައިރު ލަޕިދު މިހާރު ޢުރުދުނަށް ކުރައްވަމުން ގެންދަވާ ދަތުރުފުޅުގައި ރަސްގެފާނާ އެކު ބޭއްވެވި ބައްދަލުވުމެއްގައި އޭނާއާ ވާހަކަފުޅު ދައްކަވަމުންނެވެ.
އެމެރިކާއިން އިސްނަގައިގެން މެދުއިރުމަތީގައި ހިންގަން ތައްޔާރު ވަމުންދާ ފެނާއި ހަކަތައާ ބެހޭ މަޝްރޫޢުތަކުގައި ފަލަސްތީނު ވެސް ބައިވެރި ކުރުމަށް ޢުރުދުންގެ ރަސްގެފާނު ގެންދަވަނީ ބާރު އަޅުއްވަމުންނެވެ. އަދި، ޢަރަބިންނާއި އިސްރާޢީލާ ދެމެދު ޖެހިފައި އޮތް ޒަމާންވީ މައްސަލައަށް ހައްލެއް ހޯދޭނީ، ފަލަސްތީނުގެ މިނިވަން ދަޢުލަތެއް ޤާއިމު ކުރުމުގެ ފުރުޞަތު ދީގެން ކަމުގައި ވެސް އޭނާ ލަޕިދު ގާތުގައި ވިދާޅުވިއެވެ.
މި ބައްދަލުވުމުގައި ދެ ބޭފުޅުން ވަނީ ދެ ޤައުމުގެ ދެމެދުގައި ފެނާއި، ހަކަތައާއި، ކާބޯތަކެތީގެ ރައްކާތެރިކަން ކަށަވަރު ކުރުމާއި، ދަތުރުފަތުރުގެ ދާއިރާއިން ގުޅުން ބަދަހި ކުރުމާ ގުޅޭ ގޮތުން މަޝްވަރާ ކުރައްވާފައެވެ. 1994 ވަނަ އަހަރު މި ދެ ޤައުމުން ވަނީ ޞުލްޙައިގެ އެއްބަސްވުމެއްގައި ސޮއިކޮށްފައެވެ. ނަމަވެސް، އިސްރާޢީލާއި ފަލަސްތީނުގެ މުސްލިމުންނާ ދެމެދު ހިނގަމުންދާ ހަމަނުޖެހުންތަކާ ގުޅިގެން ދެ ޤައުމުގެ ދެމެދުގައި އޮތް ގުޅުން ވަނީ ނުތަނަވަސް ވެފައެވެ.
މި އެއްބަސްވުމުގެ ދަށުން އިސްރާޢީލުން ދަނީ ޢުރުދުނަށް ސާފު ބޯފެން ފޯރުކޮށްދެމުންނެވެ. އަދި، ޑީސެލިނޭޓް ކޮށްފައިވާ ފެން އެ ޤައުމަށް ވިއްކުމާ މެދު އިސްރާޢީލުން ދަނީ މަޝްވަރާ ކުރަމުންނެވެ. އަދި، ޢުރުދުންއިން ދަނީ، އެ ޤައުމުގެ އުފެއްދުންތައް އިސްރާޢީލުގެ އިސްތިއުމާރީ ބާރުތަކުން އަތްގަދަކޮށްފައިވާ ހުޅަނގު އައްސޭރީގައި ދިރިއުޅޭ ފަލަސްތީނުގެ މުސްލިމް ރައްޔިތުންނަށް ފޯރުކޮށްދިނުމަށް އޮތް ހުރަސްތައް ނައްތައިލުމަށް އިސްރާޢީލަށް ބާރު އަޅަމުންނެވެ.