ފިލިޕީންސްގެ އުތުރުގެ ސަރަޙައްދަކަށް އައި ރިކްޓަރ މިންގަނޑުން 7.1ގެ ބާރުގަދަ ބިންހެލުމެއްގައި މަރުވި މީހުންގެ އަދަދު ހަތަރަކަށް އަރައިފިއެވެ. އެ ޤައުމުގެ އުތުރުގައިވާ ރަށެއް ކަމުގައިވާ ލުޒޯންއަށް އައި މި ބިންހެލުމާ ގުޅިގެން ގިނަ އަދަދެއްގެ ޢިމާރާތްތަކަށް ގެއްލުންވެ، 60 އަށްވުރެ ގިނަ މީހުންނަށް އަނިޔާވިއެވެ.
މި ބިންހެލުން އައިސްފައި ވަނީ ޑޮލޮރެސް ކިޔާ ރަށަކާ 11 ކިލޯމީޓަރު ދުރުން ކަނޑުގެ އަޑިން 10 ކިލޯމީޓަރުގެ ފުނަށެވެ. މި ބިންހެލުމާ ގުޅިގެން އެ ސަރަޙައްދަށް އިތުރު ލޮޅުންތައް އަންނާނެ ކަމަށް ލަފާކުރެވޭ ކަމުގައި އެ ޤައުމުގެ ބިންހެލުންތަކާ ބެހޭ އިދާރާއިން ބުނެއެވެ.
ބިން ހެލުމާ ގުޅިގެން 173 ޢިމާރާތަކަށް ބޮޑެތި ގެއްލުންތައް ލިބިފައިވާ އިރު، 58 ސަރަޙައްދެއްގައި ބިންގަނޑު ކަނޑައިގެން ގޮސްފައިވެއެވެ. އަނިޔާވެފައިވާ 60 މީހުންގެ ތެރެއިން 44 މީހުންނަކީ އަބްރާ ޕުރޮވިންސުގައި ދިރިއުޅޭ މީހުންނެވެ. ބިންހެލުމާ ގުޅިގެން 250,000 މީހުންގެ އާބާދީއެއް އޮންނަ އެ ޕްރޮވިންސުގެ މައި ހޮސްޕިޓަލު ޢިމާރާތުގެ ބޮޑު ބައެއް ވެއްޓުނެވެ. ނަމަވެސް، އެއްވެސް މީހަކަށް އަނިޔާވެފައެއް ނުވެއެވެ.
ފިލިޕީންސަކީ އަލިފާން ފަރުބަދަތައް ގިނަ، ބިންހެލުންތައް ޢާންމު ”ރިންގް އޮފް ފަޔަރ“ ސަރަޙައްދުގައި އޮންނަ ޤައުމެކެވެ. އެ ޤައުމަށް ކޮންމެ އަހަރަކު އެވުރެޖުކޮށް 20 ތޫފާން އަރައެވެ. އަދި މި ތޫފާންތަކާ ގުޅިގެން ބިންގަނޑު ކަނޑައިގެން ދިޔުމުގެ އެތައް ހާދިސާއެއް ހިނގައެވެ. މި ބިންހެލުމުގެ އަސަރު އަވަށްޓެރި އިންޑޮނީޝިޔާގެ މެނީލާއަށް ވެސް ފޯރިއެވެ.